អតីតកីឡាកាស Jimmy Snuka ទទួលមរណភាព ក្រោយពីតុលាការទម្លាក់រឿងក្ដីមនុស្សឃាត

2017-01-16 02:00:09
ព័ត៌មាន

2017-01-16 02:00:09
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតកីឡាកាស WWE លោក Jimmy Snuka រហស្សនាម “Superfly" បានទទួលមរណភាពក្នុងវ័យ៧៣ឆ្នាំ កាលពីថ្ងៃទី១៥ ខែមករា ឆ្នាំ២០១៧ ក្រោយពីតុលាការទម្លាក់រឿងក្ដីមនុស្សឃាតដែលជាប់ពាក់ព័ន្ធនឹងលោក។

គ្រួសាររបស់អតីតកីឡាកាស WWE រូបនេះ បានឲ្យដឹងថា Snuka ស្លាប់ដោយសារជំងឺមហារីកក្រពះ ហើយកន្លងមក កាលពីឆ្នាំ២០១៥ Snuka ធ្លាប់បានជាប់ពាក់ព័ន្ធក្នុងរឿងក្ដីឃាតកម្មដែលទាក់ទិនទៅនឹងការស្លាប់របស់មិត្តស្រីរបស់លោក ឈ្មោះ Nancy Argentino អំឡុងឆ្នាំ១៩៨៣។

យ៉ាងណាមិញ រឿងក្ដីមួយនេះ ត្រូវបានទម្លាក់ចោលកាលពី១២ថ្ងៃមុន ដោយហេតុតែតុលាការសម្រេចថា Snuka មានជំងឺមហារីកដំណាក់កាលធ្ងន់ធ្ងរ និងសរសៃប្រសាទ។ ចុងក្រោយ អតីតកីឡាកាស WWE រូបនេះ បានទទួលមរណភាព។

Dwayne Johnson អ្នកកីឡាកាសដែលមានរហស្សនាម "The Rock” និងជាតារាសម្ដែងដែលកំពុងល្បីល្បាញផងដែរនោះ បានប្រកាសដំណឹងអំពីមរណភាពរបស់ Jimmy Snuka តាមរយៈបណ្ដាញសង្គមផ្សព្វផ្សាយ តាំងនាមឲ្យគ្រួសារអ្នកកីឡាកាស WWE ទាំងអស់។

កូនស្រីរបស់ Snuka បានបង្ហោះរូបរំលែកទុក្ខមួយ ដែលគេឃើញនាងថតកាន់ដៃឪពុករបស់គេ ហើយសរសេរក្រោមរូបនោះថា "ខ្ញុំស្រលាញ់ប៉ា (I LOVE YOU DAD) " ។

Jimmy Snuka ចូលក្នុងពិភពកីឡាកាសតាំងពីឆ្នាំ១៩៦៨ ដល់ឆ្នាំ២០១០។ ដោយសារតែ Snuka មានក្បាច់បោកចំបាប់គូប្រកួត ការហក់ផ្លោះផ្សេងៗ គេគ្រប់គ្នាក៏ដាក់រហស្សនាមឲ្យលោកថា “Superfly" ។ បើទោះបីជា Snuka មិនដែលធ្លាប់ឈ្នះបាន WWE Championship សូម្បីតែម្ដង ប៉ុន្តែឈ្មោះរបស់លោកបានលឺសុះសាយពេញ WWE ។