- 2016-12-18 07:08:56
- ព័ត៌មាន
ប្រណាំងសេះ ប្រាក់រង្វាន់១៥ ០០០ដុល្លារនៅ 7NG រកឃើញម្ចាស់ជើងឯកហើយ
- 2016-12-18 07:08:56
- ចំនួនមតិ 0 | ចំនួនចែករំលែក 0
ប្រណាំងសេះ ប្រាក់រង្វាន់១៥ ០០០ដុល្លារនៅ 7NG រកឃើញម្ចាស់ជើងឯកហើយ
ចន្លោះមិនឃើញ
ក្រោយពីធ្វើការប្រកួតស្វែងរកជើងខ្លាំងរយៈពេល១២ខែមកនេះ ឃើញថាពានរង្វាន់ប្រណាំងសេះនៅទីលាន SCT Sport Complex បានរកឃើញម្ចាស់ជើងឯកប្រាក់រង្វាន់១៥ ០០០ដុល្លារហើយ គឺបានទៅលើសេះឈ្មោះថា MABELL មានកម្ពស់១,៦៥ម៉ែត្រ។
កាលពីម្សិលមិញនេះ នៅក្រុមហ៊ុន 7NG បានធ្វើកម្មវិធីប្រណាំងសេះដំណាច់ឆ្នាំរបស់ខ្លួនឈ្មោះថា SCT Derby Cup ដែលមានការចូលរួមជាច្រើនពីអ្នកគាំទ្រ ក៏ដូចជាប្រជាពលរដ្ឋនៅឃុំវិហារសួគ៍ ស្រុកខ្សាច់កណ្ដាល ខេត្តកណ្ដាល។ សេះដែលចូលរួមការប្រកួតធំនេះ មានប្រភពមកពីបរទេសផងនិងនៅក្នុងស្រុកផង ហើយនិយាយពីកម្ពស់វិញក៏សុទ្ធតែខ្នាតអន្តរជាតិថែមទៀត ដោយមានរហូតដល់ទៅ១,៧០ម៉ែត្រឯណោះ។
លោកឧកញ៉ា ស្រី ចន្ធូ អ្នករៀបចំកម្មវិធីប្រកួតខាងលើបាននិយាយថានេះជាឆ្នាំទីមួយសម្រាប់ទីលានរបស់លោកក្នុងការរៀបចំកម្មវិធីប្រកួតនេះឡើយ។ ជាក់ស្ដែងក្រុមការងារបានអង្កេតឃើញថាទទួលបានជោគជ័យច្រើន និងមានសេះល្អៗជាច្រើនបានចូលរួមប្រកួតប្រជែងគ្នា។ សម្រាប់ឆ្នាំ២០១៧ខាងមុខទៀតសោត ក្រុមការងាររបស់លោកនឹងនៅតែបន្ដធ្វើការប្រកួតនេះ ដើម្បីឱ្យវិស័យកីឡាប្រណាំងសេះនៅកម្ពុជាកាន់តែរីកចម្រើនឡើង តាមរយៈទីលានស្ដង់ដានៅក្រុមហ៊ុន 7NG នេះ។
ចំពោះប្រាក់រង្វាន់សម្រាប់សេះឈ្នះលេខ១ក្នុងការប្រកួតដំណាច់ឆ្នាំនេះ គឺបានទៅលើ MABELL អមជាមួយប្រាក់រង្វាន់ ១៥ ០០០ដុល្លារអាមេរិក លេខ២បានទៅលើសេះឈ្មោះ Rosi ប្រាក់រង្វាន់ ១ ៥០០ដុល្លារ និងលេខ៣បានទៅលើសេះឈ្មោះ ម៉លលី ប្រាក់រង្វាន់១ ០០០ដុល្លារ។
ក្រៅពីកម្មវិធីប្រណាំងសេះដ៏អស្ចារ្យនេះ នៅទីលានSCT Sport Complex ក៏មានការប្រកួតប្រណាំងកីឡាផ្សេងៗទៀតជាច្រើនដែរ ដូចជាប្រណាំងម៉ូតូ ប្រណាំងឡាន កីឡាបាល់ទាត់ និងរត់ប្រណាំងកុមារាកុមារី ជាដើម។ ចំពោះការប្រណាំងម៉ូតូ អ្នកបានលេខ១គឺ ជា លីឃៀង ដោយទទួលបានរង្វាន់ ម៉ូតូប្រណាំងថ្មីមួយគ្រឿង ដែលមានតម្លៃជាង១ម៉ឺនដុល្លារអាមេរិកដែរ៕
