Manulife នឹងបន្តគាំទ្ររត់ប្រណាំងពាក់កណ្ដាលម៉ារ៉ាតុងនៅអង្គរ

2016-10-30 17:39:07
ព័ត៌មាន

2016-10-30 17:39:07
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Robert Elliott អគ្គនាយកប្រតិបត្តិនៃក្រុមហ៊ុន Manulife បានអះអាងថា ក្រុមហ៊ុនរបស់លោក នឹងបន្តគាំទ្រពេញទំហឹងទៅលើកម្មវិធីរត់ប្រណាំងពាក់កណ្ដាលម៉ារ៉ាតុងនៅអង្គរ ក្រោយពេលផុតកុងត្រាឧបត្ថម្ភនាឆ្នាំ២០១៨។

អគ្គនាយកប្រតិបត្តិនៃក្រុមហ៊ុននេះបានឲ្យដឹងថា លោកពិតជាមានមោទនភាពដែលបានចូលរួមឧបត្ថម្ភដល់ព្រឹត្តិការណ៍ដ៏អស្ចារ្យមួយនេះ។ ការចូលរួមជួយឧបត្ថម្ភរបស់ក្រុមហ៊ុនមួយនេះ ដោយមើលឃើញថា ព្រឹត្តិការណ៍ខាងលើស្របតាមគោលដៅរយៈពេលវែង ដែលអាចជួយប្រជាពលរដ្ឋកម្ពុជាឲ្យមានសុខភាពល្អប្រសើរ។

ជាមួយគ្នានោះឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានមានប្រសាសន៍ថា លោកសង្ឃឹមយ៉ាងមុតមាំឆ្នាំ២០១៦នេះអ្នកចូលរួម នឹងមានចំនួនច្រើនជាងឆ្នាំកន្លងទៅ។ ហើយអ្វីដែលពិសេសនោះខាងផ្ទះសំណាក់ឬសណ្ឋាគារមេត្តាកុំឡើងថ្លៃឈ្នួល ដើម្បីចូលរួមសហការទាក់ទាញភ្ញៀវទេសចរណ៍ជាតិ និងអន្តរជាតិចូលរួមឲ្យបានកាន់តែច្រើន។

ស្របពេលលោក សែម ផល្លា ប្រធានគណៈកម្មការប្រកួតម៉ារ៉ាតុងអន្តរជាតិចក្រភពអង្គរបានលើកឡើងថា លោកក៏សូមសំណូមពរដល់កីឡាករខ្មែរគ្រប់រូបមេត្តាចុះឈ្មោះឲ្យបានទាន់ពេលវេលា ដើម្បីជួយសម្រួលដល់ក្រុមរៀបចំកម្មវិធីប្រកួត។ ការចូលរួមទាំងឡាយទាំងអ្នកឧបត្ថម្ភ និងអ្នករត់ទាំងអស់ក្នុងទិសដៅមនុស្សធម៌។

ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងនៅអង្គរឆ្នាំ២០១៦ នឹងធ្វើឡើងនៅថ្ងៃទី ៤ខែធ្នូ ដែលជាគម្រប់ខួបលើកទី២១ នៃព្រឹត្តិការណ៍ដ៏ធំមួយនេះ។ បើគិតត្រឹមសព្វថ្ងៃមានអ្នកចុះឈ្មោះរួចរាល់បរទេសចំនួនជាង៤ពាន់នាក់ និងកម្ពុជាជាង២ពាន់នាក់។ ពេលវេលាឈប់ទទួលពាក្យចូលរួមត្រឹមថ្ងៃទី១ ខែវិច្ឆិកា ឆ្នាំ២០១៦៕