- 2016-10-16 15:30:28
- ព័ត៌មាន
ប្រណាំងសេះវគ្គផ្ដាច់ព្រ័ត្ររង្វាន់ ១៥ ០០០ដុល្លារនៅ 7NG រំពឹងមានសេះចូលរួម៨០ក្បាល
- 2016-10-16 15:30:28
- ចំនួនមតិ 0 | ចំនួនចែករំលែក 0
ប្រណាំងសេះវគ្គផ្ដាច់ព្រ័ត្ររង្វាន់ ១៥ ០០០ដុល្លារនៅ 7NG រំពឹងមានសេះចូលរួម៨០ក្បាល
ចន្លោះមិនឃើញ
ការប្រកួតប្រណាំងសេះក្នុងខែទី១០របស់ទីលាន SCT Sport Complex នៅ 7NG បានបញ្ចប់ហើយ កាលពីម្សិលមិញនេះ ដោយមានសេះចូលរួមប្រកួតចំនួន៥០ក្បាល បែងចែកជា៣ពូល។ ខណៈដែលការប្រកួតវគ្គផ្ដាច់ព្រ័ត្រ គេរំពឹងថានឹងមានសេះចូលរួមរហូតដល់ទៅ៨០ក្បាលឯណោះ។
លោក អឿន សុផល
លោក អឿន សុផល អ្នកគ្រប់គ្រងកសិដ្ឋានសេះរបស់ 7NG បានបង្ហើបឱ្យដឹងថាពីមួយខែទៅ១ខែកន្លែងរបស់លោកបានចម្រាញ់បានសេះជាច្រើន ដើម្បីឈានទៅប្រកួតផ្ដាច់ព្រ័ត្រប្រាក់រង្វាន់ ១៥ ០០០ដុល្លារនៅខែធ្នូចុងឆ្នាំ២០១៦នេះ។ ដោយក្នុងការប្រកួតផ្ដាច់ព្រ័ត្រនោះ លោករំពឹងថានឹងមានសេះចូលរួមឱ្យបាន៨០ក្បាល ដើម្បីបង្កើតជាការប្រកួតធំបំផុតមួយនៅកម្ពុជា។
ងាកទៅលទ្ធផលនៃការប្រកួតប្រចាំខែតុលានេះវិញ ក្នុងពូល E ដែលមានសេះកម្ពស់១,២៩ម៉ែត្រចុះក្រោម សេះលេខ១បានទៅលើឈ្មោះ អាពពក ប្រាក់រង្វាន់៣០ម៉ឺនរៀល សេះលេខ២ អាក្រញូង ប្រាក់រង្វាន់២០ម៉ឺនរៀល និងលេខ៣បានទៅលើ អាហុងដា ប្រាក់រង្វាន់១០ម៉ឺនរៀល។ ចំណែកឯពូល D មានសេះកម្ពស់១,៣៩ម៉ែត្រចុះក្រោមនោះ លេខ១បានទៅលើ អាខូប៊យ ប្រាក់រង្វាន់៥០ម៉ឺនរៀល លេខ២បានទៅលើសេះឈ្មោះ អាតូច ប្រាក់រង្វាន់៣០ម៉ឺនរៀល និងលេខ៣បានទៅលើ អាសក់វែង ប្រាក់រង្វាន់២០ម៉ឺនរៀល។
ដោយឡែកពូល A ដែលជាពូលល្អជាងគេនិងមានស្ដង់ដារអន្តរជាតិនោះ សេះមានកម្ពស់ចាប់ពី១,៧០ម៉ែត្រចុះក្រោម ដោយមានមកពីប្រទេសថៃផងដែរ។ ចំពោះចំណាត់ថ្នាក់វិញ គឺលេខ១បានទៅលើសេះឈ្មោះថា Carino ប្រាក់រង្វាន់១លានរៀល លេខ២បានទៅលើ Chanel ប្រាក់រង្វាន់៧០ម៉ឺនរៀល និងលេខ៣បានទៅលើ ម៉លលី ប្រាក់រង្វាន់៥០ម៉ឺនរៀល។
ក្នុងការប្រកួតប្រចាំខែ១០នេះដែរ នៅទីលានSCT Sport Complex មិនត្រឹមតែមានការប្រណាំងសេះទេ ពោលគឺក្រៅពីសេះនេះ មានការប្រណាំងម៉ូតូហោះ និងប្រកួតបាល់ទាត់ផងដែរ ដោយមានការចូលរួមទស្សនាយ៉ាងច្រើនពីសំណាក់ប្រជាពលរដ្ឋនៅតំបន់នេះ៕
អត្ថបទ៖ មុន្នី រម្យ
