Tevez សុំទោស ក្រោយឈូសគេឲ្យបាក់ជើង កាលថ្ងៃសៅរ៍

2015-09-21 16:26:55
បាល់ទាត់

2015-09-21 16:26:55
ចំនួនមតិ 0 | ចំនួនចែករំលែក 0

ចន្លោះមិនឃើញ

Carlos Tevez បាននិយាយសុំទោស និងសោកស្ដាយយ៉ាងខ្លាំងចំពោះកំហុសរបស់ខ្លួន ដែលឈូសបើកបាតទៅលើខ្សែបម្រើ Ezequiel Ham ឲ្យបាក់ជើង ក្នុងការប្រកួតលីកកំពូលអាហ្សង់ទីន កាលពីថ្ងៃសៅរ៍។

បញ្ជាក់៖ រូប និងវីដេអូខាងក្រោម អាចប៉ះពាល់អារម្មណ៍ប្រិយមិត្ត

Carlos Tevez (ស្តាំ)

Tevez បានឈូសបើកបាតពេញទៅលើ Ham អំឡុងការប្រកួតដែលក្រុមរបស់គេ Boca Juniors ឈ្នះ Argentinos Juniors ៣-១ នៅ Primera Division សប្ដាហ៍ទី២៥ កាលថ្ងៃសៅរ៍ ខណៈដែលកីឡាករវ័យ៣១ឆ្នាំរូបនេះ រកបាន២គ្រាប់ក្នុងប្រកួតនោះ ហើយសំណាងល្អកីឡាកររូបនេះ ក៏ពុំបានទទួលការពិន័យកាតលឿង ឬក្រហម ពីអាជ្ញាកណ្ដាលផងដែរ។

យ៉ាងណា ក្រោយហេតុការណ៍រន្ធត់នោះកើតឡើង អតីតខ្សែប្រយុទ្ធឆ្នើមក្រុម Juventus រូបនេះ បាននិយាយសុំទោស ប្រាប់ដល់ Futbol para Todos ថា៖ "វាពិតជាធ្វើឲ្យខ្ញុំខឹងនឹងខ្លួនឯង ព្រោះខ្ញុំគ្រាន់តែចង់ប្រជែងយកបាល់ប៉ុណ្ណោះ ហើយវាមិនមែនជាការចង់ព្យាបាទ ឬគោលបំណងរបស់ខ្ញុំ ចង់ធ្វើឲ្យគាត់ឈឺចាប់ឡើយ"។

“ខ្ញុំពិតជាសោកស្ដាយ ព្រោះខ្ញុំមិនចង់ធ្វើអ្វីអាក្រក់លើគាត់ទេ។ ខ្ញុំមិនដែលធ្វើឲ្យនរណាម្នាក់ឈឺចាប់ឡើយ...នេះជាលើកដំបូងសម្រាប់ខ្ញុំ។ ឥឡូវជាពេលដែលខ្ញុំ ត្រូវទៅជួបគាត់ និងសុំទោស”។ កីឡាករជម្រើសជាតិអាហ្សង់ទីនបន្ថែម។

ហេតុការណ៍នេះ ស្រដៀងទៅនឹងរឿងរ៉ាវរបស់ Luke Shaw សប្ដាហ៍មុនដែរ នេះមានន័យថា Ham នឹងត្រូវការសម្រាកព្យាបាលនៅរយៈពេលមួយវែងឆ្ងាយ ទើបអាចជាសះស្បើយឡើងវិញ៕

សូមទស្សនាវីដេអូខាងក្រោម៖