សហព័ន្ធកីឡាគុនដាវកម្ពុជាប្រកាសរៀបចំការប្រកួតជើងឯកជាតិឆ្នាំ២០១៥

2015-09-17 20:58:32
ព័ត៌មាន

2015-09-17 20:58:32
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាគុនដាវកម្ពុជា បានធ្វើសន្និសីទកាសែតស្តីពីរៀបចំការប្រកួតជ្រើសរើសជើងឯកប្រចាំឆ្នាំ២០១៥ នៅទីស្នាក់ការនៃគណៈកម្មាធិការជាតិអូឡាំពិកកម្ពុជាកាលពីព្រឹកមិញនេះ ក្រោយទទួលបានការឯកភាពពីក្រសួងអប់រំយុវជន និងកីឡាដើម្បីរៀបចំការប្រកួតចាប់ពីថ្ងៃទី២៨ ដល់ថ្ងៃទី៣០ ខែកញ្ញា ឆ្នាំ២០១៥ នៅក្នុងសាលដំបូលទូកនៃសាកលវិទ្យាល័យភូមិន្ទភ្នំពេញ។

កម្មវិធីប្រកួតរបស់សហព័ន្ធកីឡាគុនដាវកម្ពុជា នឹងធ្វើឡើងលើ៤វិញ្ញាសាគឺ បុរសឯកត្តជនដាវតូច បុរសឯកត្តជនដាវធំ នារីឯកត្តជនដាវធំ និងនារីឯកត្តជនដាវតូច។ ចំណែកអ្នកចូលរួមប្រកួតមានសរុប៤៨នាក់ ដែលក្នុងនោះមានកីឡាករ៤០នាក់ និងកីឡាការិនី៨នាក់។ សមាសភាពអ្នកចូលរួមឆ្នាំនេះ មានការថយចុះបើប្រៀបធៀបនឹងឆ្នាំមុន ព្រោះកីឡាករ-កីឡាការិនីភាគច្រើនជាសិស្សរៀនថ្នាក់ទី៩ និងទី១២ ដែលសុំពេលឈប់សម្រាកហាត់ដើម្បីត្រៀមប្រលង។

លោក សុខ យ៉ានីមល អគ្គលេខាធិការសហព័ន្ធកីឡាគុនដាវកម្ពុជា បានបញ្ជាក់ថា សហព័ន្ធកីឡាគុនដាវហាក់នៅក្មេងខ្ចីនៅឡើយ ព្រោះទើបទទួលស្គាល់ពីក្រសួងអប់រំក្នុងឆ្នាំ២០១២ ប៉ុន្តែបទពិសោធន៍លើឆាកអន្តរជាតិមានច្រើន។ យ៉ាងណាក្ដី លោកសង្ឃឹមថា នឹងអាចពង្រឹងសមត្ថភាពកីឡាករ-កីឡាការិនី ឲ្យទាន់ការប្រកួតកីឡាស៊ីហ្គេមឆ្នាំ២០២៣ ដែលកម្ពុជាត្រៀមខ្លួនធ្វើជាម្ចាស់ផ្ទះ។ លោកអគ្គលេខាធិការរូបនេះបានអះអាងថា លោកនឹងព្យាយាមផ្សព្វផ្សាយឲ្យយុវជននៅតាមសាលា ឬសាកលវិទ្យាល័យនានាចូលរួមលេងកីឡានេះ។

ក្រៅពីមានការសហការពីក្រសួងអប់រំយុវជននិងកីឡា សហព័ន្ធក៏ទទួលបានជំនួយឧបត្ថម្ភពីក្រុមហ៊ុនឯកជនធំពីរ គឺកាសែតភ្នំពេញប៉ុស្តិ៍ និងក្រុមហ៊ុនក្រមា ឬបងធំដតខម ព្រមទាំងក្រុមហ៊ុន Sabay សម្រាប់រៀបចំការប្រកួត។ ជាងនេះទៅទៀត លោក Steven Gargadannec ជាអ្នកថតរូបឯកទេសមកពីប្រទេសបារាំង បានជួយសហការក្នុងការងារថតរូបផងដែរ។

មកទល់បច្ចុប្បន្ន សហព័ន្ធកីឡាគុនដាវកម្ពុជាបានទទួលស្គាល់ក្លឹបសមាជិកចំនួន៧ ដែលក្លឹប៦ នៅភ្នំពេញ មានដូចជាក្លឹប HYSA, ក្លឹបហូសាណា, ក្លឹប HMM, ក្លឹបសាលាអន្តរជាតិ Zaman, ក្លឹបអង្គការស្នាមញញឹមនៃកុមារ PSE, ក្លឹបសាលាអន្តរជាតិ CIA, ក្លឹប CCC និងក្លឹបមួយទៀតស្ថិតក្នុងខេត្តសៀមរាបឈ្មោះក្លឹបនរា។ ចំពោះកីឡាករ-កីឡាការិនីដែលជាប់ឈ្មោះនៅក្នុងសហព័ន្ធមានសរុប ៦៥នាក់ រាប់បញ្ចូលទាំងកីឡាករ-កីឡាការិនីបរទេសផង៕