ចែករង្វាន់ដល់កីឡាអត្តពលកម្មនិស្សិតឧត្ដមសិក្សា

2015-07-03 20:29:07
ព័ត៌មាន

2015-07-03 20:29:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាជ្រើសរើសជើងឯកទូទាំងប្រទេសក្របខណ្ឌនិស្សិតឧត្តមសិក្សា និងមធ្យមសិក្សាបច្ចេកទេសប្រចាំឆ្នាំសិក្សា២០១៤-២០១៥ លើប្រភេទកីឡាបាល់ទាត់ បាល់ទះ បាល់បោះ និងអត្តពលកម្ម ដែលបានចាប់ផ្ដើមតាំងពីថ្ងៃទី២៦ ខែមិថុនានោះ មកដល់ពេលនេះបានបញ្ចប់ និងចែករង្វាន់លើប្រភេទកីឡាអត្តពលកម្ម។

ជាមួយនឹងការបញ្ចប់នេះ គណៈកម្មការរៀបចំការប្រកួត និងក្រុមហ៊ុនស្រាបៀរអង្គរ ដែលជាដៃគូឧបត្ថម្ភក្នុងព្រឹត្តិការណ៍កីឡានិស្សិតនេះ បានធ្វើពិធីប្រគល់រង្វាន់ដល់អត្តពលិកដែលបានទទួលជ័យលាភីនៅក្នុងការប្រកួត។ ពិធីនេះបានប្រព្រឹត្តធ្វើនៅព្រឹកថ្ងៃទី០៣ ខែកក្កដា ឆ្នាំ២០១៥ នៅក្នុងវិមានពហុកីឡាដ្ឋានជាតិ ដោយមានការចូលរួមពីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា លោក ព្រំ ប៊ុណ្ណយី អគ្គនាយករង អគ្គនាយកដ្ឋានកីឡា និងតំណាងក្រុមហ៊ុនស្រាបៀរអង្គរ។ គួរបញ្ជាក់ថា ការផ្ដល់រង្វាន់ថវិកា ភេសជ្ជៈ និងអាវ របស់ក្រុមហ៊ុនស្រាបៀរអង្គរនេះ គ្រាន់តែជារង្វាន់បន្ថែមលើរង្វាន់របស់ក្រសួងអប់រំ យុវជន និងកីឡាប៉ុណ្ណោះ។ ចំពោះលទ្ធផលក្នុងប្រភេទកីឡាអត្តពលកម្មនេះ លើវិញ្ញាសារត់ល្បឿន១០០ម៉ែត្រ បុរស ចំណាត់ថ្នាក់លេខ១ កីឡាករ ង៉ែត ភារ័ត្ន វិទ្យាស្ថានអប់រំកាយ និងកីឡា រត់ក្នុងថិរវេលា១០វិនាទី៨៣ លេខ២ កីឡាករ ប៉ែន សុគង់ សកលវិទ្យាល័យអាស៊ីអឺរ៉ុប ថិរវេលា១១វិនាទី១៨ និងលេខ៣កីឡាករយាំ ភារិន សកលវិទ្យាល័យវេស្ទើន ថិរវេលា១១វិនាទី៦៤។ រត់ល្បឿន១០០ម៉ែត្រ នារី ចំណាត់ថ្នាក់លេខ១ កីឡាការិនី ចាន់ សីហា រត់ថិរវេលា១៣វិនាទី៦៧ លេខ២ កីឡាការិនី ម៉ៅ ម៉ូនីតា ថិរវេលា១៤វិនាទី៥៣។ កីឡាការិនីទាំងពីររូបនេះមកពីសកលវិទ្យាល័យអាស៊ីអឺរ៉ុបជាមួយគ្នា។ វិញ្ញាសាលោតកម្ពស់បុរស ចំណាត់ថ្នាក់លេខ១ កីឡាករ រ័ត្ន សុជាតិ សកលវិទ្យាល័យអាស៊ីអឺរ៉ុប លោតបាន១,៧៥ម៉ែត្រ និងលេខ២ កីឡាករ ហែម រម្យទម សកលវិទ្យាល័យន័រតុន លោតបាន១,៥៥ម៉ែត្រ។ ឯលោតកម្ពស់នារីវិញ ចំណាត់ថ្នាក់លេខ១ កីឡាការិនី ម៉ៅ ម៉ូនីតា សកលវិទ្យាល័យអាស៊ីអឺរ៉ុប លោតបាន១,៤០ម៉ែត្រ និងលេខ២ កីឡាការិនី ហោ ស្រីអូន វិទ្យាស្ថានអប់រំកាយ និងកីឡាលោតបាន១,២៥ម៉ែត្រ។ សម្រាប់វិញ្ញាសាលោតចម្ងាយ បុរស ចំណាត់ថ្នាក់លេខ១ កីឡាករ ង៉ែត ភារ័ត្ន វិទ្យាស្ថានអប់រំកាយ និងកីឡា លោតបាន៦,០៧ម៉ែត្រ និងលេខ២ កីឡាករ យាំ ភារិន សកលវិទ្យាល័យវេស្ទើន ៥,៩០ម៉ែត្រ។ លោតចម្ងាយនារី ចំណាត់ថ្នាក់លេខ១ កីឡាការិនី ចាន់ សីហា លោតបាន៤,៤៤ម៉ែត្រ និងលេខ២ កីឡាការិនី គឺន សុគន្ធា ៤,០២ម៉ែត្រ ដែលកីឡាការិនីទាំងពីររូបនេះមកពីសកលវិទ្យាល័យអាស៊ីអឺរ៉ុបជាមួយគ្នា។ វិញ្ញាសាចោលដុំដែកបុរស ចំណាត់ថ្នាក់លេខ១ កីឡាករ ហេង វុទ្ធី សកលវិទ្យាល័យវេស្ទើន ចោលបាន១១,៤៦ម៉ែត្រ លេខ២ កីឡាករ ចន ចាន់ឌុក មជ្ឈមណ្ឌលគរុកោសល្យភូមិភាគហ៊ុនសែនព្រៃវែង៩,៥២ម៉ែត្រ។ ចំណែកផ្នែកនារី ចំណាត់ថ្នាក់លេខ១ កីឡាការិនី ធឿន ម៉ារីណែត សកលវិទ្យាល័យវេស្ទើន ចោលបាន៩,៥៣ម៉ែត្រ និងលេខ២កីឡាការិនី សំរិទ្ធ សូនីតា សកលវិទ្យាល័យអាស៊ីអឺរ៉ុប៩.២៧ម៉ែត្រ។ ចំពោះវិញ្ញាសារត់ចម្ងាយ៥.០០០ម៉ែត្រ បុរស ចំណាត់ថ្នាក់លេខ១ កីឡាករ ម៉ា វីរ៉ូ សកលវិទ្យាល័យវេស្ទើន រត់ថិរវេលា១៦នាទី០៩វិនាទី៩៩ លេខ២ កីឡាករ ផាន សុភ័ក្ត្រ វិទ្យាស្ថានអប់រំកាយ និងកីឡា ថិរវេលា១៦នាទី៥៦វិនាទី២៥ និងលេខ៣កីឡាករ ហែម ប៊ុនទីង សកលវិទ្យាល័យធនធានមនុស្ស ថិរវេលា១៧នាទី៤២វិនាទី១៨។ ចំពោះការរត់៣.០០០ម៉ែត្រនារី ចំណាត់ថ្នាក់លេខ១ កីឡាការិនី ហេង ម៉េងជូ វិទ្យាស្ថានអប់រំកាយ និងកីឡា ថិរវេលា១២នាទី១២វិនាទី៦១ លេខ២ កីឡាការិនី ហោ ស្រីអូន វិទ្យាស្ថានអប់រំកាយនិងកីឡា ថិរវេលា១៤នាទី២២វិនាទី០៧ និងលេខ៣ កីឡា ការិនីឈុំ បុប្ផារ៉ន សកលវិទ្យាល័យវេស្ទើន ថិរវេលា១៥នាទី២៤វិនាទី០៦៕ អត្ថបទ៖ ម៉ឺន រស្មី