វិទ្យាល័យឥន្រ្ទទេវីជួសជុលទីលានបាល់ទាត់ស្មៅធម្មជាតិស្អាតធេង

2015-07-01 22:26:48
បាល់ទាត់

2015-07-01 22:26:48
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាវិទ្យាល័យឥន្រ្ទទេវីនៅរាជធានីភ្នំពេញបានជួសជុលទីលានបាល់ទាត់ដែលដាំស្មៅធម្មជាតិយ៉ាងស្អាតរួចរាល់ហើយដើម្បីបណ្តុះបណ្តាលកីឡាបាល់ទាត់ បន្ទាប់ពីចំណាយពេលកសាងអស់រយៈពេលជាង៤ខែមកដែលការជួសជុលនេះបានធ្វើឲ្យវិទ្យាល័យឥន្ទ្រទេវីនាំមុខគេសម្រាប់វិទ្យាល័យនានានៅរាជធានីភ្នំពេញ។

ទីលានបាល់ទាត់ វិទ្យាល័យឥន្ទ្រទេវី

លោក នូ វុទ្ធី នាយកវិទ្យាល័យឥន្រ្ទទេវីបានឲ្យដឹងថា ទីលានបាល់ទាត់វិទ្យាល័យឥន្ទ្រទេវី ត្រូវបានសាងសង់ឡើងក្រោមការជួយទាំងស្រុងពីលោក សៅ សុខា ប្រធានសហព័ន្ធបាល់ទាត់កម្ពុជា។ ទីលានដែលដាំស្មៅធម្មជាតិយ៉ាងស្រស់ស្អាតមានបណ្ដោយ៩០ម៉ែត្រ និងទទឹង ៦០ ម៉ែត្រ ព្រមទាំងមានការដាក់លូបង្ហូរទឹកពេលមានភ្លៀងមិនឲ្យលិចទៀតផង។ រាល់ការចំណាយទាំងអស់លោកមិនបានដឹងឡើយ ពីព្រោះជាការចំណាយទាំងស្រុងរបស់លោក សៅ សុខា ។

លោកបានបន្តថា ទីលានបានចាប់ផ្ដើមសាងសង់កាលពាក់ពីកណ្ដាលខែវិច្ឆិកា ឆ្នាំ២០១៤ និងដាក់ឲ្យក្មេងលេងកាលពីពេលថ្មីៗនេះ។ លោកបញ្ជាក់ថា លោក សៅ សុខា សម្រេចចិត្តជួយជួសជុលទីលានបាល់ទាត់នេះដោយសាលោកឃើញពីភាពលំបាកពេលមានភ្លៀងខ្លាំង ទឹកលិច ហើយសិស្សមិនអាចលេងបាន។ ម្យ៉ាងទៀតលោកចង់លើកស្ទួយវិស័យបាល់ទាត់នៅតាមសាលានានាឲ្យមានការរីកចំរើនឡើង ។

ជាមួយគ្នានោះដែរក្រុមហ៊ុនទូរសព្ទមិត្តហ្វូន ក៏បានជួយឧបត្ថមបាល់ចំនួន១០គ្រាប់។ ជាចុងក្រោយលោក នាយក វិទ្យាល័យរូបនេះក៏សូមអគុណដល់បណ្ដាម្ចាស់ជំនួយទាំងអស់ដែលបានជួយឧបត្ថម្ភដល់សាលារបស់លោកជារៀងរហូតមក៕