Joe Hart៖ ខ្ញុំសង្ឃឹមថា Barca នឹងលើកពាន UCL

2015-06-05 20:58:32
បាល់ទាត់

2015-06-05 20:58:32
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទី Joe Hart របស់ក្រុមមេឃខៀវ Manchester City សង្ឃឹមថា ក្រុម FC Barcelona នឹងលើកពាន UEFA Champions League នៅយប់ស្អែក ដោយជឿជាក់លើខ្សែប្រយុទ្ធ Lionel Messi។

Barca និង Juventus នឹងត្រូវប៉ះគ្នានៅកីឡដ្ឋាន Olympiastadion ទីក្រុងប៊ែរឡាំង នាយប់ថ្ងៃសៅរ៍ ក្នុងការប្រកួតផ្ដាច់ព្រ័ត្រ UEFA Champions League ខណៈដែលក្រុមទាំង២ ចង់លើក៣ ក្នុង១រដូវកាលដូចគ្នា។

អ្នកចាំទីក្រុមជម្រើសជាតិតោកំណាចអង់គ្លេស Hart បានបង្ហើបប្រាប់ថា ខ្លួននឹងគាំទ្រក្រុមជើងឯកអេស្ប៉ាញ និងសូមស្ញប់ស្ញែងដល់ Messi បន្ទាប់ពីក្រុមខ្លួន ធ្លាក់ក្រោមស្នាដៃ Barca កាលពីប្រកួតវគ្គ១៦ក្រុម។

កីឡាករវ័យ២៨ឆ្នាំ បានប្រាប់ដល់ Mirror ថា៖ "ខ្ញុំសង្ឃឹមថា ពួកគេ (Barca) នឹងឈ្នះ Champions League ហើយគ្រប់យ៉ាងពិតជាស័ក្ដិសមសម្រាប់ Messi។ យើងធ្លាប់ចាញ់ពួកគេទាំង២ជើង យ៉ាងអស់ចិត្ត។ យើងឡើងផុតវគ្គចែកពូលយ៉ាងលំបាក ប៉ុន្តែយើងពិតជាមិនទាន់ឈានដល់កម្រិតកំពូលទេ។ Juventus ក៏ជាក្រុម ដែលធ្វើបានអស្ចារ្យដូចគ្នា ដូច្នេះពួកគេទាំង២ គឺជាក្រុមកំពូលនាពេលបច្ចុប្បន្ន"។

Hart បង្ហាញទម្រង់លេងគួរឲ្យភ្ញាក់ផ្អើលមែនទែន កាលពីប្រកួតជើងទី២ រវាង Man City ទល់នឹង Barca ដោយអ្នកចាំទីដៃស្អិតរូបនេះ ជួយសង្គ្រោះបាល់ល្អៗជាច្រើនគ្រាប់ ប៉ុន្តែក្រុមរបស់ខ្លួននៅតែចាញ់ ១-០ និងសរុបទាំង២ជើង ក្រុមអង់គ្លេសចាញ់ ក្រុមខ្លាំងអេស្ប៉ាញ ដោយលទ្ធផល ៣-១៕

ចុះប្រិយមិត្ត ចង់ឲ្យ Barca លើកពានដូច Joe Hart ឬអត់?

-ចុចអាន៖ Messi ព្រមានថា Tevez អាចធ្វើឱ្យ Barca ចុកឈាមបាន

ប្រែសម្រួល៖ វិន ជីវ័ន្ត ប្រភព៖ goal