Falcao មានជំនឿថាអាចបន្តនៅ Old Trafford រដូវកាលក្រោយ

2015-03-31 17:45:21
បាល់ទាត់

2015-03-31 17:45:21
ចំនួនមតិ 0 | ចំនួនចែករំលែក 0

ចន្លោះមិនឃើញ

អនាគតរបស់ខ្សែប្រយុទ្ធ Radamel Falcao ដែល Manchester United ខ្ចីជើងពីក្រុមMonaco នៅតែស្រពិចស្រពិលនៅឡើយ ក្រោយមានពាក្យចចាមអារ៉ាមជុំទិសទាក់ទងនឹងគេ។ មានព័ត៌មានជាច្រើននាពេលកន្លងមក បានបញ្ជាក់ថាកីឡាករកូឡុំប៊ីរូបនេះ អាចនឹងចេញពី Old Trafford ក្រោយបង្ហាញទម្រង់លេងមិនល្អ ប៉ុន្តែពេលនេះសាមីខ្លួនបានចេញមកបញ្ជាក់ហើយថារូបគេនៅតែមានជំនឿចិត្តថាអាចបន្តអនាគតនៅក្លិបអង់គ្លេសនេះជាបន្តទៀតរដូវកាលក្រោយ។

Falcao បានចូលរួមជាមួយ Man Utd ក្នុងរដូវកាលនេះ ប៉ុន្តែអាចរកបានតែ៤គ្រាប់ប៉ុណ្ណោះ ក្នុង១៩ប្រកួត ដែលជាហេតុធ្វើឲ្យអ្នកចាត់ការ Louis van Gaal មិនសូវសប្បាយចិត្ត។ តែអ្វីដែលគួរចាប់អារម្មណ៍នោះគឺកីឡាករវ័យ២៩ឆ្នាំរូបនេះ បានបំពេញតួនាទីយ៉ាងល្អក្នុងក្រុមជម្រើសជាតិ ដោយរកបាន៣គ្រាប់ក្នុងជំនួបមិត្តភាព២ប្រកួត ទល់នឹង បារ៉ែន និងគុយវ៉ែត។

អតីតតួឯករបស់ Atletico Madrid បាននិយាយផងដែរថា៖ "ខ្ញុំគិតថានៅពេលដែលខ្ញុំរកគ្រាប់បាល់បាន វាជារឿងសំខាន់ និងផ្តល់ទំនុកចិត្តឲ្យខ្ញុំ។ ពីមុន ខ្ញុំបាននិយាយថាខ្ញុំត្រូវការលេង ហើយក្នុងជម្រើសជាតិខ្ញុំមានឱកាសលេង។ ខ្ញុំប្រឹងលេងឲ្យបានល្អ និងរកគ្រាប់បាល់បាន ហើយឥឡូវខ្ញុំនឹងត្រឡប់ទៅ Manchester ដោយមានទំនុកចិត្ត។ យើងនៅមាន៨ប្រកួតទៀត។ ខ្ញុំនឹងប្រឹងលេងឲ្យអស់សមត្ថភាព និងលេងឲ្យបានច្រើននាទីតាមដែលអាចធ្វើទៅបាន"។

Falcao ពេលលេងឲ្យជម្រើសជាតិកូឡុំប៊ីថ្មីៗនេះ

Falcao កំពុងមានក្លិបធំៗនៅអឺរ៉ុបមួយចំនួនចាប់អារម្មណ៍ ដែលក្នុងនោះរួមមានសេះបង្កង់ Juventus, Valencia និងស្តេចស Real Madrid ជាដើម៕ ប្រែសម្រួល៖ ហេងសុធារិទ្ធិ ប្រភព៖ dailymail