ពានរង្វាន់ Yamaha Chelleng Cup U-13 នៅបាត់ដំបងចាប់ផ្ដើមស្អែកហើយ

2015-02-20 23:15:06
បាល់ទាត់

2015-02-20 23:15:06
ចំនួនមតិ 0 | ចំនួនចែករំលែក 0

ចន្លោះមិនឃើញ

បាល់ទាត់ពានរង្វាន់ Yamaha Challenge U-13 ចាប់ផ្ដើមរដូវកាលថ្មីរបស់ខ្លួនទៀត នៅថ្ងៃទី ២១ ខែ កុម្ភៈ ឆ្នាំ ២០១៥ នេះ ពីម៉ោង ៨ ព្រឹកដល់ម៉ោង ១១ ថ្ងៃត្រង់នៅទីលាន Green Sport ផ្សារទំនើប ពួពុយ ខេត្ត បាត់ដំបង។

ការប្រកួតកាលពីឆ្នាំមុន

លោក សារ៉េត ស៊ីដន អ្នកសម្របសម្រួលកម្មវិធីបានប្រាប់ថា ការប្រកួតលើកទី ៤ នេះមានក្រុមចូលរួមចំនួន ៨ មកពីតាមសាលានានាក្នុងខេត្តបាត់ដំបង។ ប្រភពបានបន្ថែមថាក្រុមការងាររបស់លោកបានធ្វើការបាល់ទាត់ជាមួយសាលាបឋមសិក្សាប្រហែលជាជិត ១០០ សាលាហើយ ក្នុងចំណោមសាលាប្រហែលជាង ៥០០ កន្លែងក្នុងខេត្ត។ តាមគម្រោងនៅឆ្នាំ ២០១៥ នេះនឹងធ្វើឱ្យរួចរាល់ដោយត្រូវបង្កើតការប្រកួតរាល់ ៣ ខែម្ដង។

គោលបំណងសំខាន់ក្នុងការបង្កើត ពានរង្វាន់នេះឡើងគឺដោយសារក្រុមហ៊ុន Yamaha ចង់ឲ្យកុមារនៅតាមសាលា ទាំងអស់គិតពីការសិក្សាហើយពេលទំនេរងាកមករកកីឡាដើម្បីកម្សាន្ត ជៀសឲ្យផុតពីគ្រឿងញៀន។ ម៉្យាងវិញទៀតនេះជាការផ្ដល់ឱកាសឱ្យក្មេងបានបង្ហាញសមត្ថភាព និងអាចឲ្យពួកគេមានបទពិសោធន៍ក្នុងវិស័យបាល់ទាត់កាន់តែច្រើន។

ខុសពីការប្រកួតឈុតធំ ពានរង្វាន់នេះប្រើពេលតែ ១៥ នាទីប៉ុណ្ណោះក្នុងមួយប្រកួត ហើយមួយក្រុមអាចចុះឈ្មោះកីឡាករបាន ១៥ នាក់ (កុមារានិងកុមារី)។ ក្រុមទាំង ៨ ដែលចូលរួមនៅឆ្នាំនេះមាន សាលាបឋមសិក្សា ថ្កូវ , ដាក់សសរ , អណ្ដូងចេញ , អូតាគាំ 1 , ក្ដុលដូនទាវ , អង់ , វត្តរកា និង បឋមសិក្សា ទួលតាឯក។

ចំណែករង្វាន់វិញ ក្រុមចំណាត់ថ្នាក់លេខ ១ នឹងត្រូវបានពានមាសមួយ បាល់ ១ ខោអាវកីឡាមួយឈុត ហើយក្រុមជើងឯករង ត្រូវបានចំណែក ពានតូចមួយខោអាវ កីឡាមួយឈុត និង ក្រុមលេខ ៣ បានពានតូចមួយនិងខោអាវមួយឈុត។ ក្នុងនោះអ្នកចូលទស្សនា ផ្ទាល់អាចនឹងទទួលបានអាវយឺតអនុស្សាវរីយម្នាក់មួយទៀតផង៕

អត្ថបទ ៖ ស្រី សុវណ្ណដារ៉ា