មុនឡើងធ្វើគ្រូធំនៅណាហ្គា តើ មាស ចាន់ណា មានប្រវត្តិបែបណា?

2015-01-02 15:39:51
បាល់ទាត់

2015-01-02 15:39:51
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក មាស ចាន់ណា ជាធនធានមនុស្សដ៏សំខាន់ក្នុងពិភពបាល់ទាត់ខ្មែរ មិនគួរមើលរំលង។ លោកធ្លាប់ជាប់ជាកីឡាករជម្រើសជាតិតាំងពីឈុត U13 រហូតដល់ឈុតធំ។ បុរសវ័យ ៣៣ ឆ្នាំម្នាក់នេះបានបញ្ចប់អាជីពជាកីឡាករបាល់ទាត់នៅឆ្នាំ ២០១០ បន្ទាប់ពីជួយក្រុមណាហ្គាខបជាង ៩ ឆ្នាំ។ ផុតពីកីឡាករលោកបានក្លាយជាជំនួយការគ្រូបង្វឹកម្ដង។ លោកបានបញ្ចប់ការសិក្សា សញ្ញាប័ត្រគ្រូបង្វឹកកម្រិត A (AFC A License) ក្នុងពីឆ្នាំ ២០១២។ កាលពីថ្ងៃទី ២៥ ខែ ធ្នូ ថ្មីៗ នេះក្លិបបាល់ទាត់ណាហ្គាខប បានសម្រេចដំឡើងតំណែងលោកឱ្យធ្វើជាគ្រូបង្កោលធំប្រចាំក្លិប។

តើដំណើរជីវិតរបស់លោក មាស ចាន់ណា យ៉ាងណា ក្នុងវិស័យបាល់ទាត់ខ្មែរ មុននឹងក្លាយជាគ្រូធំប្រចាំក្លិបខ្លាំងក្នុងស្រុកមួយនេះ?

លោក មាស ចាន់ណា (ខាងស្ដាំ)

ជីវប្រវត្តិសង្ខេប

លោក មាស ចាន់ណា កើតនៅថ្ងៃទី១ ខែមករា ឆ្នាំ ១៩៨០ ជាកូនអ្នកភ្នំពេញ។ លោកមានឱពុកឈ្មោះ មាស សាខន (ស្លាប់) និង អ្នកម្ដាយ ទឹម សី នៅរស់។ នៅក្នុងគ្រួសាររបស់លោក មានបងប្អូនចំនួន ៥ នាក់ ក្នុងនោះប្រុស ៣ នាក់ស្រី ២ នាក់ ហើយ លោក ចាន់ណា ជាកូនទី៤។

កីឡាករណាហ្គាខប នាំគ្នាលើ លោក មាស ចាន់ណា ក្រោយឈ្នះពាន Hun Sen Cup 2013

លោក បានរៀបអាពាហ៍ពិពាហ៍នៅឆ្នាំ ២០០៧ គឺរំលងថ្ងៃផ្ដាច់ព្រ័ត្រនៃពានរង្វាន់ Hun Sen Cup មួយថ្ងៃ ពោលគឺក្រោយណាហ្គាខបក្លាយជាជើងឯករងក្នុងពាននេះជាលើកដំបូង។ ភរិយារបស់លោកឈ្មោះ ធីវ សុទ្ធថា ជាបុគ្គលិករបស់ក្រុមហ៊ុនឯកជនមួយក្នុងរាជធានីភ្នំពេញ។ សព្វថ្ងៃអ្នកទាំង ២ ទទួលបានកូនប្រុសម្នាក់ជាចំណងដៃអាពាហ៍ពិពាហ៍។

កម្រិតវប្បធម៌ចំណេះដឹងទូទៅ ប្រហែលជាវ័យ ៦ ឆ្នាំ កុមារា ចាន់ណា ចូលសិក្សា នៅសាលាបឋមសិក្សាទួលស្លែង។ លុះក្រោយមកទៀតកុមារារូបនេះបន្តការសិក្សា កម្រិតមធ្យមសិក្សាបឋមភូមិនៅអនុវិទ្យាល័យទួលស្វាយព្រៃ។ នៅឆ្នាំ ១៩៩៩ ទើបបានបញ្ចប់ការសិក្សាថ្នាក់មធ្យមសិក្សាទុតិយភូមិនៅវិទ្យាល័យព្រះយុគន្ធរ។

កម្រិតវប្បធម៌ក្នុងវិស័យកីឡា - ចាប់ពីឆ្នាំ ១៩៩៩ ដល់ ២០០១ ចូលសិក្សាគ្រូអប់រំកាយ និង កីឡា នៅវិទ្យាស្ថានជាតិអប់រំ។ - នៅឆ្នាំ ២០០៩ បញ្ចប់វគ្គសិក្សាគ្រូបង្វឹកបាល់ទាត់កម្រិត C ( AFC C License ) នៅមជ្ឈមណ្ឌលបាល់ទាត់ជាតិ។ - ចូលឆ្នាំ ២០១០ បញ្ចប់វគ្គសិក្សា Football Administration Course ដែលរៀបចំនៅមជ្ឈមណ្ឌលបាល់ទាត់ជាតិ។ - ក្នុងឆ្នាំ២០១០ ដូចគ្នា បានបញ្ចប់វគ្គសិក្សាគ្រូបង្វឹកបាល់ទាត់កម្រិត B ( AFC B License) ដែលរៀបចំនៅមជ្ឈមណ្ឌលបាល់ទាត់ជាតិ។ - លុះដល់ឆ្នាំ ២០១២ បានបញ្ចប់វគ្គសិក្សា FIFA Club Management នៅសណ្ឋាគារសាន់វ៉េ។ - ឆ្នាំ ២០១២ សិក្សាចប់វគ្គ FIFA Professional Coaching Course នៅមជ្ឈមណ្ឌលបាល់ទាត់ជាតិ។ - ឆ្នាំ ២០១២ បានបញ្ចប់វគ្គសិក្សាគ្រូបង្វឹកបាល់ទាត់កម្រិត A ( AFC A License) នៅមជ្ឈមណ្ឌលបាល់ទាត់ជាតិ។

សញ្ញាប័ត្រគ្រូបង្វឹកបាល់ទាត់កម្រិត A ( AFC A license) របស់លោក មាស ចាន់ណា

មូលហេតុក្លាយជាអ្នកបាល់ទាត់ មានរឿង ២ ក្នុងអតីតកាលជាកត្តាសំខាន់ជំរុញចិត្តលោកដើរលើវិថីកីឡា។ ទីមួយបណ្ដាមកពីមានការពេបជ្រាយរបស់មិត្តភ័ក្ដិថាលោកលេងបាល់មិនកើត គ្មានអនាគតនិងបាល់ទាត់នោះឡើយ។ ចំណែករឿងសំខាន់មួយទៀតគឺមានការមាក់ងាយពីលោកគ្រូបង្វឹកម្នាក់ថា” … លេងបាល់អីចឹង គ្មានលទ្ធភាពអីទៅជាប់ជម្រើសជាតិនោះទេ…”។ រឿងទំាងនេះហើយទើបធ្វើឱ្យលោក មាស ចាន់ណា ដាក់ចិត្តខិតខំជម្នះចិត្តអ្នកសើចចំអកទាំងនោះ។

បទពិសោធន៍លេងបាល់ទាត់ *ក្នុងឈុតជម្រើសជាតិ - ក្នុងឆ្នាំ ១៩៩៩ – ២០០៩ ជាជម្រើសជាតិឈុតធំ ដោយធ្លាប់ចូលរួមប្រកួតក្នុងពានរង្វាន់ World Cup Qualify & Tiger Cup។ - ក្នុងឆ្នាំ ២០០១ – ២០០៩ ជាប់ក្នុងឈុត U23 ជម្រើសជាតិ ចូលរួមប្រកួតក្នុងយុទ្ធនាការ Suzuki Cup និង Sea Game។ - ក្នុងឆ្នាំ ១៩៩៩ – ២០០១ ជាប់ក្នុងឈុត U19 ជម្រើសជាតិ ចូលរួមប្រកួតក្នុងពានរង្វាន់ AFF U19។ - ក្នុងឆ្នាំ ១៩៩៧ – ១៩៩៩ ជាប់ក្នុងឈុត U16 ជម្រើសជាតិ ចូលរួមប្រកួតក្នុងពានរង្វាន់ Singapore Cup U16។ - ក្នុងឆ្នាំ ១៩៩២ – ១៩៩៥ ជាប់ក្នុងឈុត U13 ជម្រើសជាតិ។

*ក្នុងក្លិប

លោក មាស ចាន់ណា (ពាក់លេខ៧) កាលនៅជាកីឡាកររបស់ណាហ្គាខប(ក្នុងឆ្នាំ២០០៩)

- ក្នុងឆ្នាំ ២០០១ ដល់ ២០១០ ជាកីឡាកររបស់ក្លិបណាហ្គាខប ដោយធ្លាប់ចូលរួមប្រកួតក្នុងពានរង្វាន់ AFC President’s Cup, Metfone Cambodian League និង Hun Sen Cup។ - ក្នុងឆ្នាំ ១៩៩៨ ដល់ ២០០១ ជាកីឡាកររបស់ក្រុម Navy FC ដែលបានចូលរួមប្រកួតក្នុងពានរង្វាន់ Mobitel Cellcard Cup។ - ក្នុងឆ្នាំ ១៩៩៦ – ១៩៩៧ ជាកីឡាករក្នុងក្រុម Youth Club FC ដោយធ្លាប់ចូលរួមប្រកួតក្នុងពានរង្វាន់ Marlboro Premier League។ - ក្នុងឆ្នាំ ១៩៩៥ – ១៩៩៦ ជាកីឡាកររបស់ក្រុម Toul Svay Prey FC។ - ក្នុងឆ្នាំ ១៩៩២ – ១៩៩៥ ជាកីឡាករនៅក្នុងក្រុម Kirirom FC។

បទពិសោធន៍ធ្វើគ្រូបង្ហាត់បាល់ទាត់ - ចាប់ពីឆ្នាំ ២០០១ ដល់ បច្ចុប្បន្នជាគ្រូបង្វឹករបស់ក្រុមវិទ្យាល័យព្រះយុគន្ធរ។ - ចាប់ពីឆ្នាំ ២០០៨ ដល់ ២០១០ ធ្វើជាគ្រូបង្វឹកក្នុងក្រុម Camintel FC ក្នុងពានរង្វាន់ Football For All Cup។ - ក្នុងឆ្នាំ ២០១២ ធ្វើជាគ្រូបង្វឹកបង្គោលរបស់ក្រុម Asian Youth FC ក្នុងពានរង្វាន់ Soccer League។ - ចាប់ពីឆ្នាំ ២០១១ ដល់ ២០១៤ ជាជំនួយការគ្រូបង្វឹកប្រចាំក្លិបណាហ្គាខប ចូលរួមប្រកួតក្នុងពានរង្វាន់ មិត្តហ្វូនខេមបូឌានលីក និង Hun Sen Cup។ នៅក្លិបនេះ លោកជាជំនួយការរបស់គ្រូបង្វឹកពីររូបគឺ លោក ប្រាក់ សុវណ្ណារ៉ា និង លោក លឹម នួន។

- ក្នុងឆ្នាំ ២០១១ – ២០១២ ជាជំនួយការគ្រូបង្វឹកក្នុងឈុតជម្រើសជាតិ យុវជនក្រោមអាយុ ១៦ ឆ្នាំ (U16) ចូលរួមប្រកួតក្នុងពានរង្វាន់ AFC U16 Championship និង AFF U16។ គ្រានោះ U16 ក្រុមជម្រើសជាតិដឹកនាំដោយលោកគ្រូបង្វឹកសញ្ជាតិជប៉ុន Daisuke Yoshioka ។

លោក មាស ចាន់ណា(ខាងស្ដាំ) ថតរូបជាមួយឈុត U16 ក្រុមជម្រើសជាតិដែលដឹកនាំដោយលោក Daisuke Yoshioka

- ក្នុងឆ្នាំ ២០១១ – ២០១២ ធ្វើជាជំនួយការគ្រូបង្វឹកក្នុងឈុតយុវជនក្រោមអាយុ ២៣ ឆ្នាំក្រុមជម្រើសជាតិ ចូលរួមប្រកួតក្នុងពានរង្វាន់ BIDC Cup 2011 និង ស៊ីហ្គេមលើកទី ២៦ ដែលរៀបចំឡើងនៅប្រទេសឥណ្ឌូណេស៊ី។ កាលនោះគ្រូបង្គោលគឺលោក Lee Tae Hoon ជាជនជាតិកូរ៉េខាងត្បូង។

លោក មាស ចាន់ណា (រាប់ពីស្ដាំទី៣) ក្នុងពេលធ្វើជាជំនួយការរបស់លោក Lee

- ក្នុងឆ្នាំ ២០១២ ជាជំនួយការគ្រូបង្វឹកក្រុមជម្រើសជាតិឈុតធំ ក្នុងយុទ្ធនាការវគ្គជម្រុះក្នុងពានរង្វាន់ AFF Suzuki Cup 2012 ដែលកាលនោះដឹកនាំដោយលោក ហុក សុចិត្រា។

លោក មាស ចាន់ណា(កណ្ដាល) ក្នុងពេលធ្វើជំនួយការរបស់លោក ហុក សុចិត្រា

- ២០១៣ ជាជំនួយការគ្រូបង្វឹកក្រុមជម្រើសជាតិឈុតធំ ក្នុងយុទ្ធនាការវគ្គជម្រុះក្នុងពានរង្វាន់ AFC Challenge Cup 2014 ដោយលោក ប្រាក់ សុវណ្ណារ៉ា ជាគ្រូបង្កោល និង ជំនួយការលោក Lee Tae Hoon គ្រូបង្វឹកក្រុម U-23 កម្ពុជាធ្វើជាម្ចាស់ផ្ទះប្រកួតពានរង្វាន់ BIDC Cup 2013 និង ចេញទៅប្រកួតស៊ីហ្គេម នៅមីយ៉ាន់ម៉ា។

- ២០១៤ ក្រៅពីធ្វើជាជំនួយការនៅក្លិបណាហ្គាខប លោកក៏បានជាប់ឈ្មោះធ្វើជាជំនួយការគ្រូបង្វឹកជម្រើសជាតិកម្ពុជា លោក Lee Tae Hoon ក្នុងពានរង្វាន់ 2014 Hassanal Bolkiah Trophy នៅប្រ៊ុយណេ និងវគ្គជម្រុះពានរង្វាន់ AFF Suzuki Cup 2014 នៅប្រទេសឡាវ។

លោក មាស ចាន់ណា (កណ្ដាល) ក្នុងពេលជាជំនួយការរបស់លោក ប្រាក់ សុវណ្ណារ៉ា

ស្នាដៃដែលធ្លាប់ទទួលបាន ដឹកនាំក្រុមវិទ្យាល័យព្រះយុគន្ធរឈ្នះជើងឯកពានរង្វាន់បាល់ទាត់សិស្សមធ្យមសិក្សាទូទាំងប្រទេស ២ លើក ក្នុងឆ្នាំសិក្សា ២០១០ – ២០១១ និង ២០១១ – ២០១២។ នៅឆ្នាំ ២០១២ – ២០១៣ បានត្រឹមជើងឯករង ក្រោយចាញ់ក្រុមខេត្តកំពង់ចាម ទាំងប្រផុតប្រផើយ ២ – ១។ មិនតែប៉ុណ្ណោះធ្លាប់ជួយឱ្យវិទ្យាល័យមួយនេះឈ្នះជើងឯកទូទាំងរាជធានីភ្នំពេញចំនួន ៥ លើកជាប់គ្នា តាំងពីឆ្នាំ២០០៩ មក។

លោក មាស ចាន់ណា(ស្ដាំ) ក្រោយជួយឲ្យក្រុមវិទ្យាល័យព្រះយុគន្ធរឈ្នះពានវិទ្យាល័យ ក្នុងឆ្នាំ ២០១២

កាលនៅជាកីឡាករ លោក ធ្លាប់ជួយណាហ្គាខបលើកពានរង្វាន់លីកនៅកម្ពុជាចំនួន ២ លើកគឺក្នុងរដូវកាល ២០០៧ និង ២០០៩ និង ជើងឯករងក្នុងពានរង្វាន់ Hun Sen Cup ចំនួន ២ លើកគឺក្នុងរដូវកាល ២០០៧ និង ២០០៩។

លោក មាស ចាន់ណា លើកពាន ក្រោយ ណាហ្គាឈ្នះជើងឯក Hun Sen Cup 2013

ពេលធ្វើជាជំនួយការគ្រូបង្វឹកណាហ្គាខបលោកក៏ជាផ្នែកមួយជួយឱ្យណាហ្គាខបក្លាយជាក្រុមជើងឯករងក្នុងពានរង្វាន់លីកកំពូលកម្ពុជា ចំនួន ២ លើកគឺ ក្នុងរដូវកាល ២០១១ និង ២០១២។ ចំណែកពានរង្វាន់ Hun Sen Cup ឈ្នះជើងឯករងនៅឆ្នាំ ២០១២ និង ជាម្ចាស់ជើងឯកឆ្នាំ ២០១៣។

ពាក្យពេចន៍ផ្ញើទៅយុវជនជំនាន់ក្រោយ ក្នុងនាមជារៀមច្បងមួយរូប លោក មាស ចាន់ណា សូមផ្ដាំផ្ញើទៅយុវជនស្រករក្រោយ សូមជៀសឆ្ងាយពីគ្រឿងញៀន ឬ អំពើអបាយមុខនៅក្នុងសង្គម ដោយងាកទៅខិតខំសិក្សាដើម្បីធ្វើសសរទ្រូងដ៏រឹងមាំសម្រាប់ប្រទេសជាតិ។ មិនភ្លេចដែរ ប្រសិនបើទំនេរពីការសិក្សាត្រូវនាំគ្នាលេងកីឡាដើម្បីសុខភាព មិត្តភាព ក៏ដូចជា ជួយលើកស្ទួយកីឡាជាតិផង។

បំណងប្រាថ្នាថ្ងៃអនាគត ដោយលោក មាស ចាន់ណា ដើរនៅលើវិថីបាល់ទាត់កាន់តែវែងឆ្ងាយមកហើយ អនាគតរបស់លោកមិនចាកគន្លងពីកីឡាមួយនេះទេ។ គោលបំណងសំខាន់របស់លោកគឺចង់ធ្វើជាគ្រូបង្គោលក្រុមកីឡាបាល់ទាត់ជម្រើសជាតិនៅថ្ងៃណាមួយ។ មួយវិញទៀតគឺចង់សិក្សាឱ្យចប់វគ្គគ្រូបង្វឹកកម្រិត Pro License។ ប្រសិនបើចាស់ទៅប្រើកម្លាំងលែងបាន ចង់ធ្វើជាគ្រូឧទ្ទេសរបស់សហព័ន្ធកីឡាបាល់ទាត់កម្ពុជា(FFC) ឬ គ្រូឧទ្ទេសរបស់សហព័ន្ធកីឡាបាល់ទាត់ទ្វីបអាស៊ី (AFC) ឬ គ្រូឧទ្ទេសរបស់សហព័ន្ធកីឡាបាល់ទាត់អន្តរជាតិ (FIFA)៕