Aston Villa ចាប់​ផ្ដើម​លក់​ជា​បន្តបន្ទាប់​ហើយ​គិត​​មក​ដល់​ពេលនេះ​ពួក​គេ​បាន​លក់​ Jhon Duran ទៅឲ្យ​ក្លិប​ Al Nassr ក្នុង​តម្លៃ​ខ្ពស់​រហូត​ដល់​ទៅ​៧០​លាន​អឺរ៉ូ​ ​ដែល​តម្លៃ​នេះ​ក្លិប​ទាំង​ពីរ​បាន​ព្រម​ព្រៀង​គ្នា​អស់​ហើយ​​។

ការ​ពិនិត្យ​សុខភាព នឹង​ធ្វើ​ឡើង​នៅ​ថ្ងៃ​ព្រហស្បតិ៍​សប្ដាហ៍​នេះ​​​នៅ​ទឹក​ដី​អារ៉ាប៊ីសាអ៊ូឌីត ។ កីឡាករ​ជម្រើស​ជាតិ​កូឡុំប៊ី​រូប​នេះ​លេង​តំណែង​ជា​ខ្សែ​ប្រយុទ្ធ​​ ដែល​មាន​វ័យ​ទើប​តែ​២១​ឆ្នាំ​ប៉ុណ្ណោះ​។ ការ​ផ្ទេរ​នេះ​ស្ទើរ​តែ​​មិន​គួរ​ឲ្យ​ជឿ​ ដ្បិត​កីឡាករ​​ដែល​កំពុង​លេង​បាន​ល្អ និង​បង្ហាញ​សមត្ថភាព​នៅ​ទឹក​ដី​អង់គ្លេស​ បែរ​ជា​សម្រេច​ចិត្ត​ទៅ​កាន់​ទឹក​ដី​អារ៉ាប៊ីសាអ៊ូឌីត​។

​​ Jhon Duran បាន​ចូលរួម​ជាមួយ Aston Villa កាល​ឆ្នាំ​២០២៣ គិត​មក​ដល់​ពេលនេះ​គេ​លេង​បាន​​៥៥​​ប្រកួត​ហើយ​ក្នុង​នាម​​ជា​ខ្សែ​ប្រយុទ្ធ​ស្ថិត​​ក្នុង​ជម្រើស​បម្រុង​​ បន្ទាប់​ពី​ខ្សែ​ប្រយុទ្ធ O. Watkins គេ​អាច​រក​បាន​១២​គ្រាប់។ ខណៈ​រដូវ​កាល​នេះ​គេ​ហាក់​ចាប់​ផ្ដើម​ធ្វើ​បាន​ល្អ​ដោយ​​ចូលលេង​បាន​២០​ប្រកួត​ និង​រក​បាន​៧​គ្រាប់​ផង​ដែរ​៕ ​