Evra សរសើរអង្គរវត្ត និងចូលចិត្តម្ហូបខ្មែរ ហើយអំពាវនាវភ្ញៀវទេសចរទស្សនាកម្ពុជា

2024-09-17 12:20:34
បាល់ទាត់

2024-09-17 12:20:34
ចំនួនមតិ 0 | ចំនួនចែករំលែក 0

ចន្លោះមិនឃើញ

វីរបុរសក្លឹប Manchester United អតីតកីឡាករ Patrice Evra បានសរសើរពីសម្រស់ប្រាសាទអង្គរវត្ត និងបញ្ជាក់ថាចូលចិត្តម្ហូបខ្មែរ។ អតីតខ្សែការពារក៏បានអំពាវនាវភ្ញៀវទេសចរទស្សនាកម្ពុជា។

ប្រភពរូបភាព៖ Gumball 3000

ក្នុងបទសម្ភាសន៍ខ្លីមួយ Evra បានថ្លែងប្រាប់សារព័ត៌មានក្នុងស្រុក និងបរទេសមួយចំនួននាវេលាថ្ងៃនេះថា រូបគេសប្បាយចិត្តដែលបានទស្សនាប្រាសាទអង្គរវត្ត ហើយកោតសរសើរថាប្រាសាទអង្គរវត្តគឺជាប្រាសាទដែលស្អាត។ អតីតកីឡាករបិសាចក្រហមរូបនេះ បានបន្តទៀតថា រូបគេចូលចិត្តម្ហូបខ្មែរ ម្ហូបខ្មែរមានរសជាតិឆ្ងាញ់។ បន្ថែមពីលើនេះ Evra បានលើកទឹកចិត្តភ្ញៀវទេសចរទស្សនាកម្ពុជា។

Evra មានវត្តមាននៅកម្ពុជា ពីថ្ងៃទី ១៥ ដល់ ១៧ ខែកញ្ញា ឆ្នាំ២០២៤ នេះ ដោយអតីតកីឡាករចូលរួមកម្មវិធី Gumball 3000 x Chip Mong។

Evra គឺជាវីរបុរសរបស់ក្លឹបបិសាចក្រហម ដោយរូបគេបានរួមចំណែកជួយក្លឹបលើកពានធំៗជាច្រើន។ អតីតខ្សែស្លាបឆ្វេងរូបនេះ ធ្លាប់លេងឲ្យក្លឹប Manchester United ពីឆ្នាំ ២០០៥ ដល់ឆ្នាំ ២០១៤ ដោយលេងសរុប ៣៧៩ ប្រកួត និងស៊ុតចូល ១០ គ្រាប់។ ក្រោយចេញពីក្លឹប អតីតកីឡាករក៏បានទៅចូលរួមជាមួយ Juventus រយៈពេល ៣ ឆ្នាំ រួចក៏ផ្លាស់ទៅលេងនៅ Marseille ជាង ២ រដូវកាល។ ក្លឹបចុងក្រោយរបស់ Evra គឺ West Ham United ក្នុងរដូវកាល ២០១៧/២០១៨។ និយាយពីបាល់ទាត់ជម្រើសជាតិវិញ Evra ធ្លាប់ដើរតួនាទីជាកីឡាករសំខាន់មួយឲ្យក្រុមជម្រើសជាតិបារាំងពីឆ្នាំ ២០០៤ ដល់ ២០១៧ ក្នុងនោះអតីតកីឡាករក៏ធ្លាប់បានធ្វើជាប្រធានក្រុមផងដែរ។

នៅឆ្នាំ ២០១៨ Evra សម្រេចចិត្តចូលនិវត្តន៍ពីវិស័យបាល់ទាត់អាជីព។

បច្ចុប្បន្នមានវ័យ ៤៣ ឆ្នាំ Patrice Evra គឺជាអ្នកអត្ថាធិប្បាយបាល់ទាត់ល្បីឈ្មោះមួយក្នុងកម្មវិធីបាល់ទាត់ធំៗ។ អតីតកីឡាករក៏ជាម្ចាស់ភាគហ៊ុនមួយផ្នែករបស់ក្លឹប Estrela ដែលជាក្លឹបមួយកំពុងលេងនៅលីគកំពូលព័រទុយហ្គាល់៕