ប្រធានអូឡាំពិកអង់គ្លេសសង្ឃឹមថាអូឡាំពិកនៅ USA 2028 អង់គ្លេសនឹងអាចបង្ហាញខ្លួនវិញ

2024-08-13 06:04:00
បាល់ទាត់

2024-08-13 06:04:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានអូឡាំពិករបស់ចក្រភពអង់គ្លេស ដែលហៅកាត់ថា BOA កំពុងតែសិក្សាលើការរៀបចំនិងដាក់គោលដៅឲ្យអង់គ្លេសរបស់លោកធ្វើយ៉ាងណាអាចមានមុខប្រកួតប្រជែងក្នុងព្រឹត្តិការណ៍អូឡាំពិកនៅ USA 2028 ឡើងវិញកុំឲ្យដូចអូឡាំពិកនៅ Paris មិនបានឡើងមកជុំចុងក្រោយទាំងបុរស និងនារី។

សម្រាប់បាល់ទាត់បុរសរបស់អង់គ្លេសបង្ហាញមុខចុងក្រោយបង្អស់កាលឆ្នាំ២០១២ ដែលកាលនោះអង់គ្លេសធ្វើសហម្ចាស់ផ្ទះជាមួយស្កុតឡែន វេល និងអៀរឡង់ខាងជើង។ កាលឆ្នាំនោះអង់គ្លេសធ្លាក់ត្រឹមវគ្គ៨ក្រុងចុងក្រោយក្រោមថ្វីជើងកូរ៉េខាងត្បូង ដោយបាល់ប៉េណាល់ទី ៥-៤ បន្ទាប់ពីស្មើគ្នា១ទល់១។

យ៉ាងណាឆ្នាំ២០១២មកដល់អូឡាំពិកក្រោយៗគេមិនដែលឃើញមុខក្រុមជម្រើសជាតិអង់គ្លេសក្រោមអាយុ២៣ឆ្នាំបុរសបានឡើងមកលេងព្រឹត្តិការណ៍អូឡាំពិកជុំចុងក្រោយទេ ដែលភាគច្រើនគេឃើញតែបារាំង និងអេស្ប៉ាញ ឬអាល្លឺម៉ង់ជាដើម។ ទន្ទឹមជាមួយគ្នានោះបាល់ទាត់នារីអង់គ្លេសវិញប្រធានអូឡាំពិករបស់អង់គ្លេសលោក Andy Anson បានកត់សម្គាល់ឃើញថា មានកម្រិតល្អហើយ ហើយក៏តែងមានមុខឡើងមកដល់ជុំចុងក្រោយនៃអូឡាំពិកជាញឹកញាប់ ដ្បិតតែឆ្នាំនេះអូឡាំពិកនៅបារាំងមិនបានឡើងមកក៏ដោយ។

ប្រធានអូឡាំពិកដដែលបន្ថែមទៀតថា សម្រាប់ពេល៤ឆ្នាំក្នុងការអភិវឌ្ឍន៍ខ្លួនដើម្បីតែបានឡើងមកកាន់ជុំចុងក្រោយនៃអូឡាំពិកលោកគិតថាពិតជាអាចធ្វើបាន។

អូឡាំពិក២០២៨ នៅទីក្រុង Los Angeles នៃ USA នឹងចាប់ផ្ដើមចន្លោះពីថ្ងៃទី១៤ដល់ថ្ងៃទី៣០ ខែកក្កដា ដែលជាពេលទើបហ្នឹងបញ្ចប់ EURO 2028 នៅ Wembley និងជាពេលវេលាប្រហែលជាពីរទៅបីសប្ដាហ៍មុនពេលលីគរដូវកាលថ្មីចាប់ផ្ដើម៕

ប្រភព៖ BBC Daro Ly