កីឡាករបាល់ទះឆ្វេង និងដេញបាល់លឿនដ៏ល្អ Yuji Nishida និង Kentaro បានប្រកាសសម្រាក (ចូលនិវត្តន៍) ពីក្រុមជម្រើសជាតិជប៉ុនហើយកាលពីពេលថ្មីៗនេះ ខណៈគ្រូបង្វឹកសញ្ជាតិបារាំង Philippe Blain ក៏បានប្រកាសលាឈប់ពីគ្រូបង្វឹកជម្រើសជាតិជប៉ុនដូចគ្នា។ ការសម្រេចចិត្តនេះធ្វើឡើង ក្រោយពួកគេដឹកនាំនិង​ប្រកួតចាញ់ក្រុមជម្រើសជាតិអ៊ីតាលីក្នុងវគ្គ៨ក្រុមចុងក្រោយនៃពានរង្វាន់កីឡាអូឡាំពិចនាទីក្រុងប៉ារីសឆ្នាំ២០២៤។

ការសម្រេចចិត្តសម្រាកពីជម្រើសជាតិជប៉ុនពីសំណាកកីឡាករឆ្នើម Nishida, Kentaro Takahashi និងគ្រូបង្វឹកដ៏ល្អ​ Blain បានធ្វើឲ្យអ្នកគាំទ្រជប៉ុនជាច្រើនបង្ហាញការសោកស្ដាយ ដ្បិតពួកគេជាធនធានដ៏សំខាន់ក្នុងការជួយឲ្យក្រុមបាល់ទះជប៉ុនផ្នែកបុរសឈ្នះ​ជើងឯករងពានរង្វាន់ Volleyball Nation League ឆ្នាំ២០២៤ និងជួយឲ្យជប៉ុនឡើងដល់វគ្គ៨ក្រុមចុងក្រោយនៃពានរង្វាន់កីឡាអូឡាំពិចដ៏ធំ​នាទីក្រុងប៉ារីសឆ្នាំ២០២៤។

ពានរង្វាន់ VNL ដែលរៀបចំឡើងនៅទីក្រុង Łódź ប្រទេសប៉ូឡូញឆ្នាំ​២០២៤​ថ្មីៗនេះ​ ជប៉ុន បានចាញ់ក្រោមដៃជើងខ្លាំងមាន់គកបារាំង ៣ សិតទល់១សិតនៅវគ្គផ្ដាច់ព្រ័ត្រ។ ដោយឡែកពានរង្វាន់កីឡាអូឡាំពិច ក្រុមសាំម៉ូរ៉ៃជប៉ុនត្រូវឈ្នះអ៊ីតាលី ប៉ុន្តែក្រុមអាស៊ីដ៏ឆ្នើមមួយនេះបានឡាក់ប៉ុន្មានគ្រាប់នៅ៣សិតចុងក្រោយ។

សិតទីមួយជប៉ុនឈ្នះអ៊ីតាលី ២៥-២០ សិតទីពីរ ជប៉ុនឈ្នះអ៊ីតាលី ២៥-២៣ សិតទីបី ជប៉ុនចាញ់ ២៧-២៥ សិតទីបួន ជប៉ុនចាញ់អ៊ីតាលី ២៦-២៤ និងសិតទីប្រាំ ជប៉ុនចាញ់អ៊ីតាលី ១៧-១៥។

មុនចូលនិវត្តន៍តើ Yuji Nishida, Kentaro Takahashi និងលោក Philipe Blain បាន​ជួយឲ្យជប៉ុនទទួលបានពានរង្វាន់​អ្វីខ្លះ?

Nishida កើតនៅថ្ងៃទី៣០ ខែមករា ឆ្នាំ២០០០ ក្នុងទីក្រុង Mie ប្រទេសជប៉ុន។ គេមានកម្ពស់ ១,៨៧ម៉ែត្រ ទម្ងន់ ៨៧គីឡូក្រាម លេងក្នុងតួនាទីស្មាត់ឆ្វេង Opposit Spiker ហើយបច្ចុប្បន្នគេកំពុងលេងឲ្យក្លឹបជប៉ុន Panasonic Panthers ចាប់តាំងពីឆ្នាំ២០២៣មក។ ក្លឹបដែលគេធ្លាប់លេងឲ្យមានដូចជា JTEKE Sting ឆ្នាំ ២០១៧-២០២១ ក្លឹបអ៊ីតាលី Volley Callipo ឆ្នាំ២០២១-២០២២ ក្លឹបជប៉ុន JTEKE Sting ឆ្នាំ២០២២-២០២៣។

កីឡាករពាក់អាវលេខ១ជាប់ជម្រើសជាតិជប៉ុនតាំងពីឆ្នាំ២០១៨ រហូតដល់បច្ចុប្បន្ន។ គេធ្លាប់ជួយឲ្យជប៉ុនឈ្នះមេដាយប្រាក់ពាន FIVB Nations League ឬ VNL ឆ្នាំ២០២៤ នៅទីក្រុង Lodz ប្រទេសប៉ូឡូញ ឈ្នះមេដាយសំរឹទ្ធិ VNL ក្នុងទីក្រុង Gdansk ឆ្នាំ២០២៣ប្រទេសប៉ូឡូញ ឈ្នះមេដាយមាសពានរង្វាន់ Asian Championship ក្នុងទីក្រុង Urmia ប្រទេសអ៊ីរ៉ង់ឆ្នាំ២០២៣ ឈ្នះមេដាយសំរឹទ្ធិ Asian Championship ក្នុងទីក្រុង Tehran ឆ្នាំ២០១៩ និងឈ្នះមេដាយមាសពានរង្វាន់ Asian Youth Chamlionship ក្នុងទីក្រុង Naypyidaw ប្រទេសមីយ៉ានម៉ា ឆ្នាំ២០១៧។

ចំណែកកីឡាករ Kentaro Takahashi ជំនាញដេញបាល់លឿន Middle Blocker កើតនៅទីក្រុង Yamagata ប្រទេសជប៉ុនក្នុងឆ្នាំ ១៩៩៥ បច្ចុប្បន្នគេមានអាយុ ២៩ឆ្នាំ កម្ពស់ ២០៣សង់ទីម៉ែត្រ ទម្ងន់៩៣គីឡូក្រាម។ កីឡាកររូបនេះអាចលោតម៉ាត់ផ្ដាច់បានកម្ពស់ ៣៥៥សង់ទីម៉ែត្រ និងលោតធ្វើរនាំងបានកម្ពស់ ៣៣០សង់ទីម៉ែត្រ។ គេពាក់អាវលេខ១០ក្នុងក្រុមជម្រើសជាតិជប៉ុន។

បច្ចុប្បន្នគេលេងឲ្យក្លឹបអាជីពជប៉ុន Toray Arrows ពោលចាប់តាំងពីឆ្នាំ២០១៦មក។ គេជាប់ជម្រើសជាតិជប៉ុន Japan U-19 National Team ឆ្នាំ២០១២-២០១៣ ជាប់ U21 ឆ្នាំ២០១៣ និងជាប់ឈុតធំឆ្នាំ២០១៤ រហូតដល់បច្ចុប្បន្ន។

គេជួយឲ្យជប៉ុនឈ្នះមេដាយប្រាក់ពានរង្វាន VNL ឆ្នាំ២០២៤ក្នុងទីក្រុង Lodz ប្រទេសប៉ូឡូញ ឈ្នះមេដាយសំរឹទ្ធិ VNL ក្នុងទីក្រុង Gdansk ប្រទេសប៉ូឡូញឆ្នាំ២០២៣ ឈ្នះមេដាយសំរឹទ្ធ Asian Youth Championship ក្នុងទី Teheran ប្រទេសអ៊ីរ៉ង់ឆ្នាំ២០១២ ឈ្នះមេដាយមាសពាន Asian Championship ក្នុងទីក្រុង Gresik ប្រទេសឥណ្ឌូណេស៊ី ឈ្នះមេដាយមាស Asian Championship ក្នុងទីក្រុង Urmia ប្រទេសអ៊ីរ៉ង់ឆ្នាំ២០២៣ និងឈ្នះមេដាយសំរឹទ្ធិពានរង្វាន់ Asian Championship ក្នុងទីក្រុង Teheran ប្រទេសអ៊ីរ៉ង់ឆ្នាំ២០១៩។

ដោយឡែកគ្រូបង្វឹកក្រុមជម្រើសជាតិជប៉ុន Philippe Blain ជាអតីតស្មាត់ស្ដាំ Outside Hitter កើតនៅទីក្រុង Montpellier ប្រទេសបារាំងដែលបច្ចុប្បន្នលោកមានវ័យ៦៤ឆ្នាំ។ បច្ចុប្បន្នលោកកំពុងបង្វឹកក្រុមបាល់ទះអាជីពកូរ៉េខាងត្បូង Cheonan Hyundai Capital Skywalkers។

លោក Blain ធ្លាប់បានដឹកនាំក្រុមជម្រើសជាតិជប៉ុនតាំងពីឆ្នាំ១៩៨០ ដល់ឆ្នាំ១៩៩១ ពោលបានចំនួន ៣៤០ប្រកួត។ មិននិយាយពីតួនាទីលោកក្នុងនាមជាគ្រូជម្រើសជាតិបារាំង ប៉ុន្តែក្នុងនាមជាគ្រូបង្គោលក្រុមជម្រើសជាតិជប៉ុន លោក Blain បានដឹកនាំក្រុមឈ្នះមេដាយប្រាក់ពានរង្វាន់ VNL ក្នុងទីក្រុង Lodz ប្រទេសប៉ូឡូញឆ្នាំ២០២៤ថ្មីៗនេះ ឈ្នះមេដាយសំរឹទ្ធិពាន VLN ក្រុងទីក្រុង Gdansk ឆ្នាំ២០២៣ និងឈ្នះមេដាយមាសពានរង្វាន់ AVC Asian Championship ប្រទេសអ៊ីរ៉ង់ឆ្នាំ២០២៣។

មិនខុសពី Yuji Nishida និង Kentaro Takahashi ទេលោក Blain ក៏បានលាឈប់ពីតួនាទីគ្រូបង្គោលជម្រើសជាតិជប៉ុន ក្រោយដឹកនាំធ្លាក់ត្រឹមវគ្គ៨ក្រុមចុងក្រោយនៃពានរង្វាន់កីឡាអូឡាំពិចទីក្រុងប៉ារីសឆ្នាំ២០២៤ថ្មីៗនេះ៕