ថ្មីៗនេះផេកផ្លូវការរបស់អតីតកីឡាករបាល់ទះជម្រើសជាតិវៀតណាម Tran Duc Hanh បានបង្ហោះថាកីឡាករសំបូរប្រជាប្រិយភាព ជុក សោភា ហៅឥន្ទ្រីពិឃាដឌូកនឹងទៅចូលរួមប្រកួតពានរង្វាន់ Ha Tinh Police Men's Tournament 2024 នៅ​ប្រទេស​វៀតណាមក្នុងពេលឆាប់ៗខាងមុខនេះ។

ក្រោយ​ឃើញ​ព័ត៌មានខាងលើ​​អ្នកគាំទ្របាល់ទះនៅកម្ពុជាបាន​ដាក់​ការចាប់អារម្មណ៍និងបានសួរដេញដោលចង់ដឹង ដោយ​អ្នកខ្លះសួរថាឌូកទៅលេងលីគវៀតណាមឬទៅលេងពាន​ថ្នាក់​ខេត្ត​? ព័ត៌មាននេះ​ហាក់មិនបានបង្ហាញឲ្យបានគ្រប់ជ្រុងជ្រោយឡើយ។ ទោះបីជា​យ៉ាងណា​ដើម្បីស្រាយចម្ងល់ឱ្យ​ប្រិយមិត្ត​បាន​ជ្រាប​ Sabay បានសាកសួរឌូកពីព័ត៌មាននេះ។

បើតាមការឲ្យដឹងពីឌូកខាងភាគីវៀតណាម ពិត​ជា​បាន​ទាក់ទង​មក​រូប​គេដោយ​ផ្ទាល់​ ហើយ​ខាង​វៀតណាម​ចង់បានកីឡាករ២រូបទៅលេងពាន​ខេត្ត​ Ha Tinh មួយ​នេះ​ដោយក្នុងនោះមានរូបគេផ្ទាល់និងកូននាគស្លាបហង្ស ធី ម៉េង។ ប៉ុន្តែដោយសារឌូកជាប់រវល់ការងារនិងហ្វឹកហាត់នៅក្លឹបផងនោះ គេក៏បានសម្រេចចិត្តសុំមិនចូលរួម ចំណែក ធី ម៉េងហួង ក៏ជាប់ភារកិច្ចហ្វឹកហាត់ជាមួយក្រុមបាល់ទះជម្រើសជាតិកម្ពុជាដែរ។

បើនិយាយឱ្យ​ស្រួល​ស្ដាប់​នេះ​ជា​ពាន​ក្រៅ​ផ្លូវ​ការ​ក្នុង​ខេត្ត​ Ha Tinh ហើយ​ខាង Sponsor វៀតណាម​ចង់​ទិញ​កីឡាករ​កម្ពុជា​ឱ្យ​ជួយ​លេង ដើម្បី​ប្រកួត​ប្រជែង​ជាមួយ​ក្រុម​ផ្សេងៗ​ទៀតដូច​ឌូក ម៉េងហួង ម៉េងឡាយ ស្មាត់រាជ និង​យុនស្រែស្រែ​ទៅ​លេង​ដូច​លើក​មុន​ដែរ។

ចុះហេតុអ្វីបានជាផេករបស់កីឡាករល្បីឈ្មោះវៀតណាមបង្ហោះមានភ្ជាប់រូបឥន្ទ្រីពិឃាដឌូកជាមួយកីឡាករបរទេសបួនរូបផ្សេងទៀតនៅលើ Poster នៃព្រឹត្តិការណ៍នេះ? ត្រង់ចំណុចនេះឌូកបានបង្ហើបថា ប្រហែលជាខាងគេច្រឡំកីឡាករកម្ពុជារូបណាម្នាក់ហើយ សម្រាប់រូបគេពិតជាមិនមានវត្តមានក្នុងការប្រកួតបាល់ទះថ្នាក់ខេត្ត Ha Tinh មួយនេះទេ​។

ផេករបស់កីឡាករវៀតណាម Tran Duc Hanh ដែល​ប្រិយមិត្តស្គាល់ថា លីមីនហូវៀតណាម (Lee Min-Ho Vietnam) បានសរសេរនៅលើហ្វេសប៊ុកផេក Tran Duc Hanh Volleyball របស់គេថាកីឡករបរទេសបួន៥រូបនឹងចូលរួមក្នុងប្រកួតពានរង្វាន់ថ្នាក់ខេត្តមួយនេះដោយក្នុងនោះក៏មានស្មាត់ឌូកម្នាក់ផងដែរ ខណៈបួនរូបទៀតមានកីឡាករប្រេស៊ីល Evandro Diaz កីឡាករថៃ T. THaweerat កីឡាករឥណ្ដូណេស៊ី Fahan Halim និងកីឡាករថៃ Kot Kittithad ខណៈការប្រកួតមានរយៈពេល ៤ ថ្ងៃចាប់ពីថ្ងៃទី១ ដល់ថ្ងៃទី ៤ ខែសីហា ឆ្នាំ២០២៤៕