![](http://cdn.sabay.com/cdn/media.sabay.com/media/sabay-news/Sport-News/International-Sports/Freelancer-Sport/football(132)/668e759552f1a_1720612200_medium.png)
- 2024-07-10 11:59:50
- បាល់ទាត់
Messi ធ្លាប់ងូតទឹកឲ្យ Yamal កាលពីនៅតូច
- 2024-07-10 11:59:50
- ចំនួនមតិ 0 | ចំនួនចែករំលែក 0
Messi ធ្លាប់ងូតទឹកឲ្យ Yamal កាលពីនៅតូច
ចន្លោះមិនឃើញ
កាលពីពេលថ្មីៗនេះ មានការផ្ទុះការចាប់អារម្មណ៍លើរូបថតប៉ុន្មានសន្លឹកដែលបង្ហាញពីទិដ្ឋភាពខ្សែប្រយុទ្ធ Lionel Messi ងូតទឹកឲ្យ Lamine Yamal កាលពីនៅក្មេង។
ការចាប់អារម្មណ៍លើបណ្ដាញសង្គមកើតឡើង ក្រោយឪពុករបស់ Yamal បានបង្ហោះរូបថតមួយសន្លឹកដែលបង្ហាញថា Messi កាលនៅវ័យក្មេង ងូតទឹកឲ្យ Yamal នៅក្នុងធុងជ័រពណ៌ខៀវមួយ។ Yamal នាពេលនោះ មានអាយុ ៦ ខែ។
ដំបូងឡើយមតិមួយចំនួនបានលើកឡើងថា រូបថតនេះអាចជារូបថតបង្កើតដោយប្រព័ន្ធកម្មវិធីសិប្បនិម្មិតឆ្លាតវៃ (ហៅកាត់ថា AI)។ ទោះជាយ៉ាងណា នៅពេលរូបថតនេះល្បី លោក Joan Monfort ដែលជាអ្នកថតរូបនេះ ក៏បានចេញមុខបញ្ជាក់ថា រូបថតគឺជារូបថតពិតប្រាកដមែន។
បើតាមលោក Monfort រូបថតនេះ ត្រូវបានថតនៅបន្ទប់ផ្លាស់សម្លៀកបំពាក់កីឡាកររបស់ក្លឹប Barcelonaកាលពីអំឡុងចុងឆ្នាំ ២០០៧។ នៅពេលនោះ Messi មានវ័យ ២០ ឆ្នាំ ឯ Lamine Yamal កាលនោះមានអាយុទើបកន្លះឆ្នាំប៉ុណ្ណោះ។ រូបថតនេះ ត្រូវបានថតឡើងជាផ្នែកមួយនៃកិច្ចសហការគ្នារបស់ក្លឹប Barcelona និង មូលនិធិអង្គការសហប្រជាជាតិដើម្បីកុមារ ហៅកាត់ថា UNICEF ដើម្បីផ្សព្វផ្សាយ និងរៃអង្គាសថវិកាសម្រាប់គម្រោងសប្បុរសធម៌មួយចំនួននាពេលនោះ។
Yamal គឺជាកុមារមួយរូបក្នុងចំណោមកុមារដទៃច្រើនទៀតដែលត្រូវបាន UNICEF ជ្រើសរើសតាមរយៈការចាប់ឆ្នោត ដើម្បីមកធ្វើការថតនៅក្លឹប Barcelona ជាមួយកីឡាកររបស់ក្លឹប ដោយមានការព្រមព្រៀងពីអាណាព្យាបាល។ គាប់ជូនអី Yamal គឺជាកុមារដែលត្រូវថតជាមួយ Messi។ ការផ្ទុះការចាប់អារម្មណ៍ទៅលើរូបថតនេះ គឺមួយផ្នែកដោយសារមនុស្ស និងន័យនៅពីក្រោយរូបថត។
Messi គឺជាវីរបុរសក្លឹប Barcelona និងជាកីឡាករដែលត្រូវបានមជ្ឈដ្ឋានជាច្រើនចាត់ទុកថាជាកីឡាករមួយក្នុងចំណោមកីឡាករបាល់ទាត់ល្អបំផុតលើលោក។ កីឡាករសញ្ជាតិអាហ្សង់ទីនឈ្នះពានកីឡាករឆ្នើម Ballon D'or ដល់ទៅ ៨ ដង ហើយឈ្នះពានជាច្រើនពេញមួយអាជីពរបស់ខ្លួន។ ខ្សែប្រយុទ្ធវ័យ ៣៧ ឆ្នាំ ចាប់ផ្ដើមអាជីពនៅថ្នាលយុវជនក្លឹបអ្នកមានបុណ្យ ហើយលេងឲ្យឈុតធំ Barca ជិត ២០ ឆ្នាំ មុនចេញពីក្លឹបនៅឆ្នាំ ២០២១។ កីឡាករទៅលេងឲ្យក្លឹបបារាំង Paris Saint Germain ពីឆ្នាំ ២០២១ ដល់ឆ្នាំ ២០២៣ មុនមកលេងឲ្យក្លឹបអាមេរិក Inter Miami រហូតដល់ពេលបច្ចុប្បន្ន។
ដោយឡែក ខ្សែស្លាប Lamine Yamal ក៏ជាកីឡាករកើតចេញពីថ្នាលយុវជន Barca ហើយចូលមកលេងឲ្យក្លឹបតាំងពីឆ្នាំ ២០២៣ មក។ ថ្វីបើមានវ័យត្រឹម ១៦ ឆ្នាំំ កីឡាករសញ្ជាតិអេស្ប៉ាញរូបនេះ បានបង្ហាញទម្រង់លេងយ៉ាងល្អ ហើយបានក្លាយជាកីឡាករដ៏បង្គោលមួយឲ្យក្លឹប ដោយនៅរដូវកាល ២០២៣/២០២៤ Yamal បង្ហាញវត្តមានដល់ទៅ ៥០ ប្រកួត និងស៊ុតចូល ៧ ប្រកួត។ លើសពីនេះ ក្នុងកម្មវិធី Euro 2024 កីឡាករ Yamal បន្តបង្ហាញទម្រង់លេងយ៉ាងអស្ចារ្យ។ គិតមកទល់ពេលនេះ ខ្សែស្លាបរូបនេះបញ្ជូនបាល់ ៣ លើក និងស៊ុតចូលមួយគ្រាប់ ហើយជួយអេស្ប៉ាញឡើងទៅវគ្គផ្ដាច់ព្រ័ត្រ។ គ្រាប់បាល់ដែល Yamal ស៊ុតចូលក្រុមជម្រើសជាតិបារាំងក្នុងវគ្គ Semi Final នោះ គឺជាគ្រាប់បាល់ដែលធ្វើឲ្យ Yamal ក្លាយជាកីឡាករក្មេងបំផុតក្នុងការស៊ុតបញ្ចូលទីក្នុងប្រវត្តិសាស្ត្រព្រឹត្តិការណ៍ Euro៕