​​ខ្សែ​បម្រើ​ប្រយុទ្ធ​ឆ្នើម​អតីត​របស់​មេឃ​ខៀវ Manchester City និង តោ​ខៀវ​ Chelsea ​​គឺ​កីឡាករ Cole Palmer រដូវ​កាល​​នេះ​គេ​រក​បាន​រហូត​ដល់​ទៅ​៤២​គ្រាប់​​ ប៉ុន្តែ​បើ​និយាយ​ពី​ការ​បង្ហាញ​ខ្លួន​នៅ ERUO 2024 ឲ្យ​ក្រុម​ជម្រើស​ជាតិ​​អង់គ្លេស​វិញ​គឺ​មិន​ទាន់​បាន​​​សូម្បី​១​វិនាទី​ឡើយ​។

​វា​ជា​រឿង​មួយ​ដែល​គ្រប់​គ្នា​ស្ទើរ​មិន​គួរ​ឲ្យ​ជឿ​ដ្បិត​ថា ជា​កីឡាករ​ល្អ​ម្នាក់​ និង​ជា​អ្នក​ដែល​​រក​បាន​​គ្រាប់​បាល់​​ច្រើន​ជាង​គេ​នៅ​ក្លឹប​​ ប៉ុន្តែ​មិន​ទាន់​ទទួល​បាន​ឱកាស​បង្ហាញ​សមត្ថភាព​ឲ្យ​ក្រុម​ជម្រើស​ជាតិ​ខ្លួន​ទៅ​វិញ​។ ​Cole Palmer ​ត្រូវ​បាន​គេ​មើល​ឃើញ​ថា ជា​កីឡាករ​​ម្នាក់​តែង​តែ​បង្កើត​ឱកាស​ និង​បញ្ជូន​បាល់​ឲ្យ​មិត្ត​រួម​ក្រុម​រក​គ្រាប់​ ហើយ​គេ​ក៏​​ជា​អ្នក​នាំ​លេង​នៅ​តំបន់​ប្រយុទ្ធ​ល្អ​ម្នាក់ ព្រម​ទាំង​​ក៏​ជា​​​ចំណែក​មួយ​ដ៏​សំខាន់​ក្នុង​ការ​ជួយ Chelsea ឲ្យ​ងើប​ឡើង​ពី​​តំបន់​កណ្ដាល​តារាង​នៅ​ English Premier League 2023-2024 ​មក​កាន់​លេខ​៦​វិញ​ផង​ដែរ​។

​​បើ​និយាយ​ពី​នៅ EPL វិញ​​រដូវ​កាល​នេះ Cole Palmer ​ជា​​អ្នក​រក​បាន​គ្រាប់​បាល់​ច្រើន​ជាង​គេ​ទី​២ ​គឺ​រក​បាន​២២​គ្រាប់​ បន្ទាប់​ពី​ខ្សែ​ប្រយុទ្ធ​ល្បឿន​លឿន​​ និង​មាឌ​ធំ​របស់​មេឃ​ខៀវ​ Manchester City គឺ​ E. Haaland ដែល​រក​បាន​២៧​គ្រាប់​។ យ៉ាង​ណា​ក្រុម​ជម្រើស​ជាតិ​​អង់គ្លេស​ស្ថិត​ក្រោម​ការ​ដឹក​នាំ​របស់​លោក​ Gareth Southgate ឆ្លង​កាត់​ពីរ​​ប្រកួត​​មក​នេះ​ ពោល​​យក​ឈ្នះ ស៊ែប ១-០ និង​លេង​​​ស្មើ​ ដាណឺម៉ាក​យប់​មិញ​ ១ទល់ ១ មិន​បាន​ដាក់ ​ខ្សែ​បម្រើ​របស់ Chelsea ម្នាក់​នេះ​ឲ្យ​លេង​សូម្បី​១​វិនាទី។

ការ​រក​បាន​៤២​គ្រាប់​រដូវ​កាល​នេះ​របស់ Cole Palmer ឲ្យ​​ Chelsea ​នេះ​ពោល​គឺ​ច្រើន​ជាង​កីឡាករ​ណា​ណា​ទាំង​អស់​នៅក្នុង​ចំណោម​​លីគ​បាល់ទាត់​​ធំ​ៗ​​ទាំង​៥​នៅ​តំបន់​អឺរ៉ុប​នាម​ជា​ខ្សែបម្រើ​៕ ​​​​​​​​​