ប្រធានក្រុមបាល់ទាត់ CFSS បញ្ជាក់ពីវត្ដមានសម្ដេចតេជោក្នុងព្រឹត្ដិការណ៍បាល់ទាត់មិត្ដភាពសប្បុរសធម៌

2024-04-29 03:33:24
បាល់ទាត់

2024-04-29 03:33:24
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតត្រឹមថ្ងៃទី២៩ ខែមេសា ឆ្នាំ២០២៤ នេះ គឺនៅសល់តែ ៣ថ្ងៃទៀតប៉ុណ្ណោះ ព្រឹត្ដិការណ៍កីឡាបាល់ទាត់មិត្ដភាពសប្បុរសធម៌ នឹងចាប់ផ្ដើមហើយនៅពហុកីឡដ្ឋានជាតិអូឡាំពិក។

ដំណឹងស្ដីពីវត្ដមានរបស់សម្ដេចតេជោ ហ៊ុន សែន ក្នុងព្រឹត្ដិកាណ៍នេះទទួលបានការចាប់អារម្មណ៍ខ្លាំងពីមហាជន ជាពិសេសក្រុមឧកញ៉ា និងសប្បុរជនដែលកំពុងបន្ដចូលរួមសកម្មភាពមនុស្សធម៌ក្នុងសង្គម។ ប៉ុន្ដែចម្ងល់ខ្លះត្រូវបានចោទឡើងចំពោះវត្ដមានរបស់សម្ដេចតេជោ ដោយអ្នកខ្លះឆ្ងល់ថាតើសម្ដេចនឹងចូលទាត់ដែរ ឬយ៉ាងណា?

តាមរយៈសន្និសីទសារព័ត៌មានមួយនាផ្សារទំនើបជីបម៉ុង ២៧១ កាលពីថ្ងៃទី២៧ ខែមេសា ប្រធានក្រុមបាល់ទាត់តារាកម្ពុជា(CFSS) គឺលោក ប៉ុន សុណារិន ហៅខេម បានបញ្ជាក់ច្បាស់ៗថា សម្ដេចគឺជាប្រធានកិត្ដិយស ហើយដឹកនាំការប្រកួតក្នុងក្រុមរបស់លោកដោយផ្ទាល់ ប៉ុន្ដែសម្ដេចលោកនឹងមិនចូលទីលានទាត់ដោយផ្ទាល់នោះទេ។

លោក ប៉ុន សុណារិន៖ "ច្បាស់ណាស់សម្ដេចដែលជាឪពុក នៃយើងគាត់នឹងមិនចូលទាត់ដោយផ្ទាល់ទេ លោកលោកជាអ្នកបញ្ជាតែ គាត់ជាអ្នកបញ្ជាក្រុម។ ជាមហាកិត្ដិយសដែលសម្ដេចបានដឹកនាំក្រុម និងជាគ្រូបង្វឹកកិត្ដិយសដោយផ្ទាល់ទៀត ដូច្នេះកាយវិកាសប្បុរសធម៌នេះនឹងរីកដុះដាលកាន់តែធំទៅៗ"។

បើតាមប្រធានក្រុមបាល់ទាត់រូបនេះ ទឹកប្រាក់សម្បុរសធម៌ដែលក្រុមបាល់ទាត់រាតាកម្ពុជា ទទួលបាន គឺបានកើនឡើងជិត ៤លានដុល្លារ។ ក្នុងនោះមានទឹកប្រាក់ចំនួន ២០០លានរៀល ជាជំនួយដ៏សម្ដេច។ បច្ចុប្បន្ននៅមានសម្បុរសធម៌បន្ដឧបត្ដម្ភទៀត ដោយដឹងថាសម្ដេចជាអ្នកដឹកនាំការប្រកួតនេះដោយផ្ទាល់។

ទោះជាយ៉ាងណា ខេម បានបញ្ជាក់ម្ដងហើយម្ដងទៀតទាំងនៅលើបណ្ដាញសង្គម និងនៅក្នុងសន្និសីទសារព័ត៌មានកាលពីពេលថ្មីៗនេះ ដោយអំពាវនាវឲ្យមានការចូលរួមគាំទ្រជាថវិកា ឬទស្សនាដោយផ្ទាល់ ហើយថវិកាដែលក្រុមលោកទទួលបាននេះមិនទុកសម្រាប់ក្រុម ឬបុគ្គលណាឡើយ គឺត្រូវប្រគល់ទៅមន្ទីរពេទ្យគន្ធាបុប្ផាទាំងអស់នៅក្រោយការប្រកួតចប់។

សូមបញ្ជាក់ថា ព្រឹត្ដិការណ៍ប្រកួតកីឡាបាល់ទាត់មិត្ដិភាពសម្បុរសធម៌នេះ នឹងរៀបចំឡើងក្នុងថ្ងៃទី១ ខែឧសភា ត្រូវចំថ្ងៃទិវាពលកម្មអន្ដរជាតិ ឆ្នាំ២០២៤។ កម្ពុជាបានរៀបចំព្រឹតិការណ៍នេះឡើង ក្រោមមូលបទ "រួមគ្នាដើម្បីសប្បុរសធម៌ និងប្រយុទ្ធប្រឆាំងនឹងគ្រឿងញៀន"។

ព្រឹត្ដិកាណ៍ដែលបើកឲ្យមហាជនចូលទស្សនាដោយសេរី នៅពហុកីឡដ្ឋានជាតិអូឡាំពិក នេះ នឹងមានសមាជិកក្រុមបាល់ទាត់ល្បីៗក្នុងវិស័យសិល្បៈ និងវិស័យកីឡានៅកម្ពុជា។ ក្នុងនោះក្រុមដែលនឹងត្រូវប៉ះជើងគ្នានៅលើទីលាន គឺ មានក្រុមបាល់ទាត់តារាកម្ពុជា ក្រុមបាល់ទាត់អ្នកបង្កើតមាតិកា ក្រុមបាល់ទះ S&E ALL STAR និងក្រុមសហព័ន្ធកីឡាប្រដាល់គុនខ្មែរ៕

ជិន សុភ័ក្ដ្រ