Ronaldo ឈ្នះ Juventus រឿងក្ដីក្ដាំពាក់ព័ន្ធរឿងមិនបើកប្រាក់ឈ្នួលរាប់លានដុល្លារ

2024-04-18 11:10:52
បាល់ទាត់

2024-04-18 11:10:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Cristiano Ronaldo បានឈ្នះក្លឹប Juventus លើសំណុំរឿងក្ដីក្ដាំរឿងក្លឹបមិនបើកប្រាក់ឈ្នួលសរុបជាង ២០ លានដុល្លារសហរដ្ឋអាមេរិកឲ្យកីឡាករព័រទុយហ្គាល់ នៅពេលដែលរូបគេនៅរួមរស់ជាមួយក្លឹបពីឆ្នាំ ២០១៨ ដល់ឆ្នាំ ២០២១។

ដើមហេតុនៃរឿងក្ដីនេះ គឺកើតឡើងក្នុងអំឡុងពេលវិបត្តិកូវីដ-១៩។ កាលនោះ ក្លឹប Juventus ក៏ដូចជាក្លឹបដទៃទៀតដែរនៅអឺរ៉ុបបានជួបវិបត្តិហិរញ្ញវត្ថុធ្ងន់ធ្ងរដែលធ្វើឲ្យប៉ះពាល់ដល់ការបើកប្រាក់ឈ្នួលដល់កីឡាករ និងបុគ្គលិកក្លឹបផ្សេងទៀត។ ហេតុដូច្នេះ ក្លឹប Juventus បានចរចា ហើយព្រមព្រៀងជាមួយកីឡាករដែលរួមរស់ជាមួយខ្លួនក្នុងនោះរួមមាន Cristiano Ronaldo ផង ក្នុងការពន្យារពេលបើកប្រាក់ឈ្នួលរយៈពេល ៤ ខែក្នុងចន្លោះពេលពីខែមីនា ២០២០ ដល់ខែមេសា ២០២១ ដែលនៅពេលនោះក្លឹបជួបវិបត្តិហិរញ្ញវត្ថុខ្លាំង។ ក្នុងករណី Ronaldo គឺក្លឹប Juventus ជំពាក់ប្រាក់ឈ្នួលសរុបប្រមាណ ២០ លានដុល្លារសហរដ្ឋអាមេរិក។

ទោះជាយ៉ាងណា គិតមកទល់ពេលនេះ ក្លឹប Juventus នៅតែមិនទាន់បើកប្រាក់ជំពាក់នេះទៅឲ្យ Ronaldo។ ហេតុនេះ ទើបនៅវេលាឆ្នាំមុន Ronaldo បានប្ដឹងក្លឹបយក្សមួយនេះទៅតុលាការអ៊ីតាលីដើម្បីដេញដោលដោះស្រាយរឿងមួយនេះ។ ជាលទ្ធផល ក្នុងសប្ដាហ៍នេះ តុលាការសម្រេចកាត់ក្ដីឲ្យ Ronaldo ឈ្នះ ហើយក្លឹប Juventus ត្រូវបើកលុយជាង ២០ លានដុល្លារសហរដ្ឋអាមេរិកឲ្យ Ronaldo។ គិតគូរក្រោយបង់ពន្ធរួច Ronaldo ទទួលបានថវិកាប្រមាណជិត ១០ លានដុល្លារសហរដ្ឋអាមេរិកពីក្លឹប Juventus។

ការឈ្នះក្ដីរបស់ Ronaldo នេះ បង្កជាសម្ពាធថ្មីបន្ថែមទៀតដល់ក្លឹប Juventus ដែលកំពុងជំពាក់ប្រាក់ឈ្នួលដល់កីឡាករផ្សេងទៀត ដែលក្លឹបមិនទាន់បើកឲ្យ។ យោងតាមការចុះផ្សាយរបស់ Goal ស្ថានភាពហិរញ្ញវត្ថុរបស់ក្លឹបមិនទាន់មានភាពប្រសើរឡើងនៅឡើយ ហើយទាមទារពេលដើម្បីរកវិធីក្នុងការដោះស្រាយរឿងជំពាក់ប្រាក់ឈ្នួលដ៏ច្រើនសម្បើមនេះ។

កាលពីឆ្នាំ ២០១៨ ក្លឹប Juventus បានផ្ទេរចូលកីឡាករ Crisitiano Ronaldo ពីក្លឹប Real Madridក្នុងតម្លៃផ្ទេរប្រមាណ ១២៥ លានដុល្លារសហរដ្ឋអាមេរិក។ កីឡាករព័រទុយហ្គាល់បានចំណាយពេលចំនួន ៤ រដូវកាលនៅក្លឹបអ៊ីតាលី ហើយលេងបាន ១៣៤ ប្រកួត និងស៊ុតចូល ១០១ គ្រាប់។ បន្ទាប់មក Ronaldo បានសម្រេចត្រលប់មកបិសាចក្រហម Manchester United នៅឆ្នាំ ២០២២។ នៅអង់គ្លេសជាងមួយឆ្នាំ ខ្សែប្រយុទ្ធព័រទុយហ្គាល់វ័យ ៣៩ ឆ្នាំ បានសម្រេចមកចូលរួមជាមួយក្លឹបអារ៉ាប៊ីសាអ៊ូឌីតAl Nassr នៅឆ្នាំ ២០២៣ ហើយលេងនៅទីនោះរហូតដល់ពេលបច្ចុប្បន្ន៕