Mbappe មិនដូរចិត្ត ទោះជួយ PSG ឡើងវគ្គពាក់កណ្ដាលផ្ដាច់ព្រ័ត្រ UCL

2024-04-17 10:53:04
បាល់ទាត់

2024-04-17 10:53:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Kylian Mbappe មិនផ្លាស់ប្ដូរចិត្តទេ ក្នុងការចាកចេញពីក្លឹបយក្សបារាំង Paris Saint Germain។ នេះបើទោះកីឡាករទើបជួយក្លឹបឡើងទៅវគ្គពាក់កណ្ដាលផ្ដាច់ព្រ័ត្រកម្មវិធី UEFA Champions League។

កាលពីវេលារំលងអាធ្រាត្រថ្ងៃនេះ PSG បានយកឈ្នះ Barcelona ក្នុងលទ្ធផល ៤ ទល់នឹង ១ ក្នុងប្រកួតជើងទី ២ នៃវគ្គ ៨ ក្រុមចុងក្រោយនៃកម្មវិធីប្រកួតលីគកំពូលអឺរ៉ុប។ ក្នុងចំណោម ៤ គ្រាប់នោះ Mbappe បានស៊ុតចូល ២ គ្រាប់ ជួយឲ្យ PSG យកឈ្នះ Barca។ កាលពីប្រកួតជើងទី ១ កាលពីសប្ដាហ៍មុន PSG បានចាញ់ Barca ក្នុងលទ្ធផល ២ ទល់នឹង ៣។ ដូច្នេះ បើគិតលទ្ធផលសរុបការប្រកួតទាំងពីរជើង ក្លឹប PSG បានយកឈ្នះទម្លាក់ Barca ហើយឡើងទៅលេងប្រកួតវគ្គពាក់កណ្ដាលផ្ដាច់ព្រ័ត្រ UCL។

Mbappe ត្រូវបានសង្កេតថាបានបង្ហាញទឹកមុខរីករាយចំពោះជ័យជំនះមួយនេះ។ ក្រោយការប្រកួត អ្នកសារព័ត៌មានបានសួរ Mbappe ថា តើលទ្ធផលឈ្នះថ្ងៃនេះ អាចប្ដូរចិត្តឲ្យកីឡាកររូបនេះបន្តរួមរស់ជាមួយ PSG ឬទេ។ កីឡាករវ័យ ២៥ ឆ្នាំបានឆ្លើយយ៉ាងខ្លីថា ទេ មិនបានប្ដូរចិត្តនោះទេ។ កីឡាករបានបន្ថែមទៀតថា អាទិភាពរបស់រូបគេនៅពេលនេះ គឺខិតខំប្រឹងប្រែងអស់ពីសមត្ថភាពក្នុងការជួយក្រុម PSG ដើម្បីប្រជែងយកពាន Champions League។

កាលពីខែកុម្ភៈ ឆ្នាំ២០២៤ នេះ Mbappe បានប្រាប់ក្លឹប PSG ជាផ្លូវការថា នឹងចេញពីក្លឹបនៅពេលកុងត្រាផុតកំណត់នៅខែមិថុនាខាងមុខ។ នេះបើទោះជា PSG បានខិតខំយ៉ាងណាក្នុងការទទូចឲ្យកីឡាករចុះកុងត្រាថ្មីជាមួយក្លឹប តែកីឡាករនៅតែមិនព្រម។

របាយការណ៍ចុងក្រោយបានបញ្ជាក់ថា ក្លឹប Real Madrid ស្ថិតក្នុងជួរមុខក្នុងការផ្ទេរចូលកីឡាករ Mbappe នៅពេលកុងត្រារបស់ខ្សែប្រយុទ្ធផុតកំណត់នៅ PSG។

Mbappe បានមកចូលរួមជាមួយ PSG កាលពីឆ្នាំ ២០១៧ ហើយបានបង្ហាញទម្រង់លេងយ៉ាងល្អ។ កីឡាករលេងសរុប ៣០២ ប្រកួត និងស៊ុតចូល ២៥៣ គ្រាប់។ ជាង ៧ ឆ្នាំជាមួយក្លឹប កីឡាករមិនដែលឈ្នះពាន Champions League ជាមួយ PSG ឡើយគិតមកទល់ពេលនេះ។ PSG ធ្លាប់ឡើងដល់វគ្គផ្ដាច់ព្រ័ត្រ UCL កាលពីរដូវកាល ២០១៩/២០២០ តែចាញ់ក្រោមថ្វីដៃ Bayern Munich ក្នុងលទ្ធផល ១ ទល់នឹង ០ នាពេលនោះ។

និយាយពីកម្មវិធី UCL រដូវកាលនេះវិញ មានក្លឹបពីរហើយដែលបានកក់កៅអី UCL ពាក់កណ្ដាលផ្ដាច់ព្រ័ត្រ ក្នុងនោះរួមមាន PSG និង Borussia Dortmund។ ដោយឡែក នៅសល់ក្លឹប ៤ ទៀត ដែលកំពុងត្រៀមខ្លួនដើម្បីព្យាយាមកក់កន្លែងរបស់ខ្លួនក្នុងវគ្គ Semi Final រួមមាន Bayern Munich Arsenal Manchester City និង Real Madrid។ ក្លឹប Bayern នឹងត្រូវប៉ះ Arsenal (ជើងទី ១ លទ្ធផល ២ ទល់នឹង ២) ហើយក្លឹប Manchester City ត្រូវប្រកួតជាមួយ Real Madrid (ជើងទី ១ លទ្ធផល ៣ ទល់នឹង ៣) ក្នុងប្រកួតជើងទី ២ នៃវគ្គ ៨ ក្រុមក្នុងកម្មវិធី UCL នាវេលារំលងអាធ្រាត្រថ្ងៃស្អែកនេះ៕

ប្រភព៖ Goal អត្ថបទ៖ សេរី មង្គល