ស្មាត់ស្ដាំវ័យក្មេង ឆោម ទីណា យល់ថាល្អសម្រាប់បាល់ទះក្រៅផ្លូវការ បើក្លឹបអាជីពអនុញ្ញាតឲ្យចេញលេង

2024-04-02 04:40:00
បាល់ទះ

2024-04-02 04:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ កីឡាករវ័យក្មេងកំពុងមានឈ្មោះបោះសំឡេងនៅសមាគមបាល់ទះក្រសួងមហាផ្ទៃ ឆោម ទីណា បានចេញលេងបាល់ទះបួនស្មើក្រៅផ្លូវការបែបស្តង់ដាររៀបចំដោយក្រុមហ៊ុនឯកជនមួយ ហើយក្រុមរបស់គេទទួលបានចំណាត់ថ្នាក់លេខ១។ ចំពោះការចេញលេងបាល់ទះក្រៅផ្លូវការបែបស្តង់ដារនេះ ទីណាយល់ឃើញថាល្អសម្រាប់បាល់ទះក្រៅផ្លូវការ ហើយនឹងកាន់តែល្អបើសិនក្លឹបអាជីពមួយចំនួនអនុញ្ញាតឲ្យកីឡាករចេញលេងខាងក្រៅ។

ល្អព្រោះ ទីណា មើលឃើញបាល់ទះក្រៅផ្លូវការនាពេលបច្ចុប្បន្ន លេងខុសបច្ចេកទេសបាល់ទះ ពោលគឺលេងល្អិតជាប់ដៃ បោករញ៉េរញ៉ៃ ធ្វើឲ្យប្រទេសជិតខាងយកទៅ Troll សើចចំអកនាំឲ្យអាប់ឱនមុខមាត់ប្រទេសជាតិ។ ជនបរទេសខ្លះបានយកវីដេអូប៉ះសេស្អិតជាប់ដៃរបស់អ្នកលេងបាល់ទះក្រៅផ្លូវការកម្ពុជា ទៅប្រៀបធៀបនឹងសត្វសុនក ដែលចង់ឆ្លុះបញ្ចាំងថាការប៉ះសេអន់ជាងសត្វទៅទៀត។

ស្មាត់វ័យក្មេងដដែលបានបន្តថាថ្មីៗនេះ ក្រោយមានការចេញលេងរបស់កីឡាករសមាគមបាល់ទះវិសាខា គួន ម៉ុម, សឿន ហេង និង សួន ចាន់ណារ៉ូមក បាល់ទះក្រៅផ្លូវការហាក់កែប្រែបានល្អបន្តិច ដោយមិនមានការលេងបោកនិងប៉ះសេដាច់ៗល្អ ហើយទទួលបានការគាំទ្រខ្លាំងពីទស្សនិកជន។ ជារឿងមិនអាចទៅរួចដែលក្នុងនាមជាក្លឹបអាជីព អនុញ្ញាតឲ្យកីឡាករចេញលេងខាងក្រៅរហេតរហូត ប៉ុន្តែប្រសិនបើក្លឹបអាជីពអាចអនុញ្ញាតបានមែននោះ ទីណា ថាពិតណាស់នឹងជួយកែបាល់ទះក្រៅផ្លូវការឲ្យល្អច្រើន ដោយលេងប្រកាន់ភ្ជាប់ប៉ះសេដាច់ៗនិងលេងហាមបោកជាដើម។

ទីណា បានបញ្ជាក់បែបនេះ ៖«ប៉ុន្តែភាគច្រើនបណ្ដាក្លឹបមួយៗ គេប្រកួត៦ស្មើ គេអត់ប្រកួត៤ ប៉ុន្តែប្រសិនជាបណ្ដាក្លឹបមួយចំនួនគាត់អាចធ្វើចឹងបានក៏ល្អដែរ បើយើងចុះទៅតាមភូមិភាគផ្សេងៗដូចជាតាមបណ្ដាខេត្តនានាទៅ ពួកគាត់អាចយកគំរូតាមយើង ឃើញ អ៎ អ្នកខាងណោះ គាត់លេងអ៊ីចេះទៅ ចឹងពួកយើងកែទម្លាប់ទៅល្អ»។

អ្វីជាបញ្ហាចោទនៅត្រង់ស្មាត់ធំៗស្រុកខ្មែរ បើសិនពួកគេចេញលេងតាមបណ្ដាខេត្ត ហើយអាចសន្យាលេងស្តង់ដារកាន់តែល្អ។ ត្រង់ចំណុចនេះ ឆោម ទីណា បានសំណូមពរឲ្យកីឡាករលំដាប់ Grade A កម្ពុជាលេងឲ្យត្រូវតាមក្បួនខ្នាតនៃច្បាប់បាល់ទះ។

កីឡាករវ័យក្មេងដែលបានចូលហ្វឹកហាត់ជាមួយសមាគមបាល់ទះក្រសួងមហាផ្ទៃបានជិត ២ ឆ្នាំ ពន្យល់ថា ៖«ស៊ីសងលើពួកគាត់ដែរបង បើសិនជាពួកគាត់គិតថា បើចង់លើកស្ទួយវិស័យកីឡាបាល់ទះ ពេលណាត់ជួបទាល់ពួកគាត់និយាយចឹង តែភាគច្រើនស៊ីសងលើទឹកលុយ...បើសម្រាប់ខ្ញុំ ខ្ញុំមានសំណូមពរមួយដូចជាស្មាត់ធំៗនៅស្រុកខ្មែរយើងជាដើម បើចង់ណាត់គូលេងនៅតាមខេត្ត សុំពួកគាត់សំណូមពរប៉ះសេដាច់ៗ ហើយកុំលេងបោក»៕

អត្ថបទ៖ Um Sopheak