កីឡាករ ទុយ កុសល ហៅស្មាត់យុនស្រែស្រែមានក្ដីបំណងចង់ជួប គួន ម៉ុម ក្រោយស្មាត់ធំ​នៃសមាគមបាល់ទះ​វិសាខា​រូបនេះ ត្រឡប់មកពីប្រកបអាជីព​នៅ​ប្រទេស​វៀតណាមវិញ​។

ក្ដី​បំណង​ចង់ជួប​របស់​ស្មាត់ជំនាញ​ផ្លែសេវា​​ យុនស្រែស្រែ ក្រោយគេមើលឃើញថា គួន ម៉ុម ឈ្នះអស់ស្មាត់ធំៗស្រុកខ្មែរហើយដូចជាឈ្នះឥន្ទ្រីពិឃាដ​ ឌូក ឥន្ទ្រី​ស្លាប​ដែក​ សុខ រ៉ាដូ ខ្លាចាស់​កំពូល​ស្មោះ​ទូចអង្គរក្ស ដាវញីឈ្មោល​ម៉ាប់ឆ្វេង សុវណ្ណនាថ អ្នកលេង​ផ្លែ​សេវា​វ័យ​ក្មេង នួន​ វិចិត្រ ស្មាត់ឆ្វេង​ទើប​ឡើង​កូដ ស៊ុយ ខន និងអធិរាជប្រអប់ស្មាត់រាជជាដើម។​

ស្មាត់​ធំ​របស់​ក្លឹប​បញ្ជាការដ្ឋាន​អង្គរក្សរូប​នេះ​បានបញ្ជាក់ថា ៖«សម្រាប់ការប្រកួតហ្នឹង បើសិន​គាត់ត្រឡប់មកវិញ គាត់បំពេញបំណងខ្ញុំ ខ្ញុំក៏ដូចថាចង់បំពេញបំណងខ្លួនឯង ចង់ជួបគាត់ដែរ ដោយសារ​ខ្ញុំឃើញគីបគាត់ហ្នឹងចេញមកស៊ី តាំងពីស្មាត់ឌូកស្មាត់ក្ដូ ក្រោយមកស៊ីម៉ាប់ឆ្វេងសុវណ្ណនាថ ស៊ីរាជស៊ីបងទូច ឥឡូវស៊ីម៉ាបឆ្វេងម្ដងទៀត»​។​

ដូច Sabay ចុះផ្សាយក្នុងអត្ថបទមុនអ៊ីចឹង បើសិនជា គួន ម៉ុម ទទួលសំណើរនេះមែន នោះអតីត​កីឡាករ​របស់​ក្លឹប​ស្នងការដ្ឋាន​នគរបាល​រាជធានីភ្នំពេញ យុនស្រែស្រែនឹងចាប់ដៃគូជាមួយ រាជ វិចិត្រ ឬ វ៉ា រាជ និងវីដប៉ះសេជាដើម។​

ចំពោះការប្រកួតមួយនេះ បើសិនជាកើតមានឡើងមែន នោះគេរំពឹងថានឹងធ្វើឲ្យផ្ទុះការទស្សនាទាំងផ្ទាល់ និងអនឡាញជាក់ជាមិនខាន ដ្បិតសុទ្ធតែជាស្មាត់លំដាប់ៗ Grade A ស្រុកខ្មែរ ហើយនៅសល់តែអេគីបយុនប៉ុណ្ណោះ ដែលអាចលេងជាមួយគួនម៉ុមបាន។ តើប្រិយមិត្តយល់យ៉ាងណាដែរ បើការប្រកួតនេះកើតឡើងមែន ហើយគិតថាកក្រើកឬមិនកក្រើក​?​