- 2024-02-22 07:56:59
- បាល់ទះ
សហព័ន្ធកីឡាបាល់ទះកម្ពុជា៖ ពានរង្វាន់បាល់ទះ 4x4 ជាការផ្ដល់ឱកាសដល់អ្នកខេត្តបង្ហាញសមត្ថភាព
- 2024-02-22 07:56:59
- ចំនួនមតិ 0 | ចំនួនចែករំលែក 0
សហព័ន្ធកីឡាបាល់ទះកម្ពុជា៖ ពានរង្វាន់បាល់ទះ 4x4 ជាការផ្ដល់ឱកាសដល់អ្នកខេត្តបង្ហាញសមត្ថភាព
ចន្លោះមិនឃើញ
អគ្គលេខាធិការសហព័ន្ធកីឡាបាល់ទះកម្ពុជា ថាពានរង្វាន់បាល់ទះ Wurkz Special Volleyball Cup 4x4 2024 នេះជាឱកាសពិសេស និងជាការលើកទឹកចិត្តកីឡាករនៅតាមបណ្ដាខេត្តបានបង្ហាញសមត្ថភាពលេចធ្លោរបស់ខ្លួនឲ្យមហាជនបានស្គាល់។
លោក អាំង សិរីពិសិដ្ឋ អគ្គលេខាធិការសហព័ន្ធបាល់ទះកម្ពុជា បានឲ្យដឹងថា ពានរង្វាន់ Wurkz Special Volleyball Cup ជាការប្រកួតដ៏ពិសេសមួយសម្រាប់ប្រជាជនទូទាំងខេត្តក្រុងទាំង ២៥។ ការប្រកួតនេះរៀបចំឡើងដល់ភូមិឋានរស់នៅរបស់ប្រជាពលរដ្ឋតែម្ដង។
ពានរង្វាន់ថ្មីរបស់សហព័ន្ធខាងលើនេះ គឺនឹងផ្ដល់ឱកាសដល់យុវជន កីឡាករ ដែលមានទេពកោសល្យបានប្រកួតជាក់ស្ដែងលើទីលានស្តង់ដារ បានបង្ហាញសមត្ថភាពលេចធ្លោរបស់ខ្លួន។ ការប្រកួតនេះក៏ជាសារមួយដល់មហាជនដែលធ្លាប់លេងបាល់មិនត្រឹមត្រូវតាមស្តង់ដារឲ្យកែប្រែមកលេងតាមច្បាប់ទម្លាប់ស្តង់ដារវិញដើម្បីភាពរីកចម្រើនលើវិស័យបាល់ទះនៅកម្ពុជា។ ពានរង្វាន់នេះក៏ជាយុទ្ធសាស្ត្ររុញវិស័យបាល់ទះឲ្យទៅកៀកដល់តំបន់រស់នៅរបស់ប្រជាពលរដ្ឋតែម្ដង។
ថ្នាក់ដឹកនាំសហព័ន្ធខាងលើបានលើកទឹកចិត្តឲ្យកីឡាករទាំងអស់ដែលនឹងចូលរួមលេងពានរង្វាន់នេះឲ្យខំប្រឹងប្រែងពង្រឹងសមត្ថភាពរបស់ខ្លួនឲ្យខ្លាំងដូចទៅហ្នឹងកីឡាករអាជីពមួយរបស់កម្ពុជាដូចជា វឿន វាសនា គួន ម៉ុម សួន ចាន់ណារ៉ូ និងកីឡាករផ្សេងៗទៀតដែលអន្តរជាតិទទួលស្គាល់ និងបានយកទៅលេងនៅក្រៅស្រុកជាដើម។
រំលឹកដែរថា សហព័ន្ធកីឡាបាល់ទះកម្ពុជា និងម្ចាស់ឧបត្ថម្ភបានធ្វើសន្និសីទនៃការប្រកួតពានរង្វាន់ Wurkz Special Volleyball Cup 4x4 2024 និងបានចាប់គូរួចរាល់ហើយដែរកាលពីថ្ងៃទី២០ ខែកុម្ភៈ ឆ្នាំ២០២៤ នៅផ្សារទំនើប ជីប ម៉ុង ២៧១។ ការប្រកួតជម្រុះរបស់ម្ចាស់ពានប្រចាំភូមិភាគនឹងចាប់ផ្ដើមឡើងពីថ្ងៃទី២៤ ខែកុម្ភៈ នៅមណ្ឌលខេត្តបាត់ដំបងមុនគេ។ ពានរង្វាន់មួយនេះបន្ទាប់ពីរកឃើញជើងឯកតាមភូមិភាគហើយនោះនឹងឡើងមកធ្វើការប្រកួតផ្ដាច់ព្រ័ត្រនៅរាជធានីពេញអំឡុងចុងខែមេសា ឆ្នាំ២០២៤ ។ ប្រាក់រង្វាន់ពាននេះដែរគឺ លេខ១ ទទួលបាន ៥០លានរៀល លេខ២ ទទួលបាន ២០លានរៀល និងលេខ៣ ទទួលបាន ១២លានរៀល។ ចំណែកពានឯកត្តជនគឺមាន ៦ពាន សម្រាប់ពានរង្វាន់ក្នុង១ពាន ទទួលបាន ១លានរៀល៕
SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB
