ស្ថាប័នបាល់ទាត់ពិភពលោកកំពុងតែគិតគូរលើការដាក់ចេញ «កាតខៀវ»

2024-02-09 12:42:17
ព័ត៌មាន

2024-02-09 12:42:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមប្រឹក្សាសមាគមបាល់ទាត់អន្តរជាតិ (IFAB) ដែលជាស្ថាប័នតាក់តែងច្បាប់ និងបទវិន័យបាល់ទាត់ បានស្នើឱ្យមាន «កាតខៀវ» នៅក្នុងការប្រកួតបាល់ទាត់ សម្រាប់កំហុសមួយចំនួនក្រៅពីវិជ្ជាជីវៈបាល់ទាត់។ នេះបើតាមការចុះផ្សាយរបស់សារព័ត៌មានបាល់ទាត់ធំៗនានា។

កាតខៀវនេះនឹងចែកជូនកីឡាករ ទុកជាការពិន័យលើកំហុសមិនមែនវិជ្ជាជីវៈដូចជា ការជេរប្រមាថ ឬ ការប្រើពាក្យមិនសមរម្យចំពោះអាជ្ញាកណ្ដាល ឬ ដៃគូប្រកួត ក៏ដូចជាកំហុសផ្សេងៗទៀត ដែលបង្កឡើងដើម្បីបង្អាក់សកម្មភាពក្នុងការប្រកួត។

អ្នកដែលទទួលបានកាតនេះនឹងផ្អាកមិនឱ្យលេងក្នុងរយៈពេល ១០នាទី។ ការទទួលបានកាតនេះ ២ដង ស្មើនឹងកាតលឿងម្ដង ហើយប្រសិនបើបានកាតលឿងម្ដង និងបានកាតខៀវម្ដង ស្មើនឹងបានកាតក្រហម។ ស្ថាប័ន IFAB នឹងចេញផ្សាយច្បាប់ទម្លាប់ទាក់ទិននឹងកាតខៀវនេះនាពេលឆាប់ៗ។

កន្លងមក កាតនេះត្រូវបានដាក់ប្រើនៅកម្មវិធីប្រកួតកម្រិតទាបដូចជាការប្រកួតបាល់ទាត់យុវជនជាដើម។ បើតាមការចុះផ្សាយមួយចំនួន កាតនេះគ្រោងនឹងប្រើក្នុងប្រកួតពាន FA និងពាន FA បាល់ទាត់នារី។

យ៉ាងណាមិញ ស្ថាប័នបាល់ទាត់កំពូល FIFA យល់ឃើញថា ការប្រើកាតនេះនៅក្នុងការប្រកួតកម្រិតខ្ពស់អាចនឹងមិនមានប្រសិទ្ធភាពទេ។ ទោះជាយ៉ាងណាក្ដី ការដាក់ចេញកាតខៀវនេះនៅក្នុងដំណាក់កាលពិភាក្សាគ្នានៅឡើយ៕

ប្រភព៖ Sky Sports អត្ថបទ៖ សេរី មង្គល