គ្រូ Spurs បំបែកកំណត់ត្រាក្នុង Premier League

2023-10-25 12:36:43
បាល់ទាត់

2023-10-25 12:36:43
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Ange Postecoglou ក្លាយជាអ្នកចាត់ការ Premier League ដែលជួយក្លឹបទទួលបានពិន្ទុច្រើនជាងគេ ក្នុងការដឹកនាំប្រកួតលីគចំនួន ៩ ប្រកួតដំបូង។

បច្ចុប្បន្ន Spurs កំពុងឈរកំពូលតារាង Premier League មាន ២៣ ពិន្ទុក្នុងដៃបន្ទាប់ពីលេង ៩ ប្រកួតរួចមក។ ក្លឹបបានឈ្នះ ៧ ប្រកួត ស្មើ ២ ដង និងមិនទាន់ចាញ់នៅឡើយ។ Spurs បានស៊ុតចូលក្រុមគូប្រកួតដល់ទៅ ២០ គ្រាប់ ហើយឲ្យគេស៊ុតចូលវិញចំនួនតែ ៨ គ្រាប់ប៉ុណ្ណោះ។

ក្នុងប្រវត្តិសាស្ត្រ Premier League មិនដែលមានអ្នកចាត់ការណាមួយកំណត់ត្រាចាប់ផ្ដើមរដូវកាលល្អដូចលោក Ange Postecoglou នោះទេគិតមកទល់ពេលនេះ។

បើប្រៀបធៀបនឹងអ្នកចាត់ការល្បីៗ លោក Postecoglou មានកំណត់ត្រាល្អជាងគេក្នុងការដឹកនាំ ៩ ប្រកួតដំបូង។ តួយ៉ាង លោក Pep Guardiola កាលពីពេលដឹកនាំ Man City ៩ ប្រកួតដំបូង លោកឈ្នះ ៦ ដង ស្មើ ២ លើក និងចាញ់ ១ ប្រកួត ខណៈលោក Erik Ten Hag ពេលចាប់ផ្ដើមជាមួយ Manchester United គឺឈ្នះ ៥ លើក ស្មើ ១ ដង និងចាញ់ ៣ ដង។ កំណត់ត្រាលោក Mikel Arteta វិញគឺឈ្នះ ៣ ប្រកួត ស្មើ ៥ ដង និងចាញ់ ១លើក។ ចំណែកលោក Jurgen Klopp អ្នកចាត់ការ Liverpool គឺឈ្នះ ៣ លើក ស្មើ ៣ដង និងចាញ់ ៣ប្រកួត។

កាលពីខែមិថុនា ឆ្នាំ២០២៣ ក្លឹប Spurs បានសម្រេចចិត្តតែងតាំងលោក Ange Postecoglou ដែលធ្លាប់ដឹកនាំយ៉ាងជោគជ័យនៅក្លឹបស្កុតឡែន Celtic។ បើទោះជាជោគជ័យបែបនេះក្ដី លោកមិនដែលមានបទពិសោធន៍ដឹកនាំក្លឹបធំៗឡើយនៅអឺរ៉ុប។ ហេតុនេះហើយ កាលពីពេលដែលតែងតាំងលោកដំបូងៗ អ្នកគាំទ្រក្លឹបជាច្រើនបានទិតៀនសេចក្ដីសម្រេចចិត្តរបស់ក្លឹប។

ទោះជាយ៉ាងណា ក្រោមការដឹកនាំរបស់លោក Postecoglou ក្លឹប Tottemham Hotspur បានបង្ហាញទម្រង់លេងយ៉ាងល្អ ហើយទទួលបានការសរសើរជាច្រើនពីមជ្ឈដ្ឋានបាល់ទាត់ជាច្រើន៕

ប្រភព៖ 90min អត្ថបទ៖ សេរី មង្គល