Sancho លុបចោលមតិដៀមដាមលោក Ten Hag

2023-09-13 13:06:30
បាល់ទាត់

2023-09-13 13:06:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែស្លាប Jadon Sancho បានធ្វើការលុបចោលមតិយោបល់របស់ខ្លួនក្នុងន័យដែលសារព័ត៌មានជាច្រើនយល់ថា ដៀមដាមដល់លោក Erik Ten Hag អ្នកចាត់ការក្លឹប Manchester United។

កាលពីការប្រកួតរវាង Arsenal និង Manchester United កាលពីជាង ១ សប្ដាហ៍មុន Sancho មិនមានវត្តមានជួយក្រុមឡើយ។ ក្រោយការប្រកួត អ្នកសារព័ត៌មានបានសួរលោក Ten Hag ថាហេតុអីមិនឃើញមុខ Sancho មកចូលរួមជួយក្រុមក្នុងប្រកួតជាមួយ Arsenal។

លោក Ten Hag បានឆ្លើយត្រង់ថាមូលហេតុ Sancho មិនបានមកជួយក្រុម គឺដោយសារកម្រិតនៃការហ្វឹកហាត់របស់កីឡាករមិនដល់កម្រិតមួយដែលលោកចង់បាន។

ក្រោយលោក Ten Hag និយាយបែបនេះ កីឡាករ Sancho បានចេញសារភ្លាមលើបណ្ដាញសង្គម Twitter ដោយបាននិយាយថា រូបគេបានហ្វឹកហាត់បានយ៉ាងល្អ។ ខ្សែស្លាបបានបន្តថា រូបគេត្រូវបានអ្នកដទៃទម្លាក់កំហុសដាក់ជាយូរមកហើយ ហើយរឿងនេះមិនយុត្តិធម៌ឡើយសម្រាប់រូបគេ។

ពាក្យពេចន៍ទាំងនេះត្រូវបានសារព័ត៌មានជាច្រើនវាយតម្លៃថា Sancho ចង់សំដៅដៀមដាមទៅ Ten Hag។

សារនេះបន្តមានវត្តមានលើទំព័រផ្លូវការរបស់ Sanchoជាងមួយសប្ដាហ៍ មុនត្រូវបាន Sancho លុបចោលនាថ្ងៃនេះ។ បើតាមសារព័ត៌មាន Daily Mirror ថ្នាក់ដឹកនាំនៅបិសាចក្រហមពេញចិត្តនឹងការលុបរបស់ Sancho នេះ ហើយសង្ឃឹមថានេះនឹងក្លាយជាជំហានមួយក្នុងការស្ដារទំនាក់ទំនងវិញរវាង Sancho និងលោក Ten Hag។ យោងតាមប្រភពដដែល Sancho បានជួបនិយាយគ្នាជាមួយ Ten Hag ក្នុងសប្ដាហ៍នេះ។

ខ្សែស្លាបវ័យ ២៣ ឆ្នាំ Sancho បានមកចូលរួមជាមួយ Man Utd កាលពីឆ្នាំ ២០២១។ កីឡាករលេងសរុប ៨២ ដង និងស៊ុតចូល ១២ គ្រាប់៕

ប្រភព៖ Mirror ប្រែសម្រួល៖ ហ៊ីម រស្មី