Cristiano Ronaldo បាននិយាយនៅក្នុងសន្និសីទសារព័ត៌មានមួយមុនការប្រកួតជម្រុះ EURO របស់ព័រទុយហ្គាល់អំពីការជជែកដេញដោល ថាអ្នកណាល្អជាងរវាងគាត់ ឬ Lionel Messi ។

ជារឿយៗតែងតែមានការជជែកដេញដោល ថា តើអ្នកណាជាអ្នកលេងដ៏អស្ចារ្យបំផុតគ្រប់ពេល។ Cristiano Ronaldo និង Leo Messi បានរក្សាការប្រជែងគ្នាមិនគួរឱ្យជឿអស់រយៈពេលជាង 15 ឆ្នាំនៃបាល់ទាត់ក្នុងយុគសម័យមាសនៃ La Liga ។ Cristiano Ronaldo បាននិយាយនៅក្នុងសន្និសីទសារព័ត៌មានមុនការប្រកួតជម្រុះ EURO របស់ជម្រើសជាតិ ព័រទុយហ្គាល់អំពីការប្រកួតប្រជែងរបស់រូបគេជាមួយកីឡាករអាហ្សង់ទីនក្នុងរយៈពេលជាច្រើនឆ្នាំ ហើយបានបញ្ជាក់យ៉ាងច្បាស់ពីការគោរពដែលរូបគេ មានចំពោះអ្នកឈ្នះពានរង្វាន់ Qatar 2022 World Cup មួយនេះ។

"ប្រសិនបើអ្នកចូលចិត្ត Cristiano អ្នកមិនចាំបាច់ស្អប់ Messi ទេ។ យើងបានផ្លាស់ប្តូរប្រវត្តិសាស្រ្តនៃបាល់ទាត់ ហើយយើងបន្តធ្វើដូច្នេះ។ Messi កំពុងដើរតាមគន្លងរបស់គេ ដូចខ្ញុំកំពុងដើរតាមគន្លងរបស់ខ្ញុំ បើទោះយើងលេងនៅក្រៅទ្វីបអឺរ៉ុបក៏ដោយ” ។ អតីតកីឡាករ Real Madrid រូបនេះបាននិយាយបញ្ជាក់។

កីឡាករព័រទុយហ្គាល់រូបនេះបានបន្ត ថា "ការប្រជែងគ្នា? ខ្ញុំមិនឃើញមានរឿងបែបនេះទេ ពួកយើងបានប្រកួត នៅលើទីលាន អស់រយៈពេល 15 ឆ្នាំ! ខ្ញុំមិននិយាយថាយើងជាមិត្តនឹងគ្នាទេ ប៉ុន្តែយើងគោរពគ្នាទៅវិញទៅមក" ៕