ខ្សែ​ការពារ​អង់គ្លេសកីឡាករ Harry Maguire ត្រូវ​បាន​សារព័ត៌មាន The Sun ចុះផ្សាយ​ថា ទាមទារ​ថ្លៃ​សំណង​ប៉ះប៉ូវ​របួស​ផ្លូវចិត្ត​ក្នុង​តម្លៃ ២០លាន​ដុល្លារ​អាមេរិកពី​ Manchester United ស្រប​ពេល​កីឡាករ​រូប​នេះ​គ្រោង​នឹង​ចាកចេញ​ទៅ​លេង​នៅ​ West Ham។

បើ​តាម​ប្រភព​ខាង​លើ កីឡាករ​រូប​នេះ​បាន​លើក​ហេតុផល​ថា កុងត្រា​របស់​ខ្លួន​ជាមួយ​នឹង Manchester United នឹង​មាន​សុពលភាព​រហូត​ដល់​ឆ្នាំ២០២៥ ដែល​គណនា​ទៅ​មាន​តម្លៃ​ប្រហាក់ប្រហែល​នឹង​ ២៥លាន​ដុល្លារ​អាមេរិក តែ​កីឡាករ​រូប​នេះ​ទារ​តែ ២០លាន​នោះ​ទេ។

យ៉ាងណាមិញ ទាក់ទិន​នឹង​រឿង​នេះ​ដែរ ខាង Man Utd បាន​ផ្ដល់​សំណង​ខូចខាត​ចំនួន ៧លាន​ដុល្លារ​អាមេរិក ប៉ុន្តែ​ Maguire មិន​ព្រម។

សូម​ជម្រាប​ផង​ដែរ​ថា Manchester United មាន​បំណង​លក់​ Maguire ចេញ​ ក្រោយ​ពេល​ដែល​កីឡាករ​រូប​នេះ​ធ្លាក់​ទម្រង់​លេង។ កន្លង​ទៅ ខាង​បិសាចក្រហម​បាន​ព្រមព្រៀង​ជាមួយ West Ham ហើយ ដោយ​លក់​ចេញ​ក្នុង​តម្លៃ ៣៨លាន​ដុល្លារ៕