​គិតមកដល់ថ្ងៃនេះ​ មានប្រទេសចំនួន៥ហើយ ដែលបានចុះឈ្មោះ​ចូលរួមប្រកួតលើប្រភេទ​កីឡា​គុន​ល្បុក្កតោ​ ជាមួយម្ចាស់ក្បាច់គុនកម្ពុជា ​ក្នុងឱកាសប្រកួតកីឡាស៊ីហ្គេម លើកទី៣២ នាខែឧសភា ឆ្នាំ២០២៣​ ជា​ប្រវត្តិសាស្ត្រ​ដំបូង​របស់​ព្រះរាជាណាចក្រកម្ពុជា។​

តាម​ប្រសាសន៍​របស់​ឯកឧត្តម​ វ៉ាត់ ចំរើន​ អគ្គលេខាធិការ ​គណៈកម្មាធិការ​ជាតិ​អូឡាំពិក​កម្ពុជា កាល​ពី​ពេលថ្មីៗនេះ ​បានគូសបញ្ជាក់ថា នៅក្នុងចំណោម៣៧ប្រភេទកីឡា ដែល​រៀបចំ​ដាក់​ឱ្យ​ប្រកួត​កីឡា​ស៊ីហ្គេម ​លើកទី៣២ ឆ្នាំ២០២៣​ ជាប្រវត្តិសាស្ត្រដំបូងរបស់កម្ពុជា គឺ​កម្ពុជា​បាន​សម្រេច​ដាក់​បញ្ជូល​នូវ​ប្រភេទ​កីឡា​វប្បធម៌អត្តសញ្ញាណជាតិរបស់ខ្លួនចំនួន៣​។ នេះជាឱកាសមាស ក្នុង​ការ​បង្ហាញ​កីឡា​ប្រពៃណី​ទាំង​នេះ​ទៅ​កាន់​អន្តរជាតិ ​ហើយប្រភេទកីឡាវប្បធម៌ប្រពៃជាតិទាំង៣នេះ គឺ​មាន​គុនល្បុក្កតោ ​គុនខ្មែរ ​និងអុកចត្រង្គ ​ដែលប្រជាពលរដ្ឋនិយមលេងក្នុងសង្គម។

លោក អ៊ួ តារា អគ្គលេខាធិការរង សហព័ន្ធកីឡាគុនល្បុក្កតោកម្ពុជា បានជាគូសបញ្ជាក់ថា ប្រទេសចំនួន៥ហើយ ដែលបានត្រៀមបញ្ជូនកីឡាករ កីឡាការិនីរបស់ខ្លួនចូលរួមប្រកួតកីឡាគុនល្បុក្កតោ ក្នុងស៊ីហ្គេម ឆ្នាំ២០២៣ ខាងមុខនេះ រួមមានប្រទេសវៀតណាម ឡាវ មីយ៉ាន់ម៉ា ហ្វីលីពីន និងឥណ្ឌូណេស៊ី រួមទាំងម្ចាស់ផ្ទះក្បាច់គុន និងជាម្ចាស់ផ្ទះ កម្ពុជា សរុបគឺ៦ប្រទេស។

«មុនឈានដល់ការប្រកួតធំនៃព្រឹត្តិការណ៍កីឡាស៊ីហ្គេម លើកទី៣២ នាខែឧសភា គឺម្ចាស់ផ្ទះកម្ពុជា គ្រោងនឹងរៀបចំព្រឹត្តិការណ៍ចំនួន២ គឺទី១ វគ្គបណ្តុះបណ្តាលអាជ្ញាកណ្តាលចៅក្រមអន្តរជាតិ គុនល្បុក្កតោ ពីថ្ងៃទី២៤ ដល់ថ្ងៃទី២៨ ខែមីនា ឆ្នាំ២០២៣។ បន្ទាប់មកយើងបន្តទៅរៀបចំការប្រកួតកីឡាគុនល្បុក្កតោ ជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៣ (The First Kun Borkator SEA Championship 2023) ដែលគ្រោងនឹងធ្វើពីថ្ងៃទី២៩ ខែមីនា ដល់ថ្ងៃទី០៣ ខែមេសា ឆ្នាំ២០២៣»។ នេះជាការបញ្ជាក់បន្ថែមរបស់ លោក អ៊ួ តារា។

ជាមួយគ្នានេះ លោកអគ្គលេខារងរូបនះក៏បានបន្ថែមទៀតថា ការរៀបចំវគ្គបណ្តុះបណ្តាល និងការប្រកួតជើងឯកអាស៊ីអាគ្នេយ៍ លើកទី១នេះ គឺពិតជាមានសារៈសំខាន់ណាស់ ដើម្បីត្រៀមខ្លួនឱ្យកាន់តែល្អប្រសើរ ក្នុងការត្រៀមខ្លួនឆ្ពោះទៅធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣។

គួរបញ្ជាក់ថា បញ្ជីវិញ្ញាសាដែលបានកំណត់ជាផ្លូវការលើប្រភេទកីឡាគុនល្បុក្កតោ ក្នុងប្រភេទយុទ្ធគុនចម្រុះ គឺមានចំនួន១៦វិញ្ញាសា ក្នុងនោះប្រភេទវិញ្ញាសាសម្តែងមានចំនួន៧ (ឯកត្តជន-ក្រុម) ខណៈវិញ្ញាសាប្រយុទ្ធមានចំនួន៩ រួមមានផ្នែកបុរសលើប្រភេទទម្ងន់ ៥០គ.ក ៥៥គ.ក ៦០គ.ក ៦៥គ.ក និង៧០គីឡូក្រាម។ រីឯផ្នែកនារី មានប្រភេទទម្ងន់ ៤៥គ.ក ៥០គ.ម ៥៥គ.ក និង៦០គីឡូក្រាម៕