- 2023-02-14 04:47:35
- ព័ត៌មាន
លោក ជី សិលា៖ កីឡា E-Sport មិនមែនជាល្បែងស៊ីសងទេ កុំនាំគ្នាយល់ច្រឡំទៀត
- 2023-02-14 04:47:35
- ចំនួនមតិ 0 | ចំនួនចែករំលែក 0
លោក ជី សិលា៖ កីឡា E-Sport មិនមែនជាល្បែងស៊ីសងទេ កុំនាំគ្នាយល់ច្រឡំទៀត
ចន្លោះមិនឃើញ
លោក ជី សិលា នាយកប្រតិបត្តិក្រុមហ៊ុន Sabay និងជាអនុប្រធានសហព័ន្ធកីឡាអេឡិចត្រូនិកកម្ពុជាបានចេញមុខបកស្រាយ កុំឱ្យមានការយល់ច្រឡំពីសំណាក់មហាជនទៀត ចំពោះប្រភេទកីឡា E-sport ។
រហូតមកដល់ពេលនេះ នៅតែមានមហាជនមួយចំនួនមិនទាន់យល់នោះទេ ចំពោះកីឡាអេឡិចត្រូនិក E-sport ។ ដោយពួកគេបានយល់ខុសថាជាប្រភេទហ្គេមអត់ប្រយោជន៍ ឬជាហ្គេមភ្នាល់លុយជាដើម និងធ្វើឱ្យសិស្សានុសិស្សគេចសាលា ឬមិនប្រឹងប្រែងរៀនសូត្រជាដើម។ តែការពិតទៅ E-Sport ជាកីឡាដ៏ពេញនិយម និងទទួលបានប្រជាប្រិយភាពលឿនបំផុតនៅលើលោកនេះ។ E-sport មាននៅក្នុងការប្រកួតធំៗជាច្រើនមកហើយ ជាក់ស្ដែងនៅស៊ីហ្គេមក៏មានដូចគ្នា ហើយក៏ទទួលបានការពេញនិយមណាស់ដែរ។
ជាមួយគ្នានេះ ដើម្បីកុំឱ្យមានបងប្អូន ពលរដ្ឋយល់ច្រឡំថែមទៀត លោក ជី សិលា អនុប្រធានសហព័ន្ធកីឡាអេឡិចត្រូនិកកម្ពុជាបានពន្យល់បែបនេះថា៖ “តាមពិតទៅកីឡា E-Sport វាក៏មិនខុសអីពីកីឡាផ្សេងៗ វិញ្ញាសាផ្សេងៗដូចជាបាល់ទាត់ បាល់ទះ ប្រដាល់ ឬក៏កីឡាហែលទឹកដែរ។ វាជាប្រភេទកីឡាមួយដែលគេនិយាយថាមិនមែនប្រើកម្លាំងកាយទេ គឺប្រើកម្លាំងញាណ ប្រាជ្ញា។ យើងប្រើភាពឆ្លាតវៃរបស់យើងទៅលេងដែរ។ ក្នុងហ្នឹងហើយដែលគេទទួលស្គាល់ថាវាក៏ជាប្រភេទកីឡាមួយដ៏រីកចម្រើនដែរ ដល់ប្រាជ្ញា ដល់មនុស្សទូទៅ។ អ៊ីចឹងហើយបានគេសម្រេចដាក់ E-Sport ហ្នឹងនៅក្នុងប្រភេទកីឡាស៊ីហ្គេម។ តាមពិតនៅក្នុងកីឡាអូឡាំពិក ក្នុងកីឡាអាស៊ាន អាស៊ីក៏ចាប់ផ្ដើមមានការប្រកួត E-Sport ហ្នឹងដែរ កីឡាអេឡិចត្រូនិកហ្នឹង។ តែយើងក៏មានបញ្ហាខ្លះ ព្រោះបច្ចុប្បន្នមិនទាន់មានកីឡាករគ្រប់វិញ្ញាសា E-Sport ទាំងអស់នោះទេ”។
ប្រធានក្រុមហ៊ុន Sabay និងជាអ្នកផ្ដួចផ្ដើមសហព័ន្ធកីឡាអេឡិចត្រូនិកនៅកម្ពុជា ខាងលើបានបន្ថែមថា៖ “មានពេលខ្លះយើងមានឧបសគ្គច្រើនដែរ ដោយសារអាជ្ញាធរដែនដីមួយចំនួនគាត់គិតថាប្រភេទលេងកុំព្យូទ័រហ្គេម ឬក៏ E-Sport ហ្នឹងគាត់ថាអាហ្នឹងវាដូចជាល្បែងស៊ីសង។ Game ជាមួយ Gambling ខុសគ្នាភាសាអង់គ្លេស ប៉ុន្តែជួនកាលគាត់នៅតែមានការភ័ន្តច្រឡំ ដោយសារនិន្នាការរដ្ឋាភិបាលគឺឱ្យមានការបិទល្បែងស៊ីសងអ៊ីចឹងទៅ គាត់បានទៅរារាំង ទៅជួបជាមួយក្លិបកីឡា គាត់យល់ថាអាហ្នឹងជាប្រភេទគេលេងល្បែងស៊ីសងអ៊ីចឹងទៅ។ អាហ្នឹងមួយដែលយើងសង្ឃឹមថាត្រូវការស្វែងយល់ឱ្យបានច្រើនពីគាត់ ប្រសិនបើគាត់ត្រូវការភស្ដុកតាង ត្រូវការអ្វីបញ្ចាក់ពីខាងសហព័ន្ធកីឡាអេឡិចត្រូនិកយើង យើងអាចផ្ញើបាន ហើយយើងក៏អាចបើកវគ្គបណ្ដុះបណ្ដាលធ្វើសិក្ខាសាលា អាចថាបំពាក់បំប៉នក៏បាន ការផ្សព្វផ្សាយក៏បាន ដើម្បីឱ្យគ្នាយើងទាំងអស់គ្នាទាំងផ្នែកឯកជន ទាំងផ្នែកអជ្ញាធរដែនដី សឹងតែក៏ដោយ ឱ្យគាត់ស្វែងយល់ថា អានេះជាកីឡាមួយមានការគ្រប់គ្រង មានបទដ្ឋានច្បាស់លាស់ ហើយមានច្បាប់ទម្លាប់ច្បាស់លាស់ ដែលត្រូវបានទទួលស្គាល់ពីខាងអូឡាំពិកជាតិយើង ក៏ដូចជាយើងបានចូលជាសមាគម ចូលជាសហព័ន្ធ ចូលជាសមាជិកនៅក្នុងអាស៊ីរហូតដល់ពិភពលោកទៅទៀត” ។
សូមបញ្ជាក់ផងដែរថា នៅស៊ីហ្គេមលើកទី៣២ដែលកម្ពុជាធ្វើជាម្ចាស់ផ្ទះក៏នឹងដាក់បញ្ជូលកីឡា E-Sport ផងដែរ ដោយមានវិញ្ញសា AK2 , Mobile Legend , PUBG អីជាដើម៕
