ការប្រកួតបាល់ទាត់ពិភពលោកឆ្នាំ ១៩៨៦ គឺជាការប្រកួតបាល់ទាត់ពិភពលោកលើកទី ១៣ ដែល​លេងនៅប្រទេសម៉ិកស៊ិកពីថ្ងៃទី ៣១ ឧសភា ដល់ថ្ងៃទី ២៩ ខែមិថុនា ឆ្នាំ ១៩៨៦។ ​ដើមឡើយកូឡុំប៊ីត្រូវបានជ្រើសរើសធ្វើជាម្ចាស់ផ្ទះ​ដោយ FIFA ប៉ុន្តែ​ដោយសារតែហេតុផលសេដ្ឋកិច្ច មិនអាចរៀបចំបាន ប្រទេសនេះបានលាលែងពីតំណែងនៅឆ្នាំ ១៩៨២។ ម៉ិកស៊ិកត្រូវបានជ្រើសរើសធ្វើជាម្ចាស់ផ្ទះថ្មីនៅខែឧសភា ឆ្នាំ ១៩៨៣ ហើយបានក្លាយជាប្រទេសដំបូងគេដែលធ្វើម្ចាស់ផ្ទះ​ World Cup ច្រើនជាងម្តង។

World Cup នេះឈ្នះដោយអាហ្សង់ទីន ជាពានរង្វាន់ទីពីររបស់ពួកគេបន្ទាប់ពីឈ្នះនៅឆ្នាំ ១៩៧៨។ អាហ្សង់ទីន​​ ដឹកនាំដោយកីឡាករ Diego Maradona អាយុ ២៥ឆ្នាំដែលបានដើរតួយ៉ាងសំខាន់ក្នុងភាពជោគជ័យរបស់ក្រុម ពិសេសការស៊ុតបាល់បញ្ចូលទី "Hand of God" ​ក្នុងវគ្គ ១/៤ ផ្តាច់ព្រ័ត្រ​ជាមួយ ប្រទេសអង់គ្លេស។ អ្នកចូលរួមសរុបគឺ ២៣៩៤០៣១នាក់ ស្របពេលប្រទេសកាណាដា ដាណឺម៉ាក និងអ៊ីរ៉ាក់ បានបង្ហាញខ្លួនជាលើកដំបូងនៅជុំចុងក្រោយ។

ទីក្រុងដែលរៀបចំ និងកីឡដ្ឋាន

ទីក្រុងចំនួន ១១ ត្រូវបានរៀបចំការប្រកួត Azteca ក្នុងទីក្រុងម៉ិកស៊ិក ដែលជាកីឡដ្ឋានធំជាងគេ​ បានរៀបចំការប្រកួតចំនួន ៩ ដង (រួមទាំងការប្រកួតវគ្គផ្តាច់ព្រ័ត្រ) ច្រើនជាងកីឡដ្ឋានផ្សេងទៀតដែលបានប្រើ។ ទីក្រុងម៉ិកស៊ិកធ្វើជាម្ចាស់ផ្ទះការប្រកួតសរុបចំនួន ១៣; កីឡដ្ឋាន Olimpico Universitario បានរៀបចំការប្រកួតចំនួន ៤។ Guadalajara ដែលជាទីក្រុងធំទីពីររបស់ម៉ិកស៊ិកធ្វើជាម្ចាស់ផ្ទះការប្រកួតសរុបចំនួន ១០ កីឡដ្ឋាន Jalisco ធ្វើជាម្ចាស់ផ្ទះ ៧ ប្រកួត កីឡដ្ឋាន Tres de Marzo នៅ Zapopan ធ្វើជាម្ចាស់ផ្ទះ ៣ប្រកួត Monterrey ធ្វើជាម្ចាស់ផ្ទះ ៨ ប្រកួត កីឡដ្ឋាន Tecnologico និងកីឡដ្ឋាន Universitario នៅ San Nicolas de los Garza ធ្វើជាម្ចាស់ផ្ទះ ៤ ប្រកួត​ ហើយកីឡដ្ឋាន Cuauhtémoc ក្នុងទីក្រុង Puebla បានរៀបចំការប្រកួតចំនួន ៥។

ក្រុមដែលចូលរួម

ការ​ប្រកួត​ជម្រុះ​ទាំង ២៤ ក្រុម​ត្រូវ​បាន​បែង​ចែក​ជា​បួន​ពូល​ដែល​បាន​បង្កើត​មូលដ្ឋាន​នៃ​ការ​ចាប់​ឆ្នោត​សម្រាប់​វគ្គ​ចែក​ពូល។ ក្រុមដែលចូលរួមមានដូចជា៖ ម៉ិកស៊ិក (ម្ចាស់ផ្ទះ) ​អ៊ីតាលី អាល្លឺម៉ង់ខាងលិច ប៉ូឡូញ បារាំង ប្រេស៊ីល អង់គ្លេស សហភាព​សូវៀត អេស្ប៉ាញ អាហ្សង់ទីន ប៉ារ៉ាហ្គាយ អ៊ុយរូហ្គាយ កាណាដា ដាណឺម៉ាក អាល់ហ្សេរី ម៉ារ៉ុក អ៊ីរ៉ាក់ កូរ៉េខាងត្បូង បែលហ្សិក ប៊ុលហ្គារី ហុងគ្រី អ័​រ​ឡង់​ខាងជើង ព័រទុយហ្គាល់ និងស្កុតឡេន។

វគ្គផ្ដាច់ព្រ័ត្រ

អាហ្សង់ទីន​ បានប៉ះជាមួយអាល្លឺម៉ង់ខាងលិចនៅ​វគ្គ​ផ្ដាច់ព្រ័ត្រ​ នៅកីឡដ្ឋាន Azteca ដែលជា​លើក​ទី​ពីរ​ កីឡដ្ឋាន​ដ៏​ធំ​នេះ​​ធ្វើ​ជា​ម្ចាស់​ផ្ទះ​វគ្គ​ផ្ដាច់ព្រ័ត្រ World Cup (លើក​ដំបូង​ក្នុង​ឆ្នាំ ១៩៧០)។ Jose Brown បានជួយអាហ្សង់ទីនរកបាន ១គ្រាប់នៅពាក់កណ្តាលវគ្គទីមួយ ហើយ Jorge Valdano រកបានមួយគ្រាប់ទី ២ នៅនាទីទី ៥៥ ឲ្យអាហ្សង់ទីន។

អាហ្សង់ទីនដែលសង្ឃឹមខ្ពស់សម្រាប់ជ័យជម្នះបែរជាភ្លាត់ឲ្យអាល្លឺម៉ង់តាមស្មើបានវិញ រកបានដោយ Karl-Heinz Rummenigge ​នៅនាទីទី ៧៤ ហើយ ៦ នាទីក្រោយមក Rudi Völler បានវាយបកតាមស្មើ។ យ៉ាងណានៅសល់រយៈពេល ៧នាទីមុនចប់ការប្រកួត​ Maradona បានបង្កើតឱកាសឱ្យ Jorge Burruchaga ស៊ុតគ្រាប់ជ័យជម្នះឱ្យអាហ្សង់ទីន។ ៨ឆ្នាំក្រោយពីជ័យជម្នះក្នុងទឹកដីរបស់ខ្លួន អាហ្សង់ទីនបានឈ្នះជើងឯកពិភពលោក ម្ដងទៀត ហើយមនុស្ស ៣០លាននាក់ក្នុងប្រទេសអាហ្សង់ទីនបានអបអរនៅតាមផ្លូវ។

កីឡាករលេចធ្លោ

Diego Armando Maradona គឺជាកីឡាករដែលលេចធ្លោជាងគេសម្រាប់ World Cup លើកនេះ។ កើតនៅថ្ងៃទី ៣០ ខែតុលា ឆ្នាំ១៩៦០ លោកគឺជាកីឡាករបាល់ទាត់អាជីពអាហ្សង់ទីន និងជាអ្នកចាត់ការទូទៅ។ Maradona ត្រូវចាត់ទុកយ៉ាងទូលំទូលាយថាជាកីឡាករដ៏អស្ចារ្យបំផុតក្នុងប្រវត្តិសាស្ត្រកីឡា ស្ថិតក្នុងចំណោមអ្នកឈ្នះពានរង្វាន់ FIFA Player of the 20th Century Award។ Maradona ទទួលបានរហស្សនាមថា El Pibe de Oro "The Golden Boy" ដែលជាឈ្មោះរហស្សនាមរបស់គាត់ពេញមួយអាជីព​៕