ទូតឥណ្ឌាប្រចាំកម្ពុជា ទូរស័ព្ទសុំទោស ឯ.ឧ សៅ សុខា និងស្នើសុំជួបទទួលទានកាហ្វេជាមួយ ក្រុមជម្រើសជាតិកម្ពុជា

2022-06-09 12:02:12
បាល់ទាត់

2022-06-09 12:02:12
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកជំទាវ ទេស្ប៉ានី យុប្រាហ្គឺដ (Devyani Khobragade) ឯកអគ្គរដ្ឋទូតឥណ្ឌាប្រចាំនៅកម្ពុជា បានទូរស័ព្ទសុំទោស ឯកឧត្ដមនាយឧត្តមសេនីយ៍ សៅ សុខា ប្រធានសហព័ន្ធបាល់ទាត់កម្ពុជា ពាក់ព័ន្ធនឹងបញ្ហាទទួលក្រុមជម្រើសជាតិបាល់ទាត់កម្ពុជាមិនបានសមរម្យមុនពេលការប្រកួត និងជាពិសេសគឺការចាក់ភ្លេងជាតិកម្ពុជាមិនបាន ខណៈដែលឥណ្ឌាជាម្ចាស់ផ្ទះនៃការប្រកួត ពានរង្វាន់ AFC Asian Cup 2023 Qualifiers Final Round។ នេះយោងការបញ្ជាក់ផ្ទាល់របស់ឯកឧត្ដមនាយឧត្តមសេនីយ៍ទៅកាន់សារព័ត៌មាន Fresh News នៅល្ងាចថ្ងៃទី០៩ ខែមិថុនា ឆ្នាំ២០២២។

ឯកឧត្ដមនាយឧត្តមសេនីយ៍ សៅ សុខា បានបញ្ជាក់ថា លោកជំទាវឯកអគ្គរដ្ឋទូតឥណ្ឌាប្រចាំនៅកម្ពុជា បានទូរស័ព្ទមកឯកឧត្ដមហើយបានថ្លែងថា ៖"ខ្ញុំបានបញ្ជូនព័ត៌មានដែលកម្ពុជាអាក់អន់ចិត្ត ចំពោះសហព័ន្ធបាល់ទាត់ឥណ្ឌា ដែលរៀបចំមិនបានល្អលើការស្នាក់នៅកីឡាករកម្ពុជា ក៏ដូចជាបញ្ហាចាក់ភ្លេងជាតិកម្ពុជានៅពេលចាប់ផ្តើមប្រកួត ព្រមទាំងសម្តែងការសុំទោសចំពោះកំហុសឆ្លងនេះ "។ នាយឧត្តមសេនីយ៍ សៅ សុខា បានបន្ថែមថា បន្ទាប់ពីមានការសុំអភ័យទោសហើយនោះ លោកស្រីឯកអគ្គរដ្ឋទូតឥណ្ឌា ក៏ស្នើសុំជួបទទួលទានកាហ្វេជុំគ្នាជាមួយ ក្រុមបាល់ទាត់ជម្រើសជាតិកម្ពុជាផងដែរ ក្រោយត្រឡប់មកមាតុប្រទេសវិញ។

សូមរំលឹកផងដែរកាលពីរសៀល ថ្ងៃទី០៨ ខែមិថុនា ឆ្នាំ២០២២នេះ ឯកឧត្ដមនាយឧត្តមសេនីយ៍ សៅ សុខា ប្រធានសហព័ន្ធបាល់ទាត់កម្ពុជាព្រមានតាម Fresh News ដោយបានប្រកាសទុករយៈពេល៣ម៉ោងឲ្យ សហព័ន្ធកីឡាបាល់ទាត់អាស៊ី (AFC) និងសហព័ន្ធបាល់ទាត់ឥណ្ឌា រួមទាំងអ្នករៀបចំការប្រកួត ត្រូវធ្វើលិខិតសុំទោសកម្ពុជាជាបន្ទាន់ ពាក់ព័ន្ធនឹងរឿងមិនបានខ្វល់អ្វីទាល់តែសោះ ចំពោះការទទួលក្រុមជម្រើសជាតិបាល់ទាត់កម្ពុជា ទាំងអាហារ ការស្នាក់នៅ រួមទាំងទង់ជាតិរបស់កម្ពុជាផងដែរ កីឡាករកម្ពុជាត្រឡប់មកមាតុភូមិ ដោយមិនធ្វើការប្រកួតនោះទេ ជាលទ្ធផលខាងពួកគេក៏ចេញសំបុត្រសុំទោស។

យ៉ាងណាអ្វីដែលធ្វើឲ្យបញ្ហាកាន់តែរសើបទៀតនោះគឺ នៅពេលការប្រកួតតទល់នឹងរវាងនឹងឥណ្ឌា និងកម្ពុជាយប់មិញនេះ គឺឥណ្ឌាចាក់ភ្លេងជាតិកម្ពុជាមិនបាន ដោយចេញសំបុត្រថាដោយសារកំហុសបច្ចេកទេស ដែលធ្វើឲ្យកម្ពុជាមានការមិនពេញចិត្តយ៉ាងខ្លាំងចំពោះទង្វើទាំងនេះ។

ក្នុងការប្រកួតកាលពីយប់មិញ កម្ពុជាចាញ់ឥណ្ឌា ២-០ យ៉ាងណាកម្ពុជាត្រូវប្រកួតជាបន្តទៀតជាមួយនឹង ហុងកុង និងអាហ្វហ្គានីស្ថាន៕