នៅ​ក្នុង​ព្រឹត្តិការណ៍​ស៊ីហ្គេម​លើក​ទី​៣១ ដែល​ប្រព្រឹត្តិ​ទៅ​នៅ​ទី​ក្រុម​ហាណូយ​ ប្រទេស​វៀតណាម​ ឆ្នាំ​២០២២នេះ​ កម្ពុជា​រក​បាន​មេដាយ​មាស​៩គ្រឿង​ ដែល​ជា​ច្រើន​បំផុត​ក្នុង​ប្រវត្តិសាស្ត្រ​របស់​ប្រទេស​មួយ​នេះ​ បើ​គិត​ពី​ការ​ចូល​រួម​ក្រោយ​ឆ្នាំ​១៩៧៣មក ខណៈ​ចំនួន​ឈ្នះ​មេដាយ​សុរប​ ៦៣គ្រឿង (មាស៩ ប្រាក់១៣ និងសំរឹទ្ធ៤១)​ ជា​ចំនួន​មួយ​ច្រើន​ជាង​ពេល​ណា​ទាំង​អស់​ ចាប់​ពី​កម្ពុជា​ចូល​រួម​ការ​ប្រកួត​ក្នុង​ព្រឹត្តិការណ៍​នេះ​ជា​លើក​ដំបូង​ចាប់​ពី​ឆ្នាំ​១៩៦១មក។

មុន​កម្ពុជា​មាន​សង្គ្រាម​កើត​ឡើង​ នៅ​ក្នុង​ព្រឹត្តិការណ៍​ស៊ីហ្គេម​នេះ​ កម្ពុជា​រក​បាន​មេ​ដាយ​មាស​រហូត​ដល់​ពីរ​ខ្ទង់​គឺ​ ក្នុង​ស៊ីហ្គេម​លើក​ទី​៣ (ឆ្នាំ​១៩៦៥) រក​បាន​មេដាយ​មាស​ចំនួន​១៥គ្រឿង​ ស៊ីហ្គេម​លើក​ទី​៦​ (ឆ្នាំ​១៩៧១) រក​បាន​មេដាយ​មាស​ចំនួន​១៧​គ្រឿង​ និង​ស៊ីហ្គេម​លើក​ទី​៧ (ឆ្នាំ​១៩៧៣) រក​បាន​មេដាយ​មាស​ចំនួន​៩​គ្រឿង​។

ចាប់​ពី​ស៊ីហ្គេម​ លើក​ទី​៨ ដល់​ទី១១​ (ពី​ឆ្នាំ​១៩៧៥-១៩៨១) កម្ពុជា​មិន​បាន​បញ្ជូន​អត្តពលិក​ទៅ​ចូលរួម​ប្រកួត​ទេ​ដោយ​សារ​សង្គ្រាម​។ ស៊ីហ្គេម​ លើក​ទី១២ និង​លើក​ទី​១៣​ កម្ពុជា​បាន​ចាប់​ផ្តើម​បញ្ជូន​អត្តពលិក​ទៅ​ចូល​រួម​ប្រកួត​ជា​ថ្មី​ ប៉ុន្តែ​មិន​ទទួល​បាន​មេដាយ​ឡើយ​ ហើយ​ស៊ីហ្គេម​ លើក​ទី​១៤​ ឆ្នាំ​១៩៨៧​ ទើប​កម្ពុជា​រក​បាន​មេដាយ​។

ខាង​ក្រោម​នេះ​ជា​មេដាយ​ដែល​កម្ពុជា​រក​បាន​ក្នុង​ស៊ីហ្គេម​នី​មួយៗ​៖

• លើកទី២ ឆ្នាំ១៩៦១៖ មាស១ ប្រាក់៦ សំរឹទ្ធ ៥ សរុប ១១
• លើកទី៣ ឆ្នាំ១៩៦៥៖ មាស១៥ ប្រាក់១៩ សំរឹទ្ធ១៧ សរុប ៥១
• លើកទី៦ ឆ្នាំ១៩៧១៖ មាស១៧ ប្រាក់១៨ សំរឹទ្ធ១៨ សរុប ៥៣
• លើកទី៧ ឆ្នាំ១៩៧៣៖ មាស៩ ប្រាក់១២ សំរឹទ្ធ៣០ សរុប ៥១
• លើកទី១៤ ឆ្នាំ១៩៨៧៖ ប្រាក់១ សំរឹទ្ធ៩ សរុប ១០
• លើកទី១៨ ឆ្នាំ១៩៩៥៖ សំរឹទ្ធ ២ សរុប ២
• លើកទី១៩ ឆ្នាំ១៩៩៧៖ សំរឹទ្ធ៦ សរុប ៦
• លើកទី២១ ឆ្នាំ២០០១៖ មាស១ ប្រាក់១ សំរឹទ្ធ៥ សរុប ៧
• លើកទី២២ ឆ្នាំ២០០៣៖ មាស១ ប្រាក់៥ សំរឹទ្ធ១១ សរុប ១៧
• លើកទី២៣ ឆ្នាំ២០០៥៖ ប្រាក់៣ សំរឹទ្ធ៩ សរុប ១២
• លើកទី២៤ ឆ្នាំ២០០៧៖ មាស២ ប្រាក់៥ សំរឹទ្ធ១១ សរុប ១៨
• លើកទី២៥ ឆ្នាំ២០០៩៖ មាស៣ ប្រាក់១០ សំរឹទ្ធ២៧ សរុប ៤០
• លើកទី២៦ ឆ្នាំ២០១១៖ មាស៤ ប្រាក់១១ សំរឹទ្ធ២៤ សរុប ៣៩
• លើកទី២៧ ឆ្នាំ២០១៣៖ មាស៨ ប្រាក់១១ សំរឹទ្ធ២៨ សរុប ៤៧
• លើកទី២៨ ឆ្នាំ២០១៥៖ មាស១ ប្រាក់៥ សំរឹទ្ធ៩ សរុប ១៩
• លើកទី២៩ ឆ្នាំ២០១៧៖ មាស៣ ប្រាក់២ សំរឹទ្ធ១២ សរុប ១៧
• លើកទី៣០ ឆ្នាំ២០១៩៖ មាស៤ ប្រាក់៦ សំរឹទ្ធ៣៦ សរុប ៤៦
• លើកទី៣១ ឆ្នាំ២០២១ (លើកមក២០២២) ៖ មាស៩ ប្រាក់១៣ សំរឹទ្ធ៤១ សរុបចំនួន ៦៣៕

ប្រភព៖ Cambodia 2023