- 2022-05-11 03:07:11
- បាល់ទាត់
ស្ទើរស្រក់ទឹកភ្នែក! ឬទ្ធី សំណាង ១៥ឆ្នាំជាមួយបាល់ទាត់ខ្មែរអស់ប្រាក់រាប់លានដុល្លារ ព្រោះមិនចង់ឱ្យបរទេសមើលងាយ
- 2022-05-11 03:07:11
- ចំនួនមតិ 0 | ចំនួនចែករំលែក 0
ស្ទើរស្រក់ទឹកភ្នែក! ឬទ្ធី សំណាង ១៥ឆ្នាំជាមួយបាល់ទាត់ខ្មែរអស់ប្រាក់រាប់លានដុល្លារ ព្រោះមិនចង់ឱ្យបរទេសមើលងាយ
ចន្លោះមិនឃើញ
ជាដំណឹងដ៏គួរឱ្យសោកសៅមួយសម្រាប់វិស័យបាល់ទាត់ខ្មែរ និងអ្នកគាំទ្រទាំងអស់ ដែលបានដឹងថាលោកឧកញ៉ា ឬទ្ធី សំណាង ប្រធានក្លឹបបាល់ទាត់ភ្នំពេញក្រោនបានទទួលអនិច្ចកម្មនាថ្ងៃទី១១ ខែឧសភា ឆ្នាំ២០២២នេះដោយរោគាពាធ។
លោកឧកញ៉ាត្រូវបានគ្រប់គ្នាស្គាល់ច្បាស់ថាជាអ្នកស្រលាញ់វិស័យបាល់ទាត់ខ្មែរពិតៗ ដោយលោកបានក្លាយជាប្រធានក្លឹបភ្នំពេញក្រោននៅឆ្នាំ២០០៨ ដោយកាលនោះក្លឹបមានឈ្មោះថា Phnom Penh Empire។ ចូលកាន់តំណែងភ្លាម បុរសដែលគ្រប់គ្នាដឹងថាប្រឹងប្រែងពីបាតដៃទទេ រហូតក្លាយជាអ្នកមានបាន និងមុខរបរច្រើនក្នុងដៃ បានអភិវឌ្ឍក្លឹបនេះឱ្យងើបឡើងវិញ។ ដោយកាលនោះ លោកបានរៀនសូត្រ និងជួលគ្រូជាច្រើនមកបង្ហាត់ជាថ្នាលយុវជន កសាងជាក្លឹបអាជីព មានកីឡដ្ឋាន កន្លែងហ្វឹកហាត់ត្រឹមត្រូវ។ រហូតដល់ភ្នំពេញក្រោនក្លាយជាក្លឹបធំជាងគេនៅកម្ពុជា ដោយឈ្នះពានរង្វាន់លីគកំពូលជាច្រើន។
ជះលុយមួយឆ្នាំៗមិនក្រោម៥០ម៉ឺនដុល្លារ លោកឧកញ៉ា ឬទ្ធី សំណាង ក៏ធ្លាប់មានបំណងចង់បោះបង់ចោលដែរចំពោះការដាក់ទុនលើវិស័យបាល់ទាត់នេះ តែដោយសារចង់ឱ្យកូនខ្មែរមានអនាគត និងវិស័យបាល់ទាត់ខ្មែរអាចប្រកួតប្រជែងជាមួយបរទេសបាន ទើបលោកតែងតែបន្ដជាដរាបមក។ ដោយមានទាំងក្រុមនារីផង ក្រុមបុរសផង និងមានកីឡដ្ឋានផ្ទាល់ខ្លួនស្ដង់ដារតម្លៃជាង១លានដុល្លារថែមទៀត។
បុរសដែលចេញរកស៊ីតាំងពីអាយុ១៦ឆ្នាំខាងលើធ្លាប់អះអាងថាលោកមិនចង់បានប្រាក់ចំណេញអ្វីពីបាល់ទាត់នោះទេ តែលោកធ្វើដើម្បីអនាគតក្មេងៗដែលស្រលាញ់បាល់ទាត់។ លោកចង់ប្រាប់គ្រប់គ្នាថា អ្នកលេងបាល់ទាត់មិនមែនអត់អនាគតឡើយ នៅថ្ងៃណាមួយគ្រប់គ្នានឹងដឹងថាអាជីពបាល់ទាត់ក៏អាចរស់ស្រួលបានដែរ លេងបាល់ទាត់ក៏មានអនាគតដែរ។ ហើយចំណុចមួយដែលលោកចង់បានវិញចំពោះការវិនិយោគនេះ គឺមុខមាត់ខ្មែរលើឆាកអន្ដរជាតិ មិនឱ្យបរទេសមើលស្រាលបាននោះទេ។
តែពេលវេលាសោកសៅក៏បានមកដល់ នៅថ្ងៃទី ១១ខែឧសភាឆ្នាំ២០២២នេះ លោកឧកញ៉ា ឬទ្ធី សំណាង បានទទួលអនិច្ចកម្មទៅហើយ។ វាជាដំណឹងដែលគ្រប់គ្នាសឹងមិនអាចទទួលយកបាន ចំពោះការបាត់បង់មនុស្សដែលស្រលាញ់បាល់ទាត់ចេញពីចិត្តបែបនេះ។ តែយ៉ាងណា អ្វីដែលលោកចង់ឃើញនោះ ក៏បានចេញផ្លែផ្កាខ្លះហើយដែរ។ ក្រុមភ្នំពេញក្រោន ទាំងប្រុសទាំងស្រី សុទ្ធតែក្លាយជាកីឡាករអាជីព មានប្រាក់ខែសមរម្យ។ ជម្រើសជាតិកម្ពុជាវិញ ដែលមានថ្នាលចេញពីក្រោនច្រើននាក់ដែរនោះ ក៏អាចលើកមុខមាត់ជាតិ អាចប្រកួតប្រជែងជាមួយក្រុមប្រទេសដទៃទៀតបានដែរ៕
