Everton មានគម្រោងទុក Lampard ធ្វើជាអ្នកចាត់ការក្លឹបដដែល

2022-04-08 11:18:06
បាល់ទាត់

2022-04-08 11:18:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹប Everton មានគម្រោងទុក លោក Frank Lamprad ជាអ្នកចាត់ការក្លឹបដដែលនៅខណៈនេះ ទោះជាមានអ្នកគាំទ្រទាមទារឲ្យបណ្ដេញចេញដោយសារតែលទ្ធផលដឹកនាំមិនបានល្អ។ នេះបើយោងតាមការចុះផ្សាយរបស់ Sky Sports នៅក្នុងថ្ងៃនេះ។

តាំងពីចូលដឹកនាំ Everton តាំងពីចុងខែមករា ឆ្នាំ២០២២កន្លងទៅនេះមក លោក Lampard ដឹកនាំចាញ់ ៧ប្រកួត ក្នុងចំណោម៩ប្រកួតក្នុងក្របខ័ណ្ឌ Premier League ដោយនៅខណៈនេះក្លឹបនេះកំពុងឈរនៅចំណាត់ថ្នាក់ទី១៧ ដោយលើសតែ១ពិន្ទុលើក្លឹប Burnley ដែលកំពុងឈរនៅចំណាត់ទី១៨ ក្នុងតំបន់កាត់ចោលប៉ុណ្ណោះ។

Everton នៅតែសល់ ៩ប្រកួតក្នុងក្របខ័ណ្ឌ PL ប៉ុណ្ណោះដោយត្រូវធ្វើយ៉ាងណាឲ្យទទួលបានលទ្ធផលល្អក្នុងប្រកួតទាំងនោះ ទើបអាចបន្តឈរជើងបន្តលេងនៅលីគកំពូលនេះបាននៅរដូវកាលក្រោយទៀត ដោយអ្នកគាំទ្រហាក់ដូចជាមិនទុកចិត្ត និងមើលឃើញឱកាសតិចតួចទាំងនេះទើបចង់ឲ្យក្លឹបប្ដូរអ្នកចាត់ការថ្មី។

យ៉ាងណាថ្នាក់ដឹកនាំ Everton នៅខណៈនេះមិនជឿជាក់ថាប្ដូរអ្នកចាត់ការអាចដោះស្រាយបញ្ហានោះទេ ដោយនៅតែបន្តផែនការទុកលោក Lampard ដដែលប៉ុន្តែគម្រោងនឹងប្រែប្រួលប្រសិនបើលទ្ធផលនៅតែបន្តមិនល្អប្រសើរ។

គួរបញ្ជាក់ផងដែរថា Everton មិនដែលធ្លាប់ត្រូវកាត់ចោលពីលីគកំពូលឡើយចាប់តាំងពីឆ្នាំ១៩៥១៕

ប្រភព៖ Sky Sports ប្រែសម្រួល៖ ហ៊ីម រស្មី