ម៉េងហ៊ួង ជឿថា ខ្លួននិង ឌូក នឹងលេងយល់ចិត្តគ្នាជាងមុននៅស៊ីហ្គេមឆ្នាំនេះ

2022-04-04 03:26:56
បាល់ទះ

2022-04-04 03:26:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ធី ម៉េងហ៊ួង ស្មាត់ស្ដាំរបស់ក្រុមជ្រើសជាតិឆ្នេរខ្សាច់កម្ពុជា នឹងចាប់ដៃគូគ្នាជាមួយ ជុក សោភា ហៅឌូក លេងនៅព្រឹត្តិការណ៍ស៊ីហ្គេមឆ្នាំនេះនៅវៀតណាម សម្រាប់ការប្រកួតបាល់ទះឆ្នេរខ្សាច់វិញ្ញាសា ២ស្មើ ហើយឆ្នាំនេះស្មាត់របស់មហាផ្ទៃជឿថា ខ្លួន នឹងលេងយល់ចិត្តគ្នាបានល្អជាងកាលស៊ីហ្គេមលើកមុន។

ធី ម៉េងហ៊ួង និង ឌូក កាលលេងស៊ីហ្គេម ២០១៩

យុវជនវ័យក្មេងទើបតែឈានចូលវ័យ២០ឆ្នាំរូបនេះបានឲ្យដឹងថា «ឆ្នាំនេះខ្ញុំសង្ឃឹមថា យើងនឹងធ្វើបានល្អជាងមុនបង ព្រោះអីយើងហាត់លេងយល់ចិត្តគ្នាល្អជាងមុន។ ខ្ញុំមើលឃើញថា យើងអាចលេងយល់ចិត្តគ្នាបានចន្លោះពី ៦០ ទៅ ៧០ % ។ អ្វីដែលពិសេសឆ្នាំនេះយើងទាំងពីរនាក់អាចបាំងល្អជាងមុន និងផ្ដាច់បានល្អជាងមុន»។

ការហ្វឹកហាត់របស់អ្នកទាំងពីរខាងលើបានចាប់ផ្ដើមកាលខែមេសា ឆ្នាំ២០២១ មក ដើម្បីត្រៀមស៊ីហ្គេមនៅវៀតណាមនេះ។ ព្រឹត្តិការណ៍ស៊ីហ្គេមឆ្នាំនេះនៅវៀតណាម នឹងធ្វើឡើងចន្លោះពីថ្ងៃទី១២ ដល់ថ្ងៃទី២៣ ខែឧសភា ឆ្នាំ២០២២ ខណៈ ដែលការប្រកួតសម្រាប់វិញ្ញាសាបាល់ទះឆ្នេរខ្សាច់ នឹងចាប់ផ្ដើមពីថ្ងៃទី១៥ ដល់ថ្ងៃទី ២០ ខែឧសភា ឆ្នាំ២០២២។ សម្រាប់ស៊ីហ្គេមឆ្នាំ២០១៩ ដែលបានធ្វើឡើងនៅហ្វីលីពីន កម្ពុជាមិនបានឡើងដល់វគ្គពាក់កណ្ដាលផ្ដាច់ព្រ័ត្រទេ ពោលគឺធ្លាក់ក្នុងពូល ដែលកាលនោះគឺ ឥណ្ឌូណេស៊ី ឈ្នះមេដាយមាស ថៃឈ្នះមេដាយប្រាក់ និង ហ្វីលីពីន ឈ្នះមេដាយ សំរឹទ្ធ៕

អត្ថបទ៖ ស្រី សុវណ្ណដារ៉ា