សុស៊ីដាន ចាប់ផ្ដើមលេងក្លឹបអាជីពត្រឹម២ឆ្នាំសោះ តែវិវឌ្ឍន៍ខ្លួនលឿនបានជាប់ជម្រើសជាតិ

2022-03-16 03:15:15
បាល់ទាត់

2022-03-16 03:15:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើប្រយុទ្ធជម្រើសជាតិកម្ពុជាក្រោមអាយុ២៣ឆ្នាំ និងទ័ព ញាណ សុស៊ីដាន បានចាប់ផ្ដើមលេងក្លឹបអាជីពត្រឹម២ឆ្នាំ ពោលគឺចាប់ផ្ដើមលេងឈុតយុវជនរបស់ទ័ពបានមួយឆ្នាំ និងលេងឈុតធំ១ឆ្នាំក៏បានជាប់ជម្រើសជាតិក្រោមអាយុ២៣ឆ្នាំ និងឈុតធំ កាលពីពេលថ្មីៗនេះ។

កីឡាករដែលមានដើមកំណើតមកពីខេត្តស្វាយរៀងខាងលើបានរៀបរាប់ពីប្រវត្តិនៃការលេងបាល់របស់ខ្លួនថា កាលនៅក្មេងៗលេងធម្មតាៗតាមភូមិស្រុកគ្រាន់តែចូលចិត្តលេងបាល់ និងទទួលបានការបង្ហាត់បង្រៀនតិចតួចពីគ្រូបង្វឹកនៅស្រុកកំណើត។ ដល់វ័យ១៤-១៥ឆ្នាំ ស៊ីដាន ក៏បានចាប់ផ្ដើមលេងឲ្យក្រុមអធិការក្រុងបាវិតដែលពេលនោះលេងក្នុងពាន ស្វាយរៀងខាប់ នាឆ្នាំ២០១៨។

យុវជនខាងលើបាននិយាយថា «កាលហ្នឹងឆ្នាំ២០១៨ ខ្ញុំលេងឲ្យពានស្វាយរៀងខាប់ ហើយគិតថាចង់ស្វែងរកក្លឹបអាជីព១ដើម្បីលេងហ្នឹងគេ។ គាប់ជួនពេលនោះទ័ពគេប្រកាសជ្រើសរើសយុវជនក៏មកធ្វើតេស្ត ហើយបានជាប់ក៏លេងឈុតយុវជនរបស់ទ័ពដោយលេងលីគទី២។ ការចាប់ផ្ដើមលេងលីគទី២នោះគឺនៅឆ្នាំ២០២០។ ក្រោយមកលេងលីគទី២បានមួយឆ្នាំគ្រូឃើញថា ខ្ញុំល្អក៏ចុចឈ្មោះឲ្យលេងលីគកំពូលនៅឆ្នាំ២០២១តែម្ដង ហើយក៏បានជាប់ជម្រើសជាតិជាតិ U23 ទៅលេងពាន AFC U23 Asian Cup និង ឈុតធំទៅលេង Suzuki Cup ព្រមទាំងបានជាប់ជម្រើសជាតិឈុតយុវជនលេងពាន AFF ថ្មីៗនេះ»។

ស៊ីដាន កើតថ្ងៃទី១០ ខែវិច្ឆិកា ឆ្នាំ ២០០២ ទីកន្លែងកំណើតនៅភូមិបាវិត ខេត្តស្វាយរៀង។ គេមានបងប្អូនពីរនាក់ជាកូនទី១ក្នុងគ្រួសារមានឪពុកឈ្មោះ សាំង ដា ម្ដាយឈ្មោះ ឌុក សុភ័ក្ត្រ ៕