ស្មាត់ប៉ា ប៉ះ បន្ទាយឈើ នឹងធ្វើឱ្យកក្រើកក្រុងបាត់ដំបងថ្ងៃសុក្រស្អែកនេះ

2022-03-03 02:36:22
បាល់ទះ

2022-03-03 02:36:22
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីលេងក្រៅផ្លូវការ៣ស្មើចាញ់ក្រុមបន្ទាយឈើនៅខេត្តសៀមរាបកាលពីពេលកន្លងទៅ រ៉ាន់ ទូច ហៅស្មាត់ប៉ា បានបាត់មុខមួយរយៈពីសង្វៀនបាល់ទះ។ យ៉ាងណាបើតាមព័ត៌មានច្បាស់ការដែល Sabay ទទួលបានថ្មីៗនេះ ស្មាត់កំពុងឡើងកូដមកពីខេត្តពោធិ៍សាត់នឹងចេញប្រយុទ្ធតតាំងជាមួយក្រុមបន្ទាយឈើនៅថ្ងៃសុក្រទី៤ ខែមីនា ឆ្នាំ២០២២ ស្អែកនេះហើយ។

បន្ទាយឈើ VS ប៉ា

ជំនួបបីស្មើរវាងក្រុមស្មាត់ប៉ា និងបន្ទាយឈើត្រូវបានគេមើលឃើញថា ជាជំនួបដ៏ធំមួយដែលនឹងក្រសោបបានអ្នកទៅទស្សនាផ្ទាល់ និងតាមរយៈកញ្ចក់ទូរសព្ទយ៉ាងច្រើនកក្រើកក្រុងបាត់ដំបង។

បើផ្អែកតាមសម្ដីរបស់អេតមីនស្រួច អ្នកឡាយបាល់ទះដ៏ល្បីមួយរូបបានប្រាប់មកកាន់ Sabay ថាគូនេះគឺធំណាស់ ហើយបើឡាយផ្ទាល់អាចនឹងផ្ទុះ View ខ្លាំង។ ថ្ងៃសុក្រស្អែកនេះ អ្នកឡាយមានដើមកំណើតមកពីខេត្តកំពតនឹងទៅឡាយផ្ទាល់ ដើម្បីផ្ដិតយករូបភាពចែកជូនប្រិយមិត្តទស្សនា។

អេតមីនស្រួច

ដោយឡែកអេតមីន ខេន អ្នកឡាយបាល់ទះដ៏មានប្រជាប្រិយភាពមួយរូបដែរនោះ ក៏បានលើកឡើងដែរថាគូនេះអ្នកទស្សនាចាប់អារម្មណ៍ និងចង់មើលខ្លាំង ព្រោះស្មាត់ប៉ាអាក់ខានលេងក្រៅផ្លូវការយូរហើយដែរ។ ម្យ៉ាងស្មាត់ប៉ាបាននឹងកំពុងតែហ្វឹកហាត់នៅក្រុមបាល់ទះកងអន្តរាគមន៍ចល័ត ៩៩៩ នៃក្លឹបបញ្ជាការដ្ឋានអង្គរក្ស ដែលគេអាចនឹងមានបច្ចេកទេស និងសមត្ថភាពរីកចម្រើនល្អជាងមុន និងជាអ្វីអ្នកគាំទ្រចង់ឃើញ។ លោកថាគូបីស្មើនេះនឹងទាក់ទាញអ្នកទស្សនាបានច្រើនកុះករ។

អេតមីនខេន

គួរបញ្ជាក់ថា ក្រុមរបស់ស្មាត់ប៉ាមាន ប៉ា សមុទ្រ និងក្ដឹបប៉ះសេ ចំណែកក្រុមបន្ទាយឈើមានបន្ទាយឈើ ចាវ ជឺឡុង និងឆ្លាំងប៉ះសេ។ ការប្រកួតដូរទឹកដីគ្នានេះធ្វើឡើងនៅតារាងបាល់ទះ SL ក្រុងបាត់ដំបងវេលាម៉ោង ១២ ថ្ងៃត្រង់។ ចុះអ្នកយល់ថាជំនួបខាងលើនេះ នឹងក្រសោបបានអ្នកទស្សនាច្រើនដែរឬទេ?

អត្ថបទ៖ អ៊ុំ សុភក្តិ