ឈឿង វីស៊ីនុ៖ ខ្ញុំចង់ជាប់ឈ្មោះ២៨នាក់ U23

2022-02-09 07:48:15
បាល់ទះ

2022-02-09 07:48:15
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ ឈឿង វីស៊ីនុ បានបង្ហើបប្រាប់ Sabay នៅថ្ងៃនេះថាគេចង់ជាប់ឈ្មោះនៅក្នុងបញ្ជី U23 ជម្រើសជាតិកម្ពុជា២៨នាក់ចុងក្រោយ ដើម្បីមានឱកាសហ្វឹកហាត់ និងជួយគោព្រៃជំទង់ឱ្យទទួលបានលទ្ធផលល្អ។

ខ្សែការពាររបស់ក្លឹបបាល់ទាត់អគ្គិសនីកម្ពុជា បានរៀបរាប់ថា ៖«ក្ដីរំពឹងទី១ ចង់ជាប់ឈ្មោះ២៨នាក់ ហើយនឹងខំប្រឹងហាត់ឱ្យមានឈ្មោះលេង ដើម្បីបានជួយជម្រើសជាតិឱ្យមានលទ្ធផលល្អ»។

ការជម្រុះកីឡាករក្នុងចំណោមបេក្ខជន U23 កម្ពុជា ធ្វើឡើងចំនួន២ដំណាក់កាល។ ដំណាក់កាលទី១ មានកីឡាករ៧៤នាក់មកពី១៨ក្លឹបនិងសមាគម។ ដំណាក់កាលទី២ មានកីឡាករ៣៦នាក់ ហើយដំណាក់កាលទី២នេះ ត្រូវហ្វឹកហាត់ និងធ្វើតេស្ដនៅពហុកីឡដ្ឋានមរតកតេជោ មុនចម្រាញ់យក២៨នាក់ចុងក្រោយ។

ការណ៍មានឈ្មោះក្នុងការធ្វើតេស្តនេះ កីឡាករមានដើមកំណើតនៅភ្នំពេញ បានប្ដាជ្ញាខំប្រឹងឱ្យអស់ពីសមត្ថភាព ដើម្បីដណ្ដើមឱកាសជាប់ក្នុងបញ្ជី២៨នាក់ចុងក្រោយរបស់លោក Keisuke Honda ដែលជាអ្នកដឹកនាំផ្ទាល់។

ខ្សែការបារឆ្នើមរបស់អគ្គិសនីកម្ពុជា បញ្ជាក់យ៉ាងខ្លីថា ៖«ការធ្វើតេស្តរបស់ខ្ញុំគឺប្រឹង១០០%»។

កីឡាករដដែលនេះធ្លាប់ធ្វើតេស្តជម្រើសជាតិកម្ពុជា U15, U16, U18, U19 និងចុងក្រោយនេះគឺ U23 ដែលត្រៀមការប្រកួតពានរង្វាន់ AFF U23 Championship 2022។

កម្ពុជានឹងធ្វើម្ចាស់ផ្ទះ AFF U23 Championship 2022 ពីថ្ងៃទី១៤ ដល់ថ្ងៃទី២៦ ខែកុម្ភៈ នៅពហុកីឡដ្ឋានមរតកតេជោ និងកីឡដ្ឋានព្រីនស៍។ ក្នុងនោះកម្ពុជា ស្ថិតនៅពូល A មានហ្វីលីពីន ទីម័រខាងកើត និងប្រ៊ុយណេ។

កម្ពុជាត្រូវបើកឆាកតទល់ប្រ៊ុយណេនៅថ្ងៃទី១៤ ខែកុម្ភៈ មុនប៉ះហ្វីលីពីន ថ្ងៃទី១៧ និងបិទវគ្គចែកពូលថ្ងៃទី២០ ជាមួយទីម័រខាងកើត នៅខែកុម្ភៈ ឆ្នាំ២០២២ ហើយការប្រកួតរបស់កម្ពុជានឹងធ្វើឡើងនៅទីលាននៃពហុកីឡដ្ឋានមរតកតេជោទាំងអស់តែម្ដង៕

អត្ថបទ៖ អ៊ុំ សុភក្តិ