អ៊ឹម ណារិទ្ធ៖ ក្ដីស្រមៃរបស់ខ្ញុំចង់ចេញទៅក្រៅប្រទេស (SEA Games)

2022-02-09 02:35:09
បាល់ទះ

2022-02-09 02:35:09
ចំនួនមតិ 0 | ចំនួនចែករំលែក 0

ចន្លោះមិនឃើញ

អំឡុងពេលក្រុមបាល់ទះឆ្នេរខ្សាច់ជម្រើសជាតិកម្ពុជាកំពុងរង្គោះរង្គើរ ហើយគ្រូបង្វឹកនិងក្រុមកីឡាករល្អៗបាននាំគ្នាចាកចេញ គឺនៅសល់តែកីឡាករ អ៊ឹម ណារិទ្ធ ប៉ុណ្ណោះស៊ូទ្រាំហ្វឹកហាត់ម្នាក់ឯងបន្តទៀតជាមួយគ្រូបង្គោលថ្មី និងក្រុមកីឡាករថ្នាលថ្មីខ្ចីបទពិសោធ។

អ៊ឹម ណារិទ្ធ

ការស៊ូទ្រាំហ្វឹកហាត់ម្នាក់ឯកនេះ ក៏ដោយសារតែកីឡាករមកពីខេត្តឧត្ដមានជ័យស្រលាញ់ និងចង់ក្លាយជាកីឡាករតំណាងកម្ពុជា ចេញទៅលេងស៊ីហ្គេមនៅក្រៅប្រទេស។ អតីតកីឡាកររបស់ក្លឹបបាល់ទះស្នងការដ្ឋាននគរបាលរាជធានីភ្នំពេញ បានបង្ហាញអារម្មណ៍ខកចិត្តយ៉ាងខ្លាំង ពេលសិស្សច្បងចាកចេញ ប៉ុន្តែគេចាប់ផ្ដើមមានក្ដីសង្ឃឹមវិញ ពេលពួកគេបានចូលមកហ្វឹកហាត់វិញ កាលពីថ្ងៃទី០១ ខែកុម្ភៈ ឆ្នាំ២០២២កន្លងមក។

អ៊ឹម ណារិទ្ធ ឬប្រិយមិត្តស្គាល់ថាតាក់អន្លង់វែងបានប្រាប់ថា ៖«ពេលហ្នឹងមានអារម្មណ៍ខកចិត្តដែរហ្នឹងបង ណាមួយសិស្សច្បងចេញអស់ ហើយការហ្វឹកហាត់ក៏យើងធ្លាក់វិញបង ដោយសារយើងហាត់ពីដើមមកវិញ ហើយឭលោកគ្រូថាបើហាត់ទៅគាត់មើលអត់ចូលភ្នែកទេ គាត់អត់ឱ្យចេញក្រៅប្រទេសទេបង ក្ដីស្រមៃខ្ញុំចង់ចេញក្រៅ ដល់គាត់និយាយចឹងទៅយើងបាក់ទឹកចិត្តដែរហ្នឹង»។

ស្មាត់ស្ដាំដ៏ល្អរូបនេះបានឱ្យដឹងទៀតថា អំឡុងពេលដ៏លំបាកហើយបើទោះបីអត់សិស្សច្បងក្ដី គេនៅតែខំប្រឹងប្រែង។ សំណាងល្អក្រោយមានការយកចិត្តទុកដាក់ពីសហព័ន្ធកីឡាបាល់ទះកម្ពុជា និងស្ថាប័នពាក់ព័ន្ធ កីឡាករល្អៗបីរូបត្រូវបានកោះហៅឱ្យចូលប្រមូលផ្ដុំហ្វឹកហាត់វិញ។

ក្រុមបាល់ទះឆ្នេរខ្សាច់ជម្រើសជាតិកម្ពុជា

កីឡាករទាំងបីរូបនោះមាន ជុក សោភា ហៅឥន្ទ្រីពិឃាដឌូកមកពីក្លឹបបាល់ទះកងពលធំអន្តរាគមន៍លេខ៣ សំ សាមីត មកពីក្លឹបបាល់ទះកងពលធំអន្តរាគមន៍លេខ៣ និង ធី ម៉េងហួង ហៅកូននាគស្លាបហង្សមកពីក្លឹបបាល់ទះក្រសួងមហាផ្ទៃ។ ពួកគេសុទ្ធតែជាកីឡាករមានបទពិសោធលើវិញ្ញាសារកីឡាបាល់ទះលើឆ្នេរខ្សាច់។

បច្ចុប្បន្នកីឡាករបាល់ទះឆ្នេរខ្សាច់ជម្រើសជាតិកម្ពុជាមាន ជុក សោភា, សំ សាមីត, ធី ម៉េងហួង, មឿន ម៉េងឡាយ (កីឡាករថ្មី) និង ខុម ហុងទ្រី (កីឡាករថ្មី)៕

អត្ថបទ៖ អ៊ុំ សុភក្តិ