អាយុគ្រាន់ជាតួលេខកុង ហួរ ទទួលបានពានរង្វាន់ជិះកង់ផ្លូវឆ្ងាយប្រើពេលក្នុង១សប្ដាហ៍

2022-01-21 04:59:20
ព័ត៌មាន

2022-01-21 04:59:20
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក តាំង តិចហួរ ហៅកុង ហួរ មកទល់នឹងពេលនេះមានវ័យ៧២ឆ្នាំហើយ ប៉ុន្តែកុងបានធ្វើឱ្យអ្នកនិយមជិះកង់មានការភ្ញាក់ផ្អើល ក្រោយបំបែកកំណត់ត្រាជិះកង់ផ្លូវឆ្ងាយប្រវែង១,០៥០គីឡូម៉ែត្រ ប្រើពេល២៨ម៉ោង។ បន្ទាប់ពីបំបែកកំណត់ត្រាថ្មី កុងទទួលបានពានរង្វាន់មួយ មេដាយមួយ និងរូបថតអនុស្សាវរីយ៍មួយស៊ុម ដែលផ្ដួចផ្ដើមធ្វើឡើងដោយបងប្អូនអ្នកស្រលាញ់ការជិះទាំងអស់។

ក្នុងទឹកមុខញញឹមកុង ហួរ បានឱ្យដឹងលំអិតពីការបំបែកកំណត់ត្រាផ្លូវចម្ងាយ១,០៥០គីឡូម៉ែត្រថា កុងមានគោលដៅគោលពីរង្វង់មូលតាព្រហ្មជ្រោយចង្វារ ឆ្ពោះទៅកាន់ផ្សារស្គន់លើកំណាត់ផ្លូវជាតិ 6A ដោយប្រើពេល១សប្ដាហ៍ជិះកង់ម្នាក់ឯងរាល់ថ្ងៃ ខណៈការជិះទៅមកត្រូវចាយពេល ៤ ម៉ោងក្នុងថ្ងៃ។

កុង ហួរ បានបញ្ជាក់បែបនេះ ៖«បញ្ហានឹងគឺថាវិលល្ងាចហ្មង ប្រើពេលមួយថ្ងៃតែ៤ម៉ោងទេ មួយព្រឹកក្នុង១៥០គីឡូ គឺថាយើងចេញពីគោលដៅនៅព្រហ្ម នៅរង្វង់មូលព្រហ្មស្ពានជ្រោយចង្វារ ម៉ោង៥(ព្រឹក)យើងចេញ ទៅដល់ស្គន់គឺថាយើងអត់មានឈប់តាមផ្លូវទេ គឺថាគោលដៅដល់ស្គន់ហ្មង ដល់ស្គន់ទៅ២ម៉ោង ២ម៉ោងយើងហូបចុកអីបាយទឹកគុយទាយអីចឹងរួចទៅសម្រាកតិច យើងបកមកវិញហើយ ហើយប្រើពេល២ម៉ោងទៀតដល់ភ្នំពេញ មួយព្រឹកជារៀងរាល់ថ្ងៃ»។

កុងហួរ

បើនិយាយពីប្រភេទកីឡាកុង ហួរ ចាប់អារម្មណ៍ទាំងអស់ តួយ៉ាងកីឡាហែលទឹក រត់ និងដើរជាដើម ប៉ុន្តែកុងបានជ្រើសរើសកីឡាជិះកង់គួក។ ការលេងកីឡាជិះកង់បានធ្វើឱ្យកុងហួរមានសុខភាពកាន់តែល្អ និងកម្លាំងមាំមួនថែមទៀតផង។ តាមប្រសាសន៍របស់កុង ហួរ គោលដៅសំខាន់បំផុតនៃការជិះកង់នេះគឺដើម្បីសុខភាព និងបង្កើនមិត្តភាព។

មិនតែប៉ុណ្ណោះ កុង ហួរ បានជម្រុញលើកទឹកចិត្តឱ្យប្រជាពលរដ្ឋទាំងអស់លេងកីឡាឱ្យបានច្រើនជាពិសេសកីឡាជិះកង់ និងទាមទាឱ្យមានការតស៊ូអត់ធ្មត់ កុំផ្ដេចផ្ដួលទៅតាមអារម្មណ៍ខ្ជិលច្រអូស ដែលជាឃាតករលាក់មុខដ៏គួរឱ្យខ្លាចបំផុត។

កុងបានពន្យល់បែបនេះ ៖«...យើងចាប់ផ្ដើមជិះកង់មកគឺថា ធ្វើឱ្យសុខភាពយើងកាន់តែល្អតាហ្មង ហើយយើងមានអារម្មណ៍ជិះកង់នឹងគឺថា តាំងពីតូចមកនៅអាយុ១៤ឆ្នាំ ហើយកន្លងបន្តបន្ទាប់មកគឺថាយើងជិះកង់បន្តបន្ទាប់មករហូតមកទៀត ហើយរហូតមកដល់ឥឡូវនេះគឺថាយើងព្យាយាមដើម្បីសុខភាព ហើយដើម្បីបង្កើនមិត្តភាពគឺជាការសំខាន់ ហើយការហាត់ប្រាណហ្នឹង សំខាន់យើងព្យាយាមហើយយើងតស៊ូ ទោះបីជាមេឃក្ដៅ ត្រជាក់ រងារ ប៉ុណ្ណាអីក៏ដោយគឺយើងតស៊ូ ហើយតាំងចិត្តគឺថាយើងកុំឱ្យផ្ដេកផ្ដួលទៅតាមគេហៅថាមានភាពខ្ជិលមួយក្នុងខ្លួន វាធ្វើឱ្យយើងគឺថាស្រពុតស្រពន់ទៅយើងខ្ជិល ដូច្នេះយើងត្រូវតាំងចិត្តឱ្យបានត្រូវតស៊ូ ខ្ញុំម្ងៃគឺថាហាត់ប្រាណត្រូវតែយ៉ាងតិចក៏បានមួយម៉ោងឬពីរម៉ោងយ៉ាងតិចក្នុងការជិះកង់»។

ក្រោយទទួលរង្វាន់កុង ហួរ បានបង្ហាញអារម្មណ៍រីករាយបំផុត ដែលបងប្អូនអ្នកជិះកង់គោរពស្រលាញ់ និងបានមូលមតិគ្នាធ្វើជាពានរង្វាន់លើកទឹកចិត្តមួយនេះ។

បុរសវ័យចំណាស់រូបនេះ បានបង្ហាញទៅកាន់ពិភពលោកឱ្យឃើញកាន់តែច្បាស់ថា អាយុគ្រាន់ជាតួលេខតែប៉ុណ្ណោះ ហើយកុងគឺជាគំរូដ៏ល្អមួយដើម្បីបង្ហាញទៅកាន់សាធារណៈជនឱ្យចូលចិត្តលេងកីឡា ក៏ដូចជាលើកកំពស់វិស័យកីឡាជិះកង់ឱ្យកាន់តែរីកចម្រើនជាងនេះ។

គួរបញ្ជាក់ថា ក្រៅពីបំបែកកំណត់ត្រាថ្មីពីរង្វង់មូលតាព្រហ្មជ្រោយចង្វារទៅកាន់ផ្សារស្គន់ចម្ងាយ១,០៥០គីឡូម៉ែត្រនេះ កុងហួរក៏ធ្លាប់មានកំណត់ត្រាជិះកង់ផ្លូវឆ្ងាយជុំវិញបឹងទន្លេសាប និងជិះកង់ឡើងភ្នំបូកគោរួចជិះចុះវិញ ហើយថ្ងៃបន្ទាប់កុងបានបន្តដំណើរពីភ្នំពេញទៅសៀមរាបម្នាក់ឯងដោយជោគជ័យ៕