កុំភ្លេចណា! ស្អែកប្រកួតផ្ដាច់ព្រ័ត្ររវាងក្រុមស្នងការ និងក្រសួងមហាផ្ទៃ A ប្រចាំខែទី១

2021-12-30 02:28:41
បាល់ទះ

2021-12-30 02:28:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃសុក្រ ទី៣១ ខែធ្នូ ឆ្នាំ២០២១ នឹងមានការប្រកួតផ្តាច់ព្រ័ត្រដណ្តើមពានរង្វាន់មេដាយមាស «ក្រុមអធិរាជបាល់ទះ ISI PIPE &ISI PALM» ប្រចាំខែទីមួយរវាងក្រុមបាល់ទះក្រសួងមហាផ្ទៃ A ជាមួយក្រុមស្នងការដ្ឋាននគរបាលរាជធានីភ្នំពេញ។

ការប្រកួតជ្រើសរើសជើងឯក និងជើងឯករងប្រចាំខែទីមួយរវាងក្រុមទាំងពីរ បានធ្វើឱ្យអ្នកស្នេហាវិស័យកីឡាបាល់ទះនៅកម្ពុជាចង់តាមដាននិងទស្សនាជាខ្លាំង ព្រោះក្រុមនីមួយៗសំបូរទៅដោយកីឡាករល្អៗដូចជាកីឡាករ ទុយ កុសល ហៅយុនស្រែស្រែ, ឌី លីដា ហៅចាវកំពង់ចាម, អតីតអ្នកប៉ះសេជម្រើសជាតិកម្ពុជាលោកគ្រូ សោម ណារិទ្ធ, កែវ សុធារិទ្ធ និង រ៉ន សុខជា ហៅស្មាត់ឈើកំពុងចាម។

ចំណែកក្លឹបក្រសួងមហាផ្ទៃក៏មិនធម្មតាដែរពោលគឺមានកីឡាករល្អៗដូចគ្នារួមមានស្មាត់ស្ដាំវ័យក្មេងកំពុងឡើងដៃ មឿន ម៉េងឡាយ, ស្មាត់ឆ្វេង ខុម ហុងទ្រី, អ្នកប៉ះសេដ៏ជំនាញ ប៊ន ណារិទ្ធ, រនាំងធំ មាស វាសនា ហៅស្នាលេខ៥ និងកីឡាករជំនាញការពារ ឡេក លាងហុង។

គូនេះត្រូវបានមហាជនយល់ឃើញថា នឹងធ្វើឱ្យកក្រើកតារាងបាល់ទះ The Blue Sport Center ខណ្ឌសែនសុខជាក់ជាមិនខានដែលនឹងធ្វើឡើងនៅវេលាម៉ោង ៥ និង១៥នាទីល្ងាចតទៅ។

គួរបញ្ជាក់ថា នេះជាការប្រកួតរកជើងឯក និងជើងឯករងប្រចាំខែទីមួយ ខណៈបីខែទៀតនឹងធ្វើឡើងនៅឆ្នាំ២០២២ខាងមុខ។ ជើងឯកប្រចាំខែនីមួយៗនឹងទទួលបានទឹកប្រាក់៦លានរៀល (១,៥០០ដុល្លារ) ជើងឯករងបាន ៣ លានរៀល (៧៥០ដុល្លារ)។ ក្នុងមួយខែយកតែ២ក្រុមប៉ុណ្ណោះ ដើម្បីឡើងទៅប្រកួតជម្រុះក្នុងខែទី៥ ដែលជាខែចុងក្រោយនិងជាវគ្គផ្ដាច់ព្រ័ត្រ ដណ្ដើមមេដាយមាសនិងប្រាក់រង្វាន់ធំ។ ក្រុមលេខ១នឹងទទួលបាន ២០លានរៀល ខណៈលេខ២បាន ១០លានរៀល៕

អត្ថបទ៖ អ៊ុំ សុភក្តិ