បន្ទាប់ពីមានការចាប់អារម្មណ៍លើគ្នាទៅវិញទៅមករវាងម៉ាប់ឆ្វេងនិងស្មាត់ប៉ា នៅព្រឹកនេះម៉ាប់ឆ្វេងបានបង្ហើបប្រាប់ Sabay ថាបើលោក​ជា​ពី​របួសហើយ​មានឱកាសល្អណា​នោះ​ លោកចង់ចាប់ដៃគូជាមួយស្មាត់ប៉ាលេង​មួយ​ប្រកួត ដើម្បីដកស្រង់បច្ចេកទេសក៏ដូចជាធ្វើតាមការសំណូមពររបស់មហាជន។

កីឡាករ​មាន​ដើម​កំណើត​មក​ពី​ខេត្ត​កំពតបាន​បញ្ជាក់​បែប​នេះ​ ៖«ក្នុងឱកាសណាមួយដែលខ្ញុំជាជើងហើយនិងខ្ញុំអាចនឹងលេងបានវិញ ខ្ញុំនឹងយកឱកាសនេះ​ចាប់ដៃគូជាមួយស្មាត់ប៉ា ដើម្បីយើងចូលគ្នាដកស្រង់បច្ចេកទេសគ្នា តើយើងអាចចាប់ដៃគូលេងជាមួយគ្នាបានអត់ ទោះបីជាស្មាត់ប៉ាអត់បានចូលរួមក្រុមក្លឹបបាល់ទះដាវញីឈ្មោលក៏ដោយ តែក្នុងឱកាសណាដែលអាចសហការគ្នាមួយប្រកួតបានឬពីរប្រកួតបាន គ្រាន់កុំឱ្យ​ហ្វេនៗគាត់ថាចង់ឱ្យ​ខ្ញុំបាទលេងជាមួយស្មាត់ប៉ា សហការគ្នាចឹងបង អ៊ីចឹងខ្ញុំក៏ចង់សហការគ្នាជាមួយគាត់មួយប្រកួតពីរប្រកួតក្នុងឱកាសណាដែលមានឱកាសទេណាបង ដូចជាឱកាសគាត់ទំនេរពីការងារ ឱកាសណាដែលខ្ញុំជាពីជើងចឹងណាបង»។

ក្រោយម៉ាប់ឆ្វេងចាប់អារម្មណ៍ និងបង្ហើប​ចង់បានខ្លួនចូលក្រុមដាវញីឈ្មោល ស្មាត់ប៉ាបានបង្ហាញអារម្មណ៍រីករាយនិងចង់ចូលរួមដែរ ប៉ុន្តែ​គេមិនអាចទៅណាបានទេ ព្រោះគេត្រូវមើលថែម្ដាយ មិនអាចទៅឆ្ងាយបាននិងត្រូវជួយធ្វើស្រែបងប្រុស។

ចំពោះម៉ាប់ឆ្វេងវិញ ក្រោយទទួលបានការឆ្លើយតបរបស់​ស្មាត់​ប៉ា​បែប​នេះ​ លោកក៏បានសម្ដែងអារម្មណ៍រីករាយដូចគ្នា ហើយសរសើរស្មាត់ប៉ាថាជាកូនកត្តញូ ហើយ​ក្រុមដាវញីឈ្មោលបើកភ្លើងខៀវជា​និច្ច​សម្រាប់ស្មាត់មាន​ដើម​កំណើត​នៅ​ខេត្ត​ពោធិ៍សាត់​។

បុរស​រហស្សនាម​សឺវីស​ឥតស្រមោលបាន​ពន្យល់​បន្ថែម​ថា ៖ «ខ្ញុំ​ចង់​ឆ្លើយ​តប​នៃ​ការ​ទាក់ទង​ទៅ​នឹង​ស្មាត់​ប៉ា ព្រោះ​ខ្ញុំ​បាន​ឃើញ​គាត់​ថា​ចង់​មក​ (ក្រុម​ដាវញីឈ្មោល) តែដោយសារ​ម្ដាយ​របស់​គាត់​ឈឺ​ អ៊ីចឹង​គាត់​មក​អត់​​កើត អ៊ីចឹង​ខ្ញុំ​សប្បាយ​ដែល​គាត់​មាន​ចិត្ត​ចង់​មក​រួម​ក្រុម​ជាមួយ​ខ្ញុុំ​បាទអ៊ីចឹងណា សប្បាយ​ចិត្ត​ពេល​ឮ​ដំណឹង​ហ្នឹង អ៊ីចឹង​ទោះបី​គាត់​មក​ពេល​ហ្នឹង​អត់​បាន​មែន តែ​ខ្ញុំ​នឹង​គិត​ថា​ក្នុង​រយៈ​ពេល​ណា​មួយដែល​គាត់​ធ្វើ​ស្រែ​ចម្ការ​រួច ឬពេល​ណា​ដែល​គាត់​ទំនេរ​ហ្មង​និយាយ​ទៅ ពេល​ណា​ដែល​គាត់​ទំនេរ​មិន​ចាំ​បាច់​ធ្វើ​ការ​អី បើ​គាត់​ចង់​មក​ខ្ញុំ​ទទួល​អ៊ីចឹង​ណា​បង»៕