នៅវេលាម៉ោង៦ល្ងាចស្អែកនេះ ក្រុមខ្លាំងស្នងការដ្ឋាន​នគរ​បាល​រាជធានីភ្នំពេញ នឹងត្រូវប្រកួតជាមួយ​ក្លឹបបាល់ទះក្រសួងមហាផ្ទៃ B វគ្គពាក់កណ្ដាលផ្ដាច់ព្រ័ត្រដណ្ដើម​ពាន​រង្វាន់​ «ក្រុមអធិរាជបាល់ទះ ISI PIPE - ISI PALM» នៅទីលាន The Blue Sport Center ក្បែរកីឡដ្ឋានវេស្ទឺនភ្នំពេញ។

មុនជំនួបកើត​ឡើង​​លោក អ៊ូ សុផល គ្រូបង្វឹកក្លឹបបាល់ទះក្រសួងមហាផ្ទៃបានឱ្យ​ដឹងថា ក្រុមរបស់លោកបានហ្វឹកហាត់រាល់ថ្ងៃ ដើម្បី​ត្រៀម​ការ​ប្រកួត​មួយ​នេះ​ ហើយ​បានលើកឡើងពីចំណុចល្អរបស់គូប្រកួតថា ក្រុមស្នងការមានកីឡាករចាស់ៗល្អៗ និងមានបទពិសោធច្រើន ដូច្នេះក្រុម​លោកមិនត្រូវធ្វេសប្រហែស១វិនាទីណាឡើយ។

លោកបានបញ្ជាក់ថា ៖«និយាយទៅចំណុចខ្លាំងរបស់ស្នងការ គាត់មានប៉ះសេជើងចាស់ (លោកគ្រូសោម ណារិទ្ធ) ពីមុនខ្ញុំក៏ជាសិស្សរួមគ្រូជាមួយគ្នាដែរ ​ធ្លាប់លេងជាមួយគាត់ដែរ ការប៉ះសេរបស់គាត់គឺល្អ ហើយណាមួយគាត់ចូលលេងខ្លួនឯង គាត់មានការដឹកនាំលេងល្អ ហើយទី២ស្មាត់របស់គាត់បីនាក់ហ្នឹងគឺរឹងណាស់ មានយុន មានធារិទ្ធ និង​មាន​ចាវ បីនាក់ហ្នឹងគឺរឹងប៉ែស​ និយាយរួមគឺពិបាក ពិបាកខ្លាំងសម្រាប់ក្រុមយើង ហើយប្រយ័ត្នខ្លាំងមែនទែនគឺសឺវីសរបស់គាត់ (យុន) ក្រៅពីហ្នឹងអត់មានជាបញ្ហាអ្វីចោទទេ សំខាន់យើងទប់សឺវីសគាត់ឱ្យ​ជាប់ យើងអាចប្រកួតប្រជែងជាមួយគាត់បានហើយ»។

ដោយឡែកលោក សោម ចំណាប់ គ្រូបាល់ទះក្លឹប​ស្នងការយល់ឃើញថា ក្រុមរបស់លោក​ហាក់មានប្រៀបនិងសង្ឃឹមឈ្នះច្រើនលើក្រុមក្រសួងមហាផ្ទៃ B ដ្បិតថាស្នងការ​មានស្មាត់ល្អៗ និងមានសេវាមុតស្រួច រួមទាំងអ្នកប៉ះសេដ៏ជំនាញផងដែរ។

ទោះមាន​ប្រៀបនិង​សង្ឃឹម​ឈ្នះ​ច្រើន​ក្ដី លោកគ្រូ សោម ចំណាប់ ក៏បានមើលឃើញពីចំណុចល្អរបស់ក្រសួងមហាផ្ទៃដែរ ហើយ​​មហាផ្ទៃBនេះក៏មិនមែនជាក្រុមដែល​ត្រូវមើលស្រាលឡើយ។

គ្រូបង្គោលជម្រើសជាតិបាល់ទះឆ្នេរខ្សាច់រូប​នេះ​ បានបង្ហើបប្រាប់ថា ៖«ខ្ញុំព្រួយបារម្ភរឿងចាប់សឺវីសរបស់ក្រុមខ្ញុំ ព្រោះថាផ្លែសេវារបស់គាត់ក៏ល្អគួរសមដែរ ហើយដូច្នេះខ្ញុំត្រៀមហ្វឹកហាត់រួចហើយ ការចាប់សេវារបស់ក្រុមខ្ញុំហ្នឹងគឺបានហ្វឹកហាត់បានល្អហើយ ចឹង​កាលណា​យើង​ចាប់​សេវា​បាន​ល្អ ការ​ផ្ដាច់​ក៏​ល្អ​ដែរ​»។

គួរ​បញ្ជាក់​ថា ការ​ប្រកួត​បួន​ស្មើ​ដណ្ដើម​មេដាយមាសនិង​ប្រាក់​លាន​នេះ លេង​ដូច​​​ការ​ប្រកួត​​ក្រៅ​ផ្លូវ​ការ​ដែរ គិត​១៥​ពិន្ទុ ប្ដូរ​សេវា​ទៅ​មក កីឡាករ​លេង​សេរី មិន​វាយ​សេវា​វិល​ជុំ​​ ប៉ុន្តែ​ខុស​ត្រង់​ការ​ប្រកួត​​​តម្រូវ​ឱ្យ​កីឡាករ​លេង​លក្ខណៈ​ស្តង់​ដារ មិន​ប៉ះសេ​ចាប់​បោះ និង​បោកស្អិត​ជាប់​ដៃ​ឡើយ​៕

​