ក្រុមវ័យចាស់កម្ពុជា២ មាន១ ដណ្ដើមបានជើងឯក ១ ដណ្ដើមបានលេខ៣ ពាននៅថៃ

2014-11-25 16:40:59
បាល់ទាត់

2014-11-25 16:40:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់វ័យចាស់កម្ពុជាចំនួន ២ បានបង្ហាញសមត្ថភាពខ្លួនយ៉ាងល្អ ក្នុងពានរង្វាន់ SENIOR ASEAN CUP 2014 នៅខេត្តសុរិន្ទ ប្រទេសថៃ ដោយមាន ១ ក្រុមដណ្ដើមបានជើងឯក ចំណែក១ ក្រុមទៀតទទួលចំណាត់ថ្នាក់លេខ៣ ក្រោយបិទវគ្គកាលពីម្សិលមិញ។

ទិដ្ឋភាពបើកការប្រកួតនាពេលកន្លងមក

បើតាមការឱ្យដឹងរបស់លោក ប៉ាន់ខែម ប៊ុនថន អ្នកចាំទីប្រចាំក្រុមអាស៊ានវ័យចាស់កម្ពុជាបានប្រាប់មកពីទីលានប្រកួតថា ក្រុមដែលដណ្ដើមបានជើងឯកគឺ ក្រុមជម្រើសជាតិវ័យចាស់កម្ពុជា ហើយក្រុមជម្រើសជាតិវ័យចាស់របស់ឡាវ ជាជើងឯករង។ ចំណែកក្រុមអាស៊ានវ័យចាស់កម្ពុជា និង ក្រុមវៀតណាម ទទួលបានលេខ៣ ស្ទួន។

លោក សោម សារ៉ន ហៅ តាមុំាង គ្រូជម្រើសជាតិវ័យចាស់កម្ពុជា បានលើកឡើថា ក្រុមលោកធ្លាប់លើកពាននេះម្ដងហើយកាលពីឆ្នាំមុន ដែលជាឆ្នាំចូលរួមប្រកួតលើកដំបូង។ លោកថាពានរង្វាន់នេះបង្កើតឡើងដើម្បីរឹតចំណងមិត្តភាពរវាងកីឡាករវ័យចាស់តាមប្រទេសក្បែរខាងគ្នាក្នុងតំបន់។

សម្រាប់ឆ្នាំនេះមានក្រុមចូលរួមប្រកួតដល់ទៅ ១០ ក្រុម មាន ២ ក្រុមទៅពីកម្ពុជា, ឡាវ ២ ក្រុម, វៀតណាម ២ក្រុម និង ម្ចាស់ផ្ទះថៃចំនួន ៤ ក្រុម ដែលចែកជា ២ ពូល ចាប់ប្រកួតតាំងពីសប្ដាហ៍មុន ហើយបញ្ចប់ទៅនៅថ្ងៃទី ២៤ វិច្ឆិកា ម្សិលមិញ។ នេះជាមោទនភាពមួយសម្រាប់ក្រុមកម្ពុជាដែលបញ្ជូនទៅប្រកួតទាំង ២ ក្រុមហើយទទួលលទ្ធផលល្អទាំង ២ តែម្ដង៕

អត្ថបទ៖ ម៉ឺន រស្មី រូបថត៖ Ouk Samnang