ប៊ន ណារិទ្ធ ថាការប្រកួត៤ស្មើស្អែកនេះនឹងធ្វើឱ្យស្មារតីប្រយុទ្ធយុវជនខ្លួនកាន់តែក្លាហាន

2021-12-01 02:32:49
បាល់ទះ

2021-12-01 02:32:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងការប្រកួតដណ្ដើមមេដាយមាសពានរង្វាន់ «ក្រុមអធិរាជបាល់ទះ ISI PIPE- ISI PALM» ក្លឹបក្រសួងមហាផ្ទៃបានដាក់ពាក្យប្រកួតចំនួន២ក្រុមពោលគឺឈុត A និងឈុត B។

អ្នកប៉ះសេ ប៊ន ណារិទ្ធ

បើទោះការប្រកួតមានលក្ខណៈពាក់កណ្ដាលអាជីព ប៉ុន្តែអ្នកប៉ះសេដៃទី១របស់ក្រសួងមហាផ្ទៃ ប៊ន ណារិទ្ធ យល់ឃើញថាវានឹងផ្ដល់ឱកាសដល់យុវជនរបស់ខ្លួនក្នុងការអភិវឌ្ឍខ្លួន ធ្វើឱ្យស្មារតីប្រយុទ្ធរបស់ពួកគេកាន់តែក្លាហាន ហើយសាំនឹងបរិយាកាសនៃការប្រកួត។

កីឡាករមកពីខេត្តកណ្ដាលបញ្ជាក់ថា ៖«ពេលជួួយទី១ធ្វើឱ្យស្មារតីនៃការប្រយុទ្ធហ្នឹងគឺក្លាហានជាងមុន ហើយមួយទៀតធ្វើឱ្យគាត់ស្គាល់ គាត់សាំជាមួយនឹងបរិយាកាសនៃការប្រកួត។ បើយើងអត់ដែលប្រកួតសោះ ពេលខ្លះទៅអាចគ្រាន់តែបើកភ្លើងទៅ ក៏អាចវិលមុខក៏ថាបាន។ នេះជារឿងមួយដែលបងៗយើងធ្លាប់ជួបម៉ោ។ អ៊ីចឹងខ្ញុំសង្ឃឹមថាប្អូនៗខ្ញុំគាត់នឹងវិវឌ្ឍជាងនឹង»។

បើទោះមិនមានការប្រកួតនាពេលកន្លងមក ឬស្ថិតក្នុងបរិបទកូវីដយ៉ាងណាក្ដី ក្លឹបក្រសួងមហាផ្ទៃតែងធ្វើការហ្វឹកហាត់ជាប្រចាំ គឺមួយសប្ដាហ៍ហាត់៦ថ្ងៃ ដើម្បីដុតខាតចំណេះជំនាញ។ យ៉ាងណាជុំការប្រកួតនេះដែរ ណារិទ្ធយល់ថាក្រុមរបស់ខ្លួននឹងធ្វើបានល្អ ថ្វីបើមានក្រុមខ្លាំងៗចូលរួមប្រកួតច្រើនក្ដី។

ណារិទ្ធ បន្ថែមបែបនេះ ៖«ខ្ញុំគិតថាក្រុមខ្ញុំធ្វើបានល្អ ដោយសារតែក្រុមខ្លាំងៗមានក៏ពិតមែន ប៉ុន្តែគ្រាន់ថាយ៉ាងហោចណាស់ក៏លេងអាចនិយាយបានថាពាក់កណ្ដាលស្តង់ដារ គឺលេងមិនមានការប៉ះសេចាប់បោះឬចាប់បោកអីទេ យ៉ាងណាក៏ក្រុមកីឡាបាល់ទះអាជីពនៅតែមានសង្ឃឹមច្រើន។ បើយើងចេញលេងក្រៅផ្លូវការគឺមានប៉ះសេចាប់បោះហើយនឹងលេងបោកអី បានថាបាល់ក្រៅផ្លូវការមានអទិភាពជាង»។

ការប្រកួតដណ្ដើមមេដាយមាសពានរង្វាន់ខាងលើមានរយៈពេល៥ខែ។ ខែនីមួយៗមាន៨ក្រុមត្រូវប្រកួតជម្រុះចាញ់ធ្លាក់ ដោយយកតែ២ក្រុមប៉ុណ្ណោះ (លេខ១,២) ដើម្បីឡើងទៅប្រកួតជម្រុះវគ្គផ្ដាច់ព្រ័ត្រនៅខែទី៥ ហើយការប្រកួតទៀតសោតធ្វើតែថ្ងៃព្រហស្បតិ៍ និងថ្ងៃសុក្រប៉ុណ្ណោះ ចាប់ពីវេលាម៉ោង៦ល្ងាចតទៅ។

សម្រាប់ការប្រកួតរកលេខ១និងលេខ២ប្រចាំខែទី១ នឹងចាប់ផ្ដើមនៅថ្ងៃទី ០២ ដល់ថ្ងៃទី ២៤ ខែធ្នូ ឆ្នាំ២០២១ នៅ The Blue Sport Center។ ៨ក្រុមចូលរួមមានក្រសួងមហាផ្ទៃ A, Conserve Players, យុវជនជាយដែន, ហង្សពិឃាដ, យុវជនកីឡាបាល់ទះ, Club Golden9, វរសេនាតូចអន្តរាគមន៍លេខ ២៥១ និងក្រសួងមហាផ្ទៃ B។