គ្រូបង្គោល៥រូបនៅលីគកំពូលកម្ពុជា​គឺលោក មាស ចាន់ណា, Lee Tae-Hoon, មាស សំអឿន, Colum Curtis, Oriol Mohedano ត្រូវបានក្លឹបប្រកាសចែកផ្លូវនៅរដូវកាលឆ្នាំ២០២១នេះ។

លោក មាស ចាន់ណា បានចាកចេញពីក្លឹបណាហ្គាវើលដ៍ កាល​ពី​ខែតុលា ឆ្នាំ​២០២១ បន្ទាប់ពីកិច្ចសន្យារបស់លោតបាន​ផុតកំណត់ ក្រោយ​ដឹកនាំក្លឹបអស់រយៈពេល៧ឆ្នាំ។ បើសរុបពេលវេលានៅជាមួយក្លឹបមួយនេះ គ្រូ​បង្គោល​រូប​នេះ​បានចំណាយពេល​២០ឆ្នាំ ពោលគឺ១៣ឆ្នាំជាកីឡាករនិង៧ឆ្នាំជាគ្រូបង្វឹក​។

លោក LEE TEA-HOON គ្រូបង្គោលថ្មីរបស់សមាគមន៍កីឡាបាល់ទាត់កងយោធពលខេមរភូមិន្ទ។ អតីតគ្រូជម្រើសជាតិកម្ពុជារូបនេះ ត្រូវបានក្លឹប ​ហៅ​មកដឹកនាំក្រុមនៅថ្ងៃទី០១ ខែមិថុនា ឆ្នាំ២០២១។ យ៉ាងណាកាលពីថ្ងៃទី១៧ ខែវិច្ឆិកាកន្លងទៅ គ្រូបង្គោលជនជាតិកូរ៉េខាងត្បូង​ ត្រូវបានក្លឹបសម្រេចបញ្ចប់កិច្ចសន្យា។ គេកត់សម្គាល់ឃើញថា ក្រោយលោក LEE មកដឹកនាំ សមត្ថភាពក្រុម TIFFY ហាក់ប្លែកនិង​ល្អជាង​មុន។

ដោយឡែកគ្រូបង្គោលក្លឹបបាល់ទាត់អគ្គិសនីកម្ពុជាលោក មាស សំអឿន ឯណេះ​វិញក៏ត្រូវបានក្លឹបប្រកាសចែកផ្លូវដែរ។ នេះបើតាមការបង្ហោះនៅ​លើ​ផេកផ្លូវការរបស់ក្លឹបថ្ងៃនេះ។

អតីត​គ្រូ​បៀលប្រាយ​យូណាយធីត បានសុំលាលែងពីគ្រូបង្វឹកបាល់ទាត់នារីនៅសាលាបាល់ទាត់ជាតិ​បាទី ហើយមកធ្វើជាជំនួយការគ្រូ​ Fitness និងគ្រូកម្លាំង នៅក្លឹបអគ្គិសនីកម្ពុជាក្នុងឆ្នាំ ២០១៨ រហូតត្រូវថ្នាក់ដឹកនាំក្លឹបតម្លើង​ជាគ្រូធំ ក្រោយអតីតគ្រូមុនមានបញ្ហាសុខភាព។

ចំណែក​​២​រូប​ទៀតគឺគ្រូបង្គោល​ក្លឹប​វិសាខាលោក Colum Curtis និងគ្រូ​បង្គោល​អង្គរថាយហ្គឺរលោក Oriol Segura។ លោក Colum ត្រូវ​ក្លឹប​​ប្រកាស​ចែក​ផ្លូវ​កាល​ពីខែ​កញ្ញា ឆ្នាំ​២០២១ ស្របពេល​លីគ​កំពុង​មាន​ការ​ប្រកួត​ប្រជែង​ខ្លាំង​ ដោយ​តែងតាំងគ្រូជំនួយលោក Tunji Ayoyinka Akeeb គឺជាគ្រូបង្គោលស្ដីទី​ដឹកនាំក្រុមជាបណ្ដោះអាសន្នរហូតដល់ចប់រដូវកាល។ លោក Colum ​ក្លាយ​ជា​គ្រូ​បង្គោល​វិសាខា​នៅ​រដូវ​កាល​ឆ្នាំ​២០១៩-២០២០ និង​ជួយ​ឱ្យ​ក្លឹប​មួយ​នេះឈ្នះ​ពាន​រង្វាន់​សម្ដេច​ ហ៊ុន សែន ឆ្នាំ​២០២០។

លោក Oriol Mohedano Segura ត្រូវ​បាន​ក្លឹប​​ចែក​ផ្លូវ​កាល​ពី​ថ្ងៃ​២២ ខែ​វិច្ឆិកា ក្រោយ​មក​​ដឹក​នាំ​ចាប់​តាំង​ពី​ឆ្នាំ​២០១៧​។ ក្រោម​ការ​គ្រប់គ្រង​របស់​Oriol ក្នុង​ចំណោម​១០០​ប្រកួត​ អង្គរថាយហ្គឺរ​ឈ្នះ ៤៨ ស្មើ២៥ ចាញ់២៧​ប្រកួត។ លោក​ដឹក​នាំ​ឈ្នះ​ការ​៦ប្រកួត​ជាប់ៗ​គ្នា១​ដង នៅ​ឆ្នាំ​២០២១ និង​មិន​ចាញ់​ជាប់​ៗ​គ្នា​៩​ កាល​ពី​ឆ្នាំ​២០១៧ និង​២០១៨៕