ប្រធាន​ក្រុម​ក្អែកពិឃាដលោក ចាន់ សុជា គ្រោងចូលប្រឡូកក្នុងសមរភូមិបាល់ទះក្រៅផ្លូវការវិញ ប្រសិន​បើ​ប្រទេសបើកដំណើរការ​ទូលំទូលាយដូចដើម ក្រោយបាត់មុខអស់​ជាង១ឆ្នាំ។

ថ្មីៗនេះកន្លែងលេងកីឡាករ ត្រូវបានអនុញ្ញាតឱ្យ​បើកដំណើរដោយ​ត្រូវ​គោរពតាម​វិធាន​៣កុំ៣​ការពារ ក្រោយស្ថានភាពវិបត្តិ​ជំងឺកូវីដ-១៩ មានសភាពល្អប្រសើរខ្លះ ខណៈ​ក្រុមអ្នកលេងបាល់ទះក្រៅផ្លូវការមួយចំនួន ក៏បានដើរអុកឡុកតាមតារាងបាល់ទះ​នានាជាហូរហែ។ ប៉ុន្តែគេ​មិន​ទាន់​ឃើញ​លោក ចាន់ សុជា ​ចេញលេងនៅឡើយ​​​ដ្បិត​​លោក​​ត្រូវ​បាន​គេ​ដឹង​ថាកំពុង​​មមាញឹក​នឹង​ការងារ​។

លោកបានបញ្ជាក់ថា ៖«រវល់ដែរបងរវល់ ជាប់ធ្វើផ្ទះ មើលជាងមើលអី ត្រូវទិញឥវ៉ាន់អីឱ្យ​ជាងអ៊ីចឹងណា តែគ្រាន់ថាបើគេបើកប្រទេស(ដូចដើម)វិញ ចង់សាកលេងដែរ លេងគីឡូល្មមៗគេតឱ្យ​បីបួនចេះតែហ៊ានលេងហើយ»។

ចំពោះគូឱ្យ​គេតបីបួននេះដែរ ប្រធានក្រុមដែលមានជំនួញដីឡូត៌ខាងលើ នឹងមិនយកកូនក្រុមតោកំណាចស្មីធំ​ទេ គឺដាក់ត្រឹមស្មាត់ខ្លឹងប៉ុណ្ណោះ។

លោក បន្ថែមទៀតថា ៖«ហ្នឹងហើយបងខ្ញុំចង់លេងមួយគូហ្នឹង អត់យកស្មីធំទេបីបួននោះ ដាក់ត្រឹមខ្លឹងចឹងណាបង ចង់សាកលេងមួយគូពីរគូបើកឆាក មើលទៅបើសិនជាលេងឈ្នះ យើងចេះតែមានគូចាប់លេងទៀតចឹងណាបង»។

គួរបញ្ជាក់ថា ក្រុមក្អែកពិឃាដរបស់លោក ចាន់ សុជា ជាក្រុមមួយស្ថិតនៅកម្រិត Grade B ដែល​មាន​សមាជិកតោកំណាចស្មីធំ, ជឿនកំពង់ស្ពឺ, ផានិត, អូ, និងស្មាត់ខ្លឹងមកពីខេត្តព្រៃវែង៕